1 ጴጥ 1 - ኦራ ጫ̈ቃ ማጻ̈ፋ

^1-2 ጳንጦ̈ሳ ጋዳ̇፣ ጋላ̈ታ ጋዳ̇፣ ቃጳዶ̈ቃ ጋዳ̇፣ ኢ̈ሳ ጋዳ̇ኬ ቢታ̈ና ጋዳ̇ ላ̈ሊንታ̇ር ቤት ማ̈ቃር ዎ፤ ጾ̈ሳ̇ ባ̈ባ̈ ቲ̈ኒታር ቆፒ̇ኖንዲፌ̈ኒ ማራ̇ጺንቲ̇ኖንኬ ዬሱ̈ስ ክርስቶ̈ሳብ ኪ̈ቲንታ̇ምፔ̈ኒ ኢ ሱ̈ባር ሜ̈ጪንታር ጌ̈ሻ̇ ኣያ̇ናባር ጌዥጊ̇ኖን! ጎዳ ካንዲኬ ሳሪቲ ዪንታ̇ብ ዎይሎ ጌያሙታ ዬሱ̈ስ ክርስቶ̈ሳብ ሃዋ̈ራ ማ̈ቂ̇ኖ ቴ ጴጥሮ̈ሲ ዓና̇ ኪ̈ቲን ዪንታ̇ብ ሚሺኔ።

ሜናብ ዪባ̈ሶ ታስፋ

³ ዬሱ̈ስ ክርስቶ̈ሲ ዓይቃ ጋርታ̇ፖ ዲንዲ̇ኖ ጎይባራ ዪባ̈ሶ ታስፋ ኑ̈ብ ኢሚ̇ኖ፥ ጴች ማ̈ቂ̇ኖ ፌ ማ̈ሪቲንባራ ኑ̈ና ኦራ ዬላር ፌ ናእ ማ̈ሲኖ፥ ኑ ጎዳ ዬሱ̈ስ ክርስቶ̈ሳብ ባ̈ባ ማ̈ቂ̇ኖ ጾ̈ሳ̇̇̈ቦ ጋላቲ ዬሎ̇።

⁴ ኢያሬ ዪባ̈ሶ፥ ኢ̈ቲባ̈ሶ፥ ጪጚባ̈ሶ ኢሪስታ ኣፋ ዪንታ̇ብ ጊ̈ጊሲኔ።

⁵ ዪንታ̇ሬ ዉ̈ርሲ ቃሚ̇ንባር ቤንታ̇ዝ ፋቲምቦ ኣማ̇ና ጎይባራ ጾ̈ሳ̇ ዎልቃ̈ባር ና̈ጊንቲ̇ኔ።

⁶ ዓት ዱማ ዱማ ሜታን ጊሊ̇ ጊዛቦ ዪንታ̇ ዬሊ̇ናካሬ ዪንታ̇ብ ዎ ታስፊንባር ኡፋይቲ̇ብቴ።

⁷ ዪኒ̇ፌ̈ኖ ፋታና ዪንታ̇ ዬላ̇ዚንዳ ዪንታ̇ ኣማ̇ኒን ኪን ማ̈ቂ̇ኖን ኤራንዳቦ፤ ሜላ ኣቲ̇ን ዪዝ ዎርቆ ዎርቃ ማ̈ቂ̇ኖን ኤሪንታ̇ዚንዳ ታማባር ባያ̇? ዎርቃ̇ፖ ሺዝ ዪንታ̇ ኣማ̇ኒንዳ ዪና̇ ኢዝፌ̈ኒ ፋታ̇ኒንታ̇ንዳብ ኮሻ̇̈ሬ፤ ዪና̇ ፋታ̇ኒንቲ̇ኖ ዪንታ̇ ኣማ̇ኒንኮታ̇ ዬሱ̈ስ ክርስቶ̈ሲ ዬይዝ ጋላስ ዪንቲ̇ ኣንጃኬ ቦ̈ንችኬ ዲጚ̈ሬ።

