1 ዋ̈ኒ̇ 4 - ኦራ ጫ̈ቃ ማጻ̈ፋኪን ኣያ̇ናኬ ማቃ ኣያ̇ና 1 ቴ ኢሺንታ̇ን! ኣላሚን ዓኒ̇ ጋልዳ ኣስ ባሊዚ ማቃ ማቂ̇ዝ ናባን ኬስኪ̇ኖኮታ̇ቦ ኣያ̇ና ዎይ ኪን ጌዪ ኤካፒ̇ቴ፤ “ጾ̈ሳ̇ ጋልዳፖ ዬይኖ ኣያ̇ናቤ ኢ̈ታ ኣያ̇ና” ጋ̈ሪ ጌ̈ዚንር ቆፓ̇ር ቤቂ̇ብቴ። 2 ጾ̈ሳ̇ ጋልዳፖ ዬይኖ ኣያ̇ና ማ̈ቂ̇ኖን ዪንቲ̇ ኤራዚንዳ ዪኒ̇ባራ፦ ዬሱ̈ስ ክርስ̇ቶ̈ሲ ኣስ ማ̈ቃ̇ር ሳ̈ዝ ጋላዳ ዬይኖን ኣማ̈ኒዝ ኣያ̇ና ዎይ ጾ̈ሳ̇̇ ኣያ̇ና። 3 ዬሱ̈ስ ክርስቶ̈ሲ ኣስ ማ̈ቃ̇ር ሳ̈ዝ ጋልዳ ዬይኖን ኣማ̇ኒባሶ ኣያ̇ኖ ዎይ ጾ̈ሳ̇ ኣያ̇ና ጊዳካ̇ዬ። ዪ ኣያ̇ና̈ዲ ዬይሬ ጌይን ዓኒ̇ፖ ቲ̈ን ዪንቲ̇ ሲስኪ̇ኔ፥ ኢ ዓታ̇ር ዓኒ̇ ኣላሚን ጋልዳ ዎ። 4 ቴ ናኣን! ዪንቲ ጾ̈ሴ̇ዬ፤ ዪንታ ጋርታ ዎ ኣያ̇ና̈ዲ ኣማ̈ኒባሶ ኣሳ̈ን ጋርታ ዎፖ ሺሬ። ዪ̈ኮታ ዪንቲ ማቃ ማቂ̇ዝ ናባን ጋሚኔ። 5 ማቃ ማቂ̇ዝ ናባን ዓና̇ ኣላሚንዴዬ፤ ኢንቲ ሶ̈ላዚንዳ̈ሬ ኣላሚን ጋልዶ ባዝ ማ̈ቂ̇ኖኮታ̇ቦ ዓና̇ ኣላሚን ጋልዶ ኣሳን ኢንታኮን ሲስኪ̈̇ሬ። 6 ኑ̈ኒ ጾ̈ሴ̇ዬ፤ ጾ̈ሳ̇ ኤሪዛን ዎይ ኑ̈ኮን ሲስኪ̇̈ሬ፤ ጾ̈ሴይ ጊዳካ̇ዮን ኑ̈ኮን ሲስኪ̇ባ̈ሴ። ኪ̈ን ኣያ̇ናኬ ማቃ ኣያ̇ና ኑ̈ኒ ዪኒ̇ባራ ኤሪ̈ሬ። ጾ̈ሳ̇̇̈ዲ ካን ጾ̈ሴ 7 ቴ ላጋ̇ን! ካ̈ን ጾ̈ሳ̇ፖ ማ̈ቂ̇ኖኮታ̇ቦ ኑ̈ኒ ዎልዎልኣ ካንቲ̇ስቶ̈፤ ካዛ ዎይ ጾ̈ሳ̇ ና̈ኤ፤ ማ ጾ̈ሳ̇ ኤሪ̈ሬ። 8 ጾ̈ሲ ካ̈ን ማ̈ቂ̇ኖኮታ̇ቦ ኣስ ካባ̈ሶ ዎይ ጾ̈ሳ̇ ኤሪባ̈ሴ። 9 ናኣ ጎይባራ ኑ̈ኒ ሼምፓ ዲጛምፔ̈ን ጾ̈ሳ̇ ፌ ናኣ ፔታ̇ና ኢያ ኣላሚን ጋርታ ሚሺኔ፤ ዪኒ̇ ጎይባራ ጾ̈ሳ̇ ፌ ካንን ኑ̈ብ ቤይሲኔ። 10 ካን ጋ̈ዚን ዓኖ፤ ኑ̈ኒ ጾ̈ሳ̇ ካኖኮታ̇ቦ ጊዳካ̇ይዶን ጾ̈ሳ̇ ኑ̈ና ካኖ̈ብኬ ኑ ናጋሪን ኑ ጋልዳፖ ፋይምፔ̈ኒ ፌ ናኣ ሚሺኖኮታ̇ቦ። 11 ቴ ላጋ̇ን! ጾ̈ሲ ኑ̈ና ዪኒ̇ፌ̈ን ካዶኮ ኑ̈ናር ዎልዎልኣ ካንታ̇ንዳቦ ኮሺ̇̈ሬ። 12 ጾ̈ሳ̇ ቤቂ̇ኖ ኣሲ ኦ̈ናካር ባዬ̇፤ ኑ̈ኒ ዎል ዎልኣ ካንቲ̇ዝባዝ ማ̈ቄ̇ጌይን ጾ̈ሳ̇ ኑባር ዶኢ̈ሬ፤ ኢ ካንንዳ̇ሬ ኑ ጋርታ̇ ፎቲ ማ̈ቃ̇̈ሬ። 13 ጾ̈ሳ̇ ፌ ኣያ̇ና ኑ̈ብ ኢሚ̇ኖኮታ̇ቦ ኑ̈ኒ ጾ̈ሳ̇̇̈ባር ዶኣዚንዲኬ ጾ̈ሳ̇̇̈ዳር ኑባር ዶኣዚን ኑ̈ኒ ኤሪ̈ሬ። 14 ባ̈ባ̈ዲ ኣላሚ̇ን ጋልዳ ዎ ኣሳንቦ ጋ̈ላ̇ ማ̈ሃር ፌ ናኣ ሚሺኖንዶ ኑ ቤቂ̇̈ኔ፤ ዪኖ̇ ኑ ማርኪቲ̇̈ሬ። 15 ዬሱ̈ሲ ጾ̈ሳ̇̇ ናኢ ማ̈ቂ̇ኖን ኣማ̇ኒዝ ኣሳ ጋርታ̇ ጾ̈ሲ ዶኢ̈ሬ፤ ና̈ሳ̈ዳሬ ጾ̈ሳ̇̇̈ባር ዶኢ̈ሬ። 16 ጾ̈ሲ ኑ̈ና ካዝ ካንንዶ ኑ̈ኒ ኤሪኔ ማ ኣማ̇ኒኔ። ጾ̈ሲ ካ̈ን ጾ̈ሴ፤ ካ̈ንባር ዶኢዝ ኣሲ ጾ̈ሳ̇̈̇ባር ዶኢ̈ሬ፤ ጾ̈ሳ̇̇ር ኢባር ዶኢ̈ሬ። 17 ዓኒ̇ ኣላሚን ጋልዳ ኑ ዶኢንዳ ኢያ ማይጺዛኮታ̇ቦ ዪዚ ጾ̈ሳ̇ ፊርዲዝ ቃሚ̇ን ጋርታ ኑ̈ኒ ኢ̈ች ቤይ ኢ ቲ̈ን ኤቃ̇ንዳቦ ዳንዳኣምፔ̈ኒ ዪኒ̇ ጎይባራ ካን ኑ ጊዳ̇ ፎቲ ማ̈ቂ̇ኔ። 18 ፎቲ ማ̈ቂ̇ኖ ካንንዳ ኢ̈ች ይሳ̇̈ርዶኬ ካ̈ን ጋርታ̇ ኢ̈ቺ̇ ባዬ̇፤ ኢ̈ች ኢ̈ጪ̇ዝ ኣሲ ቂጣ̈ታ ዎ ጌዪ ኢ̈ጪ̇ዛኮታ̇ቦ ኢ̈ጪ̇ዝ ና̈ሳ ካንንዳ ፎቲ ጊዳ̇ካ̇ዬ። 19 ጾ̈ሲ ኑ̈ና ቲ̈ኒታር ካኖኮታ̇ቦ ኑ̈ናሬ ኢያ ካሬ። 20 ኦ̈ናካር ማ̈ቂ̇ን “ታ̈ኒ ጾ̈ሳ̇ ካሬ” ጌዪሙታ̇ዶሪ ፌ ኢሻ ኢጺ̇ዛ̈ዲ ማቃ ማቂ̇ዝ ኣሴ፤ ፌ ላፍ ጋልዳ ቤቂ̇ሙታ ዎ ፌ ኢሻ ካባሶ̈ ኣሲ ፌ ኣ̈ፍባር ቤቃካ̇ዮ ጾ̈ሳ̇ ዎዛርታ̇ር ካንዳብ ዳንዳኢ̈ራ? 21 ዪ̈ኮታ̇ቦ ጾ̈ሲ ኑ̈ቦ ኢሚ̇̈ኖ ኪ̈ቲንዳ “ጾ̈ሳ̇ ካዝ ኣሲ ፌ ኢሻ ካ ጋ̈ቤ” ጋ̈ዚንዶ። |