1 ጴጥ 4 - ኦራ ጫ̈ቃ ማጻ̈ፋጌ̈ሺ̇ቲባራ ዶኢ 1 ዪዚ ክርስቶ̈ሲ ፌ ኣሲቲንባራ ሜታ ኤኪ̇ኖኮታ̇ቦ ዪንታ̇ሬ ኦላ ማሳ̇̈ራ ጊጺ̇ኖ ኣስፌ̈ኒ ዪና̇ ቆፊን ጊጻ̇ሪ ዲንዲብቴ፤ ኣባ ጌይን ፌ ኣሲቲንባር ሜታ ኤኪ̇ዝ ኣሲ ናጋራ ኦ̈ሳ ኣሺ̇ኔ። 2 ዪ̈ ና̈ሳ̈ዲ ዓኒ̇ፖ ጌዳ ፌ ዶኣዝ ላይን ጋርታ̇ ጾ̈ሳ̇ ኡፋይሳ̇ንዳብዶኬ ፌ ኢ̈ታ ኢኒ̇ን ኩምንዳብ ዶኢባ̈ሴ። 3 ጾ̈ሳ̇̇ ኤሪባ̈ሶ ኣሳን ዎታዚንዲፌ̈ኒ ኣሲቲ ኢ̈ታ ኢኒ̇ን ኩምሙታ፣ ማሲቲሙታ፣ ዎልኣ ሺ̈ቃር ኡሽኪ̇ ማሲታሪ ዶጚ ዬጺ̇ሙታ̇፣ ማቃ ጾ̈ሳ̇̇ብ ጎይኒሙታ ኣ̈ኖ ቲ̈ኖ ኬሊ̇ን ዪንታ̇ብ ጊዶጋ̈ቤ። 4 ዎቲናካር ዓት ዪን ፋባ̈ሶ ኢ̈ታ ባዛን ኢንታ̇ባር ዎልኣ ኦ̈ባ̈ሶኮታ̇ቦ ጋራ̇ሚንቲ̇̈ሬ፥ ማ ዪንታ̇ ቆ̈̈ሬ። 5 ዎቲናካሬ ኢንቲ̇ ሼምፓባሮን ጋልዳኬ ዓይቂ̇ኖን ጋልዳ ፊርዳ̇ንዳብ ጊ̈ጊንቲ̇ኖ ኢ̈ቦ ማ̈ልሳ ኢሚ̈̇ሬ። 6 ዪዚ ዓይቂ̈̇ኖ ኣሳንባር ኣታካ̇ይዶን ዎጛላ ሳባ̇ኪንቲ̇ኖንዳ ዓኒ̇ኮታ̇ቦ፤ ዪዚ ኢንታ ኣሲቲንባራ ኣሳ ጋ̈ልዳ ዬላ̇ዝ ፊርዲን ዎይ ኢንታ̇ ጋልዳ ዬላ̇̈ሬ፤ ዎቲናካሬ ኣያ̇ናባራ ጾ̈ሳ̇ ዶኣዚንዲፌ̈ኒ ሼምፓባር ዶኢ̈ሬ። 7 ዪዚ ዎይ ባዛብ ውርሲን ዬሊ̇ኔ፤ ዪንቲ ሚ̈ጛሪ ዎ̈ሳ̇ንዳብ ዳንዳኣምፔ̈ኒ ኮሺንቺ ቆፒ̇ዝ ቡ̈ዳ ዪንታ̇ብ ዶኦጋ̈ቤ፤ ማ ዪንቲ̇ ዪንታ̇ብ ኮሻ̇ዚንዲፌ̈ን ዶኢብቴ̇። 8 ካን ዎይሊን ናጋራ ካጚዛኮታቦ ዎይ ባዛፖ ሺ ዎልዎልኣ ሚ̈ጛር ካንቲ̇ብቴ። 9 ጉንዱማካ̇ይዶሪ ዎልዎልኣ ዛቃ̇ፌ̈ኒ ሞኪ̇ብቴ። 10 ጾ̈ሳ̇ ጋልዳፖ ዪንታ̇ብ ኢሚንቲ̇ኖ ዱማ ዱማ ኪልሳን ኮሽ̇ ጎይባራ ኦ̈ሳ ጋልዳ ፌ̈ሺሙታ ዪንቲ̇ ዎይን ዪንታ̇ብ ኢሚ̇ንቲ̇ኖ ኪልሲንባራ ሜላን ማ̈ዲ̇ብቴ። 