1 ጢማ̈ 5 - ኦራ ጫ̈ቃ ማጻ̈ፋኣስኒ ዓይቂ̇ኖ ማጫ̇ን ጎይ ኢሚ̇ኖ ዞራ 1 ጪጚኖ ኣስ ኔ ባ̈ባፌ̈ን ቤቃ̈ር ዞ̈ራብዶኬ ጎይላፔ፤ ናኢቲ ማቂ̇ኖ ኣቲናንስ ኔ ኢሺፌ̈ን ማሃር ቤቃ̇ቤ። 2 ጪጚኖ ማጫ̈ን ኔ ኢንዲፌ̈ን፣ ዉዲራ̈ን ኔ ሚሺፌ̈ን ማሃራ ጌ̈ሻ̇ ቆፊባራ ኢንታ̇ ቤቃ̇ቤ። 3 ኣስኒ ዓይቂ̇ን ኪንባር ሜቲንቲ̇ዝ ማ̈ጫን ኢንታ ማ̈ዳ̇ቤ። 4 ኣስኒ ዓይቂ̇ኖ ማ̈ጪንዳ ኢዝቦ ናኢ ዎይ ናኣ ናኢ ዎኮ ዪን ናኣን ቲ̈ኒታር ፌ ኣ̈ሎ ኣሳን ማ̈ዲ̇ዛ̈ዲኬ ፌ̈ና ዬሊኖንቦ ኮሽ ኦ̈ሳ ኦ̈ር ማሃንዳብ ኮሻ̇ዚን ኤሮጋ̈ቤ፥ ዪና̇ ጾ̈ሳ̇̇ ኡፋይሲዝ ባዜ። 5 ኣስኒ ዓይቂ̇ን ኪንባር ሜቲንቲ̇ኖ ኣሲንዳ ፌ ታስፊን ጾ̈ሳ̇ ጋ̈ልዳ ጋዳ̇ራ ጋላሳ̇ሬ ቃማ̇ሬ ጾ̈ሲ ኦዞ ማ̈ዳ̇ምፔ̈ን ዎ̈ሳባር ሚ̈ጛር ዶኣ̈ሬ። 6 ዓኒ̇ ኣላሚን ጋልዶ ኡፋ̈ይሲን ሙታ̇ ኮያዝ ኣስኒ ዓይቂ̇ኖ ማጪ̇ንዳ ኢዛ ሼምፓባራ ዎዶራ ዓይቂ̇ኖ ኣስፌ̈ኔ። 7 ኢንቲ̇ ኣሲ ኢንታ ጋልዳ ኢ̈ታባዝ ሶ̈ላካይዶር ኮሽ ዶኣምፔ̈ኒ ዓና̇ ቲሚርቲ̇ን ኢንታ ታማ̈ርሳቤ። 8 ፌ ዳባ̇ንቦ ማ ዎይፖ ሺ ፌ ኣ̈ሎ ኣሳንቦ ቆፒ̇ባሶ ኣሲ ፌ ኣማ̇ኒን ኣሺ̇ኖ ኣሴ፤ ማ ዉርሲ ኣማ̇ናካ̇ዮ ኣሳፓር ሺ ኢ̈ት ኣሴ። 9 ኢዝቦ ሌሂ ታጳ ላይ ኩማካ̇ዮ ኣስኒ ዓይቂ̇ኖ ማ̈ጪንዶ ኣስኒ ዓይቂ̇ኖ ማጫ̇ን ጻ̈ፊንቲ̇ዝ ማጻ̈ፋ ጋልዳ ኢዝ ሱምን ጻ̈ፋፔ̇፤ ማ ኢዝ ሱምን ጻ̈ፊንታ̇ዝ ኣሲንዳ ዓኒፖ̇ ቲ̈ን ፔቲ̇ ኣስ ኣ̈ል ሙታ̇ ኢስቲ̇ኖ ኣስ ማ̈ቃ̇ንዳብ ኮሻ̇̈ሬ። 10 ኮሽ ኦ̈ሳ ዎይባራ ዪ̈ዳሬ፥ ናኢ ኮሺንቻ ዲቻ̇ዚንዶ፣ ዛቃ̇ ሞካ̇ዚንዶ፣ ኣማ̇ኒኖ ኣሳን ቶሂን ሜ̈ጫ̇ዚንዶ፣ ሜ̈ቲንቲኖ̈ን ማ̈ዳ̇ዚንዴኬ ኮሽ̇ ኦ̈ሳ ዎይባራ ኤሪንቲ̇ኖ ኣስ ማ̈ቃ̇ንዳቦ ኮሻ̈ሬ። 11 ናኢቲዶን ኣስኒ ዓይቂ̇ኖ ማጫ̇ን ኢንታ ናኢቲ ኢኒ̇ንዳ ኢንታ ጋማራ ክርስቶ̈ሳባር ጌሊኖ ቃ̈ሊን ኣሻ̇ሪ ኢስታ̇ንዳብ ኮዪዛኮታ̇ቦ ኣስኒ ዓይቂ̇ኖ ማጫ̇ን ጻ̈ፊንቲዝ ማዝጋባ ጋልዳ ኢንታ ጻ̈ፋፔ̇። 12 ዪን ማጫ̇ን ቲ̈ን ክርስቶ̈ሳባራ ጌሊኖን ጫ̈ቂን ኣሺኖኮታ̇ቦ ፌ ጋልዳ ፊርዳ ኤሄይሬ። 