1 ታሳ 4 - ኦራ ጫ̈ቃ ማጻ̈ፋጾ̈ሳ̇ ኡፋይሲ̇ዝ ዶኢ 1 ዪዚ ቴ ኢሺታ̇ን! ጾ̈ሳ̇ ኡ̈ፋይሳ̇ር ዶኣዝ ጎይን ዪንቲ ኑ ጋልዳፖ ታማ̈ሪኔ፤ ዓታ̇ር ዪንቲ ዪና̇ ኢዝፌ̈ን ዶኢሙታ̇ ዎ፤ ኑ ዓት ጎዳ ዬሱ̈ስ ክርስቶ̈ሳ ሱምባራ ዪንታ̇ ጌሻዚንዲኬ ዪንታ̇ ዞራዚንዳ ዪንቲ̇ ዓኒ̇ፖ ቲ̈ን ኦ̈ዚምፖ ሺሻር ኦ̈ምፔ̈ኔ። 2 ጎዳ ዬሱ̈ስ ክርስቶ̈ሳ ሱምባራ ዎኒ̇ፌ̈ኖ ኪ̈ታ ኑ ዪንታ̇ቦ ኢሚ̇ኖኮ ዪንቲ̇ ኤሪ̈ር። 3 ጾ̈ሳ̇ ዪንታ̇ ጋልዳፖ̇ ኮያዚንዳ ዪንቲ ጌሺ̇ቲባር ዶኣምፔ̈ንኬ ኦሎላ ጋልዳፖ ጎታ̇ምፔ̈ኔ። 4 ኣሲ ዎይ ፌ̈ ጋሊ̇ንዶ ጌ̈ሺቲባርኬ ቦንችባር ና̈ጋዚን ኤሮጋ̈ቤ። 5 ጾ̈ሳ̇ ኤሪባ̈ሶ ኣሳንፌ̈ኒ ኦሎላብ ኢና̇ ኢንታ̇ብ ዶኣፖጋ̈ቤ። 6 ዪኒፌ̈ኖ ባዝባራ ኦ̈ናካር ማ̈ቂ̇ን ፌ ኢሻ ጋልዳ ዎይ ፌ ሚሺን ጋልዳ ኢ̈ት ኦ̈ፖጋ̈ቤ፤ ዓኒ̇ፖ ቲ̈ን ኑ ዪንታ̇ብ ሶ̈ሊኖንዲፌ̈ኒ ዪ̈ዲፌ̈ኖ ባዝ ኦ̈ዝ ኣሳን ጾ̈ሲ ኢንታ̇ ጋልዳ ፊርዲ̈ሬ። 7 ጾ̈ሲ ኑ̈ና ጼይጊ̈ኖዲ ኑ̈ኒ ጌ̈ሺቲባር ዶኣንፔ̈ንዶኬ ና̈ጋራ ኦ̈ሙታ ዶኣምፔ̈ን ጊዳካ̇ዬ። 8 ዪ̈ኮታ̇ቦ ዞሪን ዪኖ̇ ኢጺ̇ዝ ኣሳን ዪንታ̇ቦ ጌ̈ሻ̇ ኣያ̇ና ኢሚ̇ኖ ጾ̈ሳ̇ ኢጺ̇ንዶኬ ኣስ ኢጻ̇ካ̇ዬ። 9 ዎልዎልኣ ካንታዚን ጎይ ዪንቲ̇ ጾ̈ሳ̇̇ ጋልዳፖ ታማ̈ሪኖኮታ̇ቦ ባዚን ዪኒ̇ ጎይ ኦ̈ናካር ዪንታ̇ብ ጻ̈ፋንዳብ ኮሺ̇ባ̈ሴ። 10 ዪንቲ ማ̈ቂዶ̈ና ጋዳ̇ ዎ ኣሳን ዎይ ካሬ፤ ዎቲናካር ቴ ኢሺንታ̇ን! ኑ ዓት ዪንታ̇ ዞራዚንዳ ቲ̈ኖምፖ̇ ኣ̈ሪ ዪንቲ̇ ኢንታ̇ ካምፔ̈ኔ። 11 ዓኒ̇ፖ ቲ̈ን ኑ ዪንታ̇ ኪ̈ቲ̇ኖንዲፌ̈ኒ ኣስ ሜላ ዋ̈ዪካይዶር ዚምጋ̈ር ዶኣንዳብ ኮዪብቴ፤ ዪንታ̇ ጌልሲባ̈ሶ ባዝ ጋርታ ጌላፒ̇ቴ፥ ማ ዪንታ̇ ኩሽ ጌ̈ቲምባር ኦ̈ር ሙብቴ፤ 12 ዪንቲ̇ ዪኖ̇ ዎቴጌይንዶ ኣማ̇ናካ̇ዮ ኣሳን ቲ̈ን ቦንቺንቲ̇ኖ ኣስ ማ̈ቂ̇̈ሬ፤ ኣሳ ኩሽ ቤቂ ዶኢባ̈ሴ። ጎ̈ዳ ዬሱ̈ሳ ዬንት 13 ቴ ኢሺንታ̇ን! ታስፋ ኢንታ̇ብ ባዮ̇ ኣሳንፌ̈ኒ ዬ̈ኪ̇ ሙ̈ዲዳካ̇ይፌ̈ኒ ዓይቂ̇ኖ ኣሳን ባዚን ኪንን ዪንቲ ኤራምፔ̈ን ቴ ኮያ̈ሬ። 14 ዬሱሲ ዓይቂ̇ኖንዲኬ ማ ዓይቃ ጋርታፖ̇ ዲንዲኖን ኑ ኣማ̇ኒ̈ሬ፤ ዪዚ ዪ̈ኮታ̇ቦ ጾ̈ሳ̇̇̈ዲ ዬሱ̈ሳ ኣማ̇ናሪ ዓይቂ̈ኖ ኣሳን ኢንታ ዪኒ̇ፌ̈ኒ ዬሱ̈ሳባር ዎልኣ ኤሄይሬ። 15 ኑ̈ኒ ጾ̈ሳ̇̇ ጋልዳፖ̇ ሲስኪ̇ኖን ዪንታ̇ቦ ሶ̈ላዚንዳ ዓኖ፦ ጎ̈ዳ ዬይዚ ዲራስ ዓይቃካ̇ይ ሼምፓ̇ባር ዎን ኑ̈ኒ ዓይቂ̇ኖ ኣሳንፖ ቲ̈ኒቲባ̈ሴ። 16 ጎዳ̈ዲ ጴች ኪ̈ታባራ፤ ኪ̈ታንቻን ኣላቃ ጊርስባርኬ ጾ̈ሳ̇ ሞይዛ ጊርሳባር ኣጃቢንታ̇ሪ ኣፋፖ ሶ̈ቢ̈ሬ፤ ክርስቶ̈ሳ ኣማ̇ናር ዓይቂ̇ኖ ኣሳን ቲ̈ኒታ̈ር ዲንዲ̈ሬ። 17 ኢናፖ ዎሃ ኑ ዓይቃካ̇ይ ሼምፓባር ዎን ኣፋ ኣይጊ ጋልዳ ጎዳ ዬላ̇ንዳ̇ቦ ፉዳ ሉኪ̇̈ሬ፤ ዪዚ ሜናቦ ጎዳባር ዶኢ̈ሬ። 18 ዪ̈ኮታ̇ቦ ዪና̇ ቃ̈ሊንባራ ዎልዎልኣ ሚ̈ጚንቲ̇ብቴ። |