11 ታ̈ማርሲዝ ኣሲ ኢ ጾ̈ሳ̇ ቃ̈ሊን ታማ̈ርሳዚን ቆፓ̇ር ታ̈ማ̈ርሶጋ̈ቤ፤ ኦ̈ ማ̈ዲዛ̈ዳሬ ጾ̈ሲ ኢቦ ኢሚ̇ኖ ዎልቃባር ኦ̈ጋ̈ቤ፤ ዪዚ ዪኒ̇ባራ ጾ̈ሳ̇̇̈ዲ ዬሱ̈ስ ክርስቶ̈ሳ ጎይባራ ባዝ ዎይባራ ጋላቲንቲ̈̇ሬ፤ ቦንችኬ ዎልቃኬ ሜናብ ኢ̈ብ ማ̈ቆ̇! ኣሚንኤ። ሜታ ጋርታ̇ ጋርዢ 12 ቴ ላጋ̇ን! ታማፌ̈ኖ ጴች ሜታ ዪንታ̇ ዬሌ̇ጌይን ኦራ̈ ባዝፌ̈ን ማሃሪ ጋራ̇ሚንታፒ̇ቴ። 13 ዎቲናካ̈ር ክርስቶ̈ሳ ቦ̈ንቺ̈ን ቤንታ̇ዝ ጋላስ̇ ዪንቲ̇ ዎይሊን ኡፋይታምፔ̈ኒ ክርስቶ̈ሳ ኤኪ̇ኖ ሜቲን ኤኪ̇ኖኮታ̇ቦ ኡፋይቲ̇ብቴ̇። 14 ዪንቲ ክር̇ስቶ̈ሳ ሱምንኮታ̇ቦ ቆ̈ሲንቴጌይንዶ ቦንች ኣያ̇ና ዪ̈ዳሬ ጾ̈ሳ̇̇ ኣያ̇ና̈ዲ ዪንታ̇ ጋልዳ ሼምፒ̇ዛኮታቦ ኡፋይቲ̇ብቴ። 15 ዪንታ ጊዳ̇ ኦ̈ናካር ማ̈ቂ̇ን ሼምፓ ዎሪ፣ ዉ̈ቃ̇ሪ፣ ኢ̈ታ ባዝ ኦ̈ሪ ማ ኢያ ጌልሲባ̈ሶ ባዝ ጋርታ̇ ጌላሪ ሜታ ኤኪ̇ዝ ኣስ ማ̈ቃፖ̇ጋ̈ቤ። 16 ኢ ክርስቶ̈ሳ ኣማ̇ኒኖኮታ̇ቦ ሜ̈ታ ኢያ ዬሊ̇ኖ ኣሲ ዎኮ ዪ ና̈ሳ ክርስቶ̈ሳ ሱ̈ምን ቶ̈ኪ̇ኖ ኣስ ማ̈ቂ̇ኖኮታ̇ቦ ጾ̈ሳ̇ ጋ̈ላቶጋ̈ቤዶኬ ዬ̈ልቃፖ̇። 17 ፊርዳ ዬይዝ ቃሚ̇ ኡኪ̇ኔ፤ ዓና ፊርዲን ጾ̈ሳ̇ ኣማ̇ኒዝ ኣሳን ጋልዳ ቲ̈ኒታር ዣማ̇ራ̈ሬ። ዪዚ ፊርዲን ዣማ̇ራዚንዳ ኑ ጋልዳኮ ጾ̈ሳ̇̇ ዎጛላብ ኪ̈ቲንቲ̇ባ̈ሶ ኣሳን ዉርሲንዳ ኣ ማ̈ቃ̇ርዶኔ? 18 ጌ̈ሻ ማጻ̈ፋ ጋልዳ፦ “ጺላ̇ ኣሲ ሜታባር ፋጺ̈ርኮ ጾ̈ሳ̇̇̈ቦ ጎሽቲባ̈ሶ ናጋራንቺ̇ ኢንታ̇ ባዚን ኣ ማ̈ቃ̇̈ንዶኔ?” ጌይሬ። 19 ዪ̈ኮታ̇ቦ ጾ̈ሳ̇ ቆፊንዲፌ̈ኒ ሜታ ኤኪ̇ዝ ኣሳን ፌ ኣሲቲን ዎይ ኣማ̇ኒንቲ̇ኖ ዎይ ኮቺ̇ኖ ጾ̈ሳ̇̇̈ቦ ዓዳራ ኢማ̇ሪ ኮሽ ባዝ ኦ̈ዚን ኣሻ̇ፖጋ̈ቤ። |