13 ማ ኦ̈ሳ ኦ̈ዛ ኣሻ̇ሪ ኣሳ ኣ̈ል ጋርሳባር ዬሬ፤ ዪ̈ሙታ̇ ጊዳካ̇ይዶን ኣስ ጌስቲ፥ ኢንታ ጌልሲባ̈ሶ ባዝ ጋርታ ጌሊ ኢንታ̇ብ ኮሺባ̈ሶ ሶ̈ላ ሶ̈ሊዝ ኣስ ማ̈ቂ̇̈ሬ። 14 ዪዚ ዪ̈ኮታ̇ቦ ኣስኒ ዓይቂ̇ኖ ናኢቲ ማ̈ቂ̇ኖ ማጫ̇ን፥ ኑ̈ና ኢጺ̇ዝ ኣሳን ኢንታ ሱምን ኢ̈ታ ባዝባር ይሳካ̇ይፌ̈ኒ ኢስታ̇ሪ ናኢ ዬላሪ ፌ ኣ̈ሊን ኮሺንቺ ኣቂሳምፔ̈ኒ ቴ ኢንታ ዞራ̈ሬ። 15 ዓኒፖ ቲ̈ን ፔቲ̇ ፔቲ̇ ኣስኒ ዓይቂ̇ኖ ማጫ̇ን ሴ̈ጣ̈ና ቆ̈ፊን ኦ̈ሙታ ኣማ̇ኒን ጋልዳፖ ኬዲ̇ኔ። 16 ኣማ̇ኒኖ ፔቲ̇ ኣሲንዳ ኢዝ ኣ̈ላ ጋርታ ኣስኒ ዓይቂ̇ኖ ማጫ̇ን ዎኮ ኢንቲ̇ ዎሳኬን ዋ̈ዪካ̇ዮ̈ዲፌ̈ኒ ኢዛ ኢንታ̇ ማ̈ዶ̇ጋ̈ቤ። ዪዚ ዪኒ̇ባራ ዎ̈ሳ ኬ̈ንዳ ውርሲ ማ̈ዲ̇ዝ ኣሲ ባዮ ኣስኒ ዓይቂ̇ኖ ማጫን ማ̈ዳ̇ንዳብ ዳንዳኣ̈ሬ። 17 ዎ̈ሳ ኬን ኮሺንቺ̇ ኣቂሲዛ̈ን፥ ማ ዎይፖ ሺ ሲብካ̇ታባርኬ ታማ̈ርሲባራ ዳ̈ቡሪዝ ዎ̈ሳ ኬ̈ ጪጛ̈ሻንቦ ጴች ቦ̈ንች ኮሺ̇̈ሬ። 18 ኣባ ጌይን ጌ̈ሻ ማጻ̈ፋ ጋልዳ “ኦ̈ዝ ጌን ኖ̈ኒን ቃቻ̈ፔ” ማ “ኦ̈ዝ ኣሳቦ ዳሞ̈ዛ ኮሺ̇̈ሬ” ጌይኔ። 19 ናምኢ ዎይ ዓይዚ̇ ኣሲ ማርኪታ̈ካ̇ይ ኣቴ̇ጌይንዶ ዎ̈ሳ ኬ̈ ጪጛሻ ጋልዳ ሺ̈ቂኖ ሞታ ኪን ጌያ ኤካፔ። 20 ሜላን ኢ̈ጫ̇ምፔ̈ኒ ና̈ጋራ ኦ̈ኖ ኣሳን ኣስ ዎይ ቲ̈ን ጎይላቤ። 21 ኔ̈ኒ ኦ̈ዝ ባዝ ዎይባራ ፔታ̈ናዳ ፔታ̈ናፖ ሺሻር ቤኣካ̇ይዶራ ዓና̇ ቴ ኔ̈ብ ኢሚ̇ኖ ዞሪን ዎይ ኦ̈ሳ ጋልዳ ፌ̈ሻ̇ምፔ̈ኒ ጾ̈ሳ̇ ቲ̈ን፣ ዬሱ̈ስ ክርስቶ̈ሳ ቲ̈ንኬ ማ ማራ̇ጺንቲ̇ኖ ኪ̈ታንቻ̈ን ቲ̈ን ቴ ኔ̈ቦ ዓዳ̈ራ ጋ̈ሬ። 22 ኦ ጋልዳካር ማ̈ቂ̇ን ኔ ኩ̈ሽ ጋ̈ዳራ ሹ̈ማንዳ̈ቦ ባርቢታ̇ፔ፤ ኔ ኔ̈ና ጌ̈ሺ̇ቲባር ና̈ጋብዶኬ ሜ̈ላን ናጋሪን ጋርታ̇ ጌላፔ። 23 ኔ ጋርታ ኔ̈ና ማሳዚምቤኬ ዎይ ጋ̈ላስ ዲንዳር ኔ̈ና ዋ̈ዪዝ ዓርጊምቦ ዎይና ጃ ጊላ̇ ኡሽካ̇ብዶኬ ዓኒ̇ፖ ጌዳ ዋ̈ ሙታ̇ ኡሽካፔ̇። 24 ፔቲ̇ ፔቲ̇ ኣሳን ናጋሪንዳ ፋላ̇ ጋልዳ ቤንታ̇ር ኤሪንቲ̇ዛኮታ̇ቦ ኢንታ ጋልዳ ዬላ̇ዝ ፊርዲንዳ ኣብዝኮ ቲ̈ኒታር ኤሪንታ̇̈ሬ ማ ሜላ ኣሳን ኦ̈ዝ ናጋሪንዳ ጋምኣር ቤንታ̇̈ሬ። 25 ዪና̇ ኢዝፌ̈ኒ ኮሽ ኦ̈ሳር ማ̈ቂ̇ን ፋላ̇ ጋልዳ ቤንቲ̇̈ሬ፤ ኣቺ̈ንታር ዎ ባዚ ዎካሬ ጌ̈ሚቲኖንዲፌ̈ን ኣታ̇ባሴ። |