1 ጴጥ 3 - ኦራ ጫ̈ቃ ማጻ̈ፋኣስኒኬ ማቺ̇ክ ዎል ዎዛርፌ̈ን ዶኢ̈ርኮ 1 ዪዚ ዪንቲ ማጫ̇ን! ዪንታ ኣሲኒንታ̇ንቦ ኪ̈ቲንቲ̇ብቴ፤ ኣሲኒንታ̇ን ጋርታ ጾ̈ሳ̇ ቃ̈ሊን ኣማ̇ኒባ̈ሶን ዎኮ ጾ̈ሳ ቃ̈ሊን ሲስካካ̇ይዶር ፌ ማጫ̇ን ኮሽ̇ ጻባዪምባር ሙታ̇ ጾ̈ሳ̇̇̈ክ ሺ̈ቃንዳብ ዳንዳኢ̈ሬ። 2 ዪና̇ ማ̈ቃ̇ዚንዳ ዪንቲ̇ ጌ̈ሺ̇ቲባር ዬ ኣስ ቦንቺ̇ ዎታዚን ቤቃ̇ሪዬ። 3 ዪንቲ ዪንታ̇ ቆም ዳዲ̇፣ ዎርቃ ኣ̈፣ ኮሽ ኣፊላ ማኢ ዛ̈ና ኣሳብ ቤንቲ̇ዝ ባዝባር ጊዳካ̇ይዶን፤ 4 ዪንታ̇ ቆይሲንዳ ጾ̈ሳ̇ ቲ̈ን ጴች ቦንቺንቲ̇ኖ ዎይ ጋላስ ዪባ̈ሶ ጌ̈ጻንባር ማ̈ቆ̇ጋ̈ቤ። ዪንሬ ኣሽካ ማ̈ቃር ዶኢዛ̈ዲኬ ጻባያባር ዶልቆቃ ማ̈ቃ̇ር ዶኢዛ ቡ̈ዳ ጋርቶ ቆይሲ። 5 ፌ ታስፊን ጾ̈ሳ̇ ጋልዳ̇ ጋዲ̇ኖ ሚኖ ጌ̈ሻ̇ ማጫ̇ን ፌ̈ና ጌዚን ቆይሲሲኖ̈ዲ ዪንፌ̈ኖ ባዛንባራ፤ ኢንታ̇ሬ ኣስኒንታ̇ንቦ ኪ̈ቲንቲ̇ኔ። 6 ሳ̈ራ ፌ ኣስና ኣብራሃማኮ “ላ̈” ጌ̈ያሙታ̇ ኪ̈ቲንቲ̇ኔ፤ ዪንታ̇ር ኣባካር ኢ̈ጫካ̇ይ ዪና̇ ኢፌ̈ኒ ዎቲኖኮ ኢዝ ናኤ። 7 ኣስኒንታ̇ን! ዪንታ̇ ማጫ̇ንባር ኮሽ ቆፊባር ዶኢብቴ̇፤ ማጫን ዪንታ̇ፌ̈ን ሚ̈ን ባዮ̇ኮታ̇ብኬ ኢንቲ̇ ሼምፓ ኣንጂንዶ ዪንታ̇ባር ዎልኣ ኤኪ̇ዛኮታቦ ዪንቲ ኢንታ ቦንቺ̇ብቴ፤ ዪንቲ̇ ዪኒፌ̈ን ዎቴጌይን ዪንታ̇ ዎ̈ሲን ጾ̈ሳ̇̇ ዋይታ̇ ኣ̈ካ̇ይፌ̈ን ካዪዝ ባዚ ዶኢባ̈ሴ። ኮሽ ኦ̈ር ሜታ ኤኪ 8 ዪዚ ውርሲ ጋልዳ ቴ ጋ̈ዚንዳ፥ ዪንቲ̇ ዎልዎልኣ ፔቲ̇ ቆፊባር ዶኢብቴ፤ ና̈ሳ ሜላ̈ኮ ሜቲ̇ን ዪንታ̇ ሜታፌ̈ን ማሃር ቤቂ̇ብቴ። ዎልኣ ኢሺክ ጌ̈ዲክፌ̈ን ማ̈ቃ̇ር ዶኢብቴ። ማ ኣሳብ ሚጪንቲ̇ዛንኬ ዪንታ̇ ዪርክ ዪርክ ዎቲዛን ማ̈ቂ̇ብቴ። 9 ዪንታ̇ብ ኢ̈ት ኦ̈ኖ̈ቦ ኢ̈ት ኦ̈ ማሃፒ̇ቴ ዪንታ̇ ቆ̈ኖ̈ዳ ቆ̈ ማሃፒ̇ቴ ዪኒ̇ፖ ኢያ ኣንጂብቴ። ዪንቲ ጼይጊንቲ̇ኖንዳ ዪኒፌ̈ን ኦ̈ሪ ኣንጃ̇ ዲጛ̈ምፔ̈ኒዬ። 10 ጌ̈ሻ̇ ማጻ̈ፋ ጋልዳ፦ “ሼምፓ̇ባር ዶኣንዳ̇ብኬ ኮሽ̇ ቃማ̇ን ቤቃ̇ንዳቦ ኮይዛ̈ዲ፥ ኢ ኖ̈ኒን ኢ̈ታ ባዝ ሶ̈ላካ̇ይፌ̈ኒ፥ ኢ ኢርጺንን ዉ̈ጫ ባዝ ሶ̈ላካ̇ይፌ̈ኒ ካዮጋ̈ቤ። 11 ኢ̈ት ባ̈ዝ ጋልዳፖ̇ ጎቶ̇፤ ኮሽ ባዝ ኦ̈ጋ̈ቤ፤ ሳሪቲ ኮዮ፤ ሳሪቲ ዎሂን ዬጋ̈ቤ፤ 12 ጎዳ ኣ̈ፊንዳ፤ ጺል̇ ኣሳን ቤቃ̈̇ሬ፤ ኢ ዋ̈ይን ኢንታ ዎ̈ሲን ሲስካ̇ንዳ̇ቦ ፊርቂ̈ንታ̇ር ዎ፤ ዎቲናካር ኢ̈ት ኦ̈ዝ ኣሳን ጋ̈ልዳ ጾ̈ሳ̇ ፊርዳ ዬይሬ” ጌይ ጻ̈ፊንቲ̇ኔ። 13 ዪንቲ ኮሻ̇ ባዝ ኦ̈ንዳ̇ቦ ሚ̈ጚንቴጌይንዶ ሜታ ዪንታ̇ ጋልዳ ኤሄይዛ ኦ̈ኖ? 14 ዪንቲ ኮሻ̇ ባዝ ኦ̈ር ሜታ ኤኪ̇ዝባዝ ማ̈ቄ̇ጌይንዶ ዪንቲ̇ ኣንጃ ዲጚ̈ሬ፤ ኣስ ኢ̈ሺቻ̇ብ ኢ̈ጫፒ̇ቴ፤ ኤ̈ዝጋፒ̇ቴ። 15 ክርስቶ̈ሳ ዪንታ̇ ቡ̈ዲንባር ቦንቺ̇ብቴ፤ ዪንታ̇ ሼምፒ̇ምቦ ኢያ ጎድ ማሂብቴ፤ ዪንታ̇ቦ ዎ ታስፊን ጎይ ዪንታ̇ ኦይጪ̇ዝ ኣሳን ዎይንቦ ማልሳ ኢማ̇ንዳቦ ዎይ ጋላስ ጊ̈ጊንቲ̇ኖን ማ̈ቂ̇ብቴ። 16 ዪንቲ ማልሳ ማሂ̈ርዶሪ ኣስ ቦንቺሙታ̇ኬ ኣሽኪቲባር ማሂብቴ፤ ዪንቲ ክርስ̇ቶ̈ሳይ ማ̈ቂ̇ኖኮታ̇ቦ ዪንታ̇ብ ዎ ኮሻ̇ ጻባዪን ኢ̈ት ማይጺሲ ሶ̈ሊዝ ኣሳን ፌ ኢ̈ታ ሶ̈ሊንባራ ዬ̈ልቃምፔ̈ኒ ዪንታ̇ቦ ኮሻ̇ ቆፊ ዶኦጋ̈ቤ። 17 ጾ̈ሳ̇ ኮያዚን ዓኒ̇ኮ፥ ዪንቲ ኢ̈ታ ኦ̈ሳ ኦ̈ር ሜታ ኤካ̇ናፖ ኮሻ̇ ባዝ ኦ̈ር ሜ̈ታ ኤኪ̇̈ርኮ ዪንታ̇ብ ኮሼ̇። 18 ክርስቶ̈ሲ ኑ̈ና ጾ̈ሳ̇̇̈ባር ኢጊንንዳቦ ኢ ፌቆሚ̇ን ጺ̈ላ̇̈ዶ̈ሪ ጺላ̇ ባዮ̇ን ኑ ናጋራ ጊሻ̇ቦ ናምኢባ̈ሶ ጎይባራ ሜታ ኤካ̇ሪ ፔቲ̇ ቶህ ዓይቂ̇ዴ፤ ኢ ኣይሽባር ዓይቂ̇ዴ ኣያ̇ናባራ ሼምፓባር ዎ። 19 ዪ ኣያ̇ናባራ ቃ̇ሺ ኣል ዎ ሼምፓንቦ ሳባ̇ኪ̇ዴ። 20 ዪን ቃሺ ኣ̈ል ዎ ኣሳን ሚ̈ን ኖ̈ሂ ማርካባ ኮ̈ቺ̇ዝ ኬል̇ባራ ጾ̈ሳ̇ ኢንቲ̇ ማ̈ቃ̇ንዳዶ̈ኔ ጋ̈ሪ ዳንዳኣባር ና̈ጊሙታ̇ ዎምባራ ኢ̈ብ ኪ̈ቲንታ̇ብዳ ጌዪ ኢጺ̇ኖ ኣሳን። ዪና̇ ማርካቢን ጋርታ ጌላሪ ዋ̈ንባ̇ር ፋጺኖን ላማካይ ኣስ ሙታ። 21 ዪና̈ ዋ̈ሲ̇ንዳ ዓት ዪንታ̇ ፋዚን ጺ̈ንቃ̇ታ ሚሳ̇̈ሊንዶ፤ ዪና̇ ጺንቃ̇ቲንዳ ኣሳ ጋልዶ ቃት ጌ̈ሻዚን ጊዳካ̇ይዶን ኮሽ ቆፊ ዲጛንዳቦ ጾ̈ሳ̇̇̈ቦ ሺ̈ቂዝ ዎ̈ሳ። ዪና ዪንታ̇ ፋዚንዳሬ ዬሱ̈ስ ክርስቶ̈ሳ ዲንዲን ጎይባራ። 22 ኢያሬ ኣፋ ሉካ̇ሪ ጾ̈ሳ̇ ባ̈ባ̈ቦ ኡሻች ጎይ ዎ፤ ኪታ̈ንቻን፥ ሲ̈ልጣናባሮንኬ ዎልቃባሮን ዎይ ኢ̈ቦ ኪ̈ቲንቲ̇ኔ። |