⁸ ዪንቲ̇ ዬሱ̈ስ ክርስቶ̈ሳ ኣ̈ፍባር ቤቃካ̇ዮ ኣስ ማ̈ቂ̇ናካሬ ኢያ ካሬ፤ ዓት ዪንቲ̇ ቤቃካ̇ይ ማ̈ቂ̇ናካሬ ኢያ ኣማ̇ኒ̈ሬ፤ ኣሲ ኖ̈ናባር ሶ̈ላር ዳንዳኢባ̈ሶ ጴች ኡፋይስባር ኡፋይቲ̇̈ሬ።

⁹ ዪንቲ ኣማ̇ኒኖኮታ̇ ና̈ጊሙታ ዎ ዪንታ̇ ሼምፒ̇ን ፋቲን ዪንቲ̇ ዲጚ̈ሬ።

¹⁰ ዪንታ̇ብ ኢሚ̇ንታዝ ጾ̈ሳ̇ ኮሺቲን ጎይ ካ̈ዪኖ ናባን ዓና̇ ፋቲን ጎይ ዎይሊን ቆፒ ቢሪን ቤቂ̇ኔ።

¹¹ ዪን ናባን ጋርታ ዎ ክርስቶ̈ሳ ኣያ̇ናዲ ክርስቶ̈ሳ ጋልዳ ዬላ̇ዝ ሜቲንዲኬ ዪና̇ ሜቲንፖ ዎሃ ኢ ዲጛዝ ቦንቺ̇ን ቲ̈ኒታር ሶ̈ሊኔ፤ ኢንታ̇ር ዪ ዎይ ኣ ኬል̇ ማ̈ቂ̇̈ርኮ ዎዛርታር ማ̈ቂ̇̈ርኮ ዎይሊን ቆፓ̇ር ቢሪን ቤቂ̇ኔ።

¹² ዪን ናባን ዪኖ̇ ሶ̈ሊኖንዳ ዪንታ̇ብዶኬ ኢንታ ኬሊ̇ንባር ማ̈ቃ̇ባሶን ኢንታ̇ብ ኤሪንቲ̇ኔ፤ ኢንቲ̇ ሶ̈ሊኖንዳ ኣፋፖ ዬይኖ ጌ̈ሻ̇ ኣያ̇ና ጎይባራ ዓት ዪንታ̇ብ ዎጛላ ሳባኪ̇ኖ ኣሳን ሶ̈ሊኖን ኢዞ ሚን ሶ̈ሊኔ፤ ባዚን ዪኖ̇ ኣፎ ኪ̈ታንቻ̇ንር ቤቃ̇ንዳብ ኢኒ̇ቲ̈ሬ።

ጌ̈ሺ̇ቲባር ዶኢ

¹³ ዪ̈ኮታ̇ቦ ዪንታ̇ ቡዲን ኦ̈ሳብ ጊ̈ጊብቴ፤ ኢ̈ት ባዝ ጋልዳፖ ዪንቲ̇ ዪንታ̇ ና̈ጊብቴ፤ ዬሱ̈ስ ክርስቶ̈ሲ ዬይዝ ጋላስ̇ ዲጛዝ ኣንጂንቦ ኩም ታስፋ ዪንታ̇ብ ዶኦጋ̈ቤ።

¹⁴ ዪንቲ ኪ̈ቲንቲ̇ዝ ናእ ማ̈ቂ̇ብቴ፤ ሚን ኤራካ̇ዮ ኬሊ̇ን ጋርታ ዪንታ̇ቦ ዎ ኢ̈ታ ኢኒ̇ን ኦ̈ንዳብ ጋስ ማ̈ቃፒ̇̇̇ቴ።

¹⁵ ዪንታ̇ ጼይጊኖ ጾ̈ሳ̇ ጌ̈ሽ̇ ማ̈ቂ̇ኖንዲፌ̈ኒ ዪንታ̇̈ሬ ዪንታ̇ ዶኢንባራ ዎይ ጌ̈ሽ̇ ኣስ ማ̈ቂ̇ብቴ፤

¹⁶ “ታ̈ኒ ጌ̈ሽ̇ ማ̈ቂ̇ኖኮታ̇ቦ ዪንታ̇ር ጌ̈ሽ̇ ማ̈ቂ̇ብቴ” ጋ̈ር ጻ̈ፊንቲ̇ኔ።

¹⁷ ኦ̈ናካር ሾኪ̇ ዪርኪ̇ ዎታካ̇ይ ዎይንቦ ኢንታ ኦ̈ሲንዲፌ̈ን ኢሚ̇ዝ ጾ̈ሳ̇ “ኑ ባ̈ባ” ጌይ ጼይጊ̈ርኮ ዓኒ̇ ኣላሚን ጋ̈ልዳ ዛቃ̇ኬ ቤት ማ̈ቃ̇ሪ ዶኢ̈ርዶሪ ኢ̈ብ ኢ̈ጫ̇ር ዶኢብቴ።

¹⁸ ዪንቲ ዪንታ̇ ባ̈ቢንታ̇ን ጋልዳፖ ኤኪ̇ኖ ፋባሶ ዶኢን ጋልዳፖ ጾ̈ሲ ዪንታ̇ ፋኖንዳ ዪዝ ዎርቃባርኬ ቢራባር ጊዳካ̇ዮን ዪንቲ̇ ኤሪ̈ሬ።

¹⁹ ዪንታ̇ ፋንዳ̇ብ ጪጊንቲ̇ኖንዳ ኢ ጋልዳ ማዛ ባዮ̇ ጌ̈ሽ̇ ማ̈ቂ̇ኖ ዶሪ ማ̈ቂ̇ኖ ቦንቺንቲ̇ኖ ዬሱ̈ሳ ሱ̈ንዶ።

²⁰ ኢ ዪኒ̇ብ ማራ̇ጺንቲ̇ኖንዳ ኣላሚን ዓና̇ ኮቺንታ̇ናፖ ቲ̈ኔ፤ ዓት ዉርሲ ኬሊ̇ን ጋልዳ ዪንታ̇ኮታ̇ቦ ቤንቲ̇ዴ።

²¹ ዪንታ̇ ኣማ̇ኒንዲኬ ዪንታ̇ ታስፊን ጾ̈ሳ̇ ጋልዳ ማ̈ቃ̇ምፔ̈ን ዬሱ̈ሳ ጎይባራ ኢያ ዓይቃ ጋርታፖ̇ ዲንኖዲኬ ኢ̈ቦ ቦንች ኢሚ̇ኖ ጾ̈ሳ̇̇̈ባራ ዪንቲ̇ ኣማ̇ኒንቲ̇̈ሬ።

²² ዪንታ̇ ኢሺንታ̇ንቦ ኪን ካን ዶኣምፔ̈ኒ ዪንቲ̇ ኪንንቦ ኪ̈ቲንቲ̇ሙታ ዪንታ̇ ሼምፒ̇ን ጌ̈ሺ̇ኔ፤ ዪ̈ኮታ̇ቦ ዎል ዎልኣ ቡ̈ዳፖ ካንቲ̇ብቴ።

²³ ዪንቲ ናምኢ ዬሊንቲ̇ኖንዳ ሜናብ ሼምፓባር ዶኢዝ ጾ̈ሳ̇ ቃ̈ላባር ዪባ̈ሶ ዜር ጋልዳፖዶኬ ዪዝ ዜር ጋልዳፖ ጊዳካ̇ዬ።

²⁴ ጌ̈ሻ ማ̈ጻ̈ፋ ጋልዳ ጋ̈ዚንዲፌ̈ኒ፤ “ኣይሽ ማኢኖ ኣሲ ዎይ ማ̈ታፌ̈ኔ፤ ኢንታ̇ብ ዎ ቦንቺንዳር ዎይ ማ̈ታ ጋርቶ̇ ቡንፌ̈ኒዬ፤ ማ̈ቲን ሜላ̈ሬ፤ ቡ̈ኒንዳር ጋ̈ሪንታ̈̇ሬ፤

²⁵ ዎቲናካር ጾ̈ሳ̇ ቃ̈ሊንዳ ሜናብ ሚጛር ዶኣ̈ሬ።” ዪንታ̇̈ቦ ሳባ̇ኪንቲ̇ኖ ዎጛላ ቃ̈ሊንዳሬ ዓና̇ ኢዞ።