1 ቆሮ 7 - ኦራ ጫ̈ቃ ማጻ̈ፋኢሳ̇ ጎይ ኢሚ̇ኖ ዞራ 1 ዪንቲ̇ ታ̈ብ ጻ̈ፊኖ ዳብዳቢን ጎይባራ ቴ ዪንታ̇ብ ሶ̈ላዚንዳ፥ ኣሲ ማጫ̇ ኤካካ̇ይ ዶኢ̈ርኮ ኮሼ̇። 2 ዎቲናካሬ ኦሎ̇