1 ዋ̈ኒ̇ 1 - ኦራ ጫ̈ቃ ማጻ̈ፋሼምፓ ቃ̈ላ 1 ዎይ ባዚ ኮቺንታ̇ናፖ ቲ̈ን ዎ፥ ኑ ኑ ኣ̈ፊንባር ቤቂ̇ኖን፥ ኑ ኩሺንባር ዎ̈ሺኖን ሼምፓ ቃ̈ሊን ጎይ ኑ ዪንታ̇ብ ሶ̈ሊ̈ሬ። ኑ̈ኒ ኢያ ቤቂ̇ኔ፤ ኑ ኩሺንባራር ኢያ ኤ̈ኔ። 2 ዪ ሼምፓ ቤንቲ̇ን ኑ ኢያ ቤቂ̇ኔ፤ ዪ̈ኮታ̇ቦ ኑ̈ኒ ኢባዝ ማርኪቲ̈ሬ፤ ማ ጾ̈ሳ̇ ባ̈ባ̈ ቲ̈ን ዎ ኑ̈ብ ቤንቲ̇ኖ ሜና ሼምፓባር ዶኢንዶ ዪንታ̇ብ ሶ̈ሊ̈ሬ። 3 ዪንታ̇ብ ኑ̈ባራ ፔ̈ቲቲ ዶኣምፔ̈ን ኑ̈ኒ ሲስኪ̇ኖንዲኬ ቤቂ̇ኖንዶ ዪንታ̇̈ቦ ሶ̈ሊሬ። ዪና̇ ኑ ፔቲ̇ቲ̇ንዳሬ ባ̈ባ̈ባርኬ ናኣ ዬ̈ሱ̈ስ ክርስቶ̈ሳባራ። 4 ኑ ኡፋይሲ̇ንዳ ፎቲ ማ̈ቃ̇ምፔ̈ኒ ዓኖ̇ ኑ ዪንታ̇ብ ጻ̈ፊ̈ሬ። ጾ̈ሳ̇̇̈ዲ ፎኢን 5 ኑ̈ኒ ኢ̈ ጋልዳፖ ሲስካ̇ር ዪንታ̇ቦ ሶ̈ላዝ ኪ̈ቲንዳ “ጾ̈ሲ ፎኢ̈ን፤ ም ጌይዝ ባዚ ጾ̈ሳ̇ ካንታ ጋልዳ ባዬ̇” ጋ̈ዚንዶ። 6 ዪዚ “ኑ̈ኒ ጾ̈ሳ̇ባራ ዎ” ጌዪሙታ ም ጋርታ ዬዝባዝ ማ̈ቄ̇ጌን ኑ ሶ̈ላዝ ኑ ሶ̈ሊንባርኬ ኑ ኦ̈ሲንባራር ማቂ̇ን ማቃ ማቂ̇ዝ ኣሴ። 7 ጾ̈ሳ̇ ፎኢን ማ̈ቂ̇ኖንዲፌ̈ኒ ኑ̈ናር ፎኢንባራ ቢሪንቴ̇ጌንዶ ኑ̈ቦ ዎል ዎልኣ ፔቲ̇ቲ ዎ። ኢ ናኣ ዬሱ̈ስ ክርስቶ̈ሳ ሱ̈ንዳሬ ና̈ጋራ ዎይሶ ጋልዳፖ ኑ̈ና ሜ̈ጫ̇ ጌ̈ሻ̇̈ሬ። 8 ኑ̈ኒ ና̈ጋራ ኑ ጋልዳ ባዬ ጌዬጌይንዶ ኑ ኑ̈ና ባልሬ፤ ኪ̈ንቲሬ ኑ ጋርታ ባዬ። 9 ኑ̈ኒ ኑ ናጋሪን ቡ̈ጼጌይን ኢ ኣማን̇ቲኖ̈ድኬ ጺ̈ላ ማ̈ቂ̇ኖኮታቦ ኑ ና̈ጋሪን ዎይ ኑ̈ቦ ኣቶ̈ ጌ̈ዪሬ፤ ኑ ባሊንዳር ኑ ጋልዳፖ ሜጫ̇ር ጌሺ̇̈ሬ። 10 ኑ̈ኒ ና̈ጋራ ኦ̈ካዬ ጌዬጌይንዶ ጾ̈ሳ̇ ማቃ ማቂ̇ዝ ጾ̈ስ ማሂ̈ሬ፤ ኢ ቃ̈ሊንዳ ኑ ጋርታ ባዬ̇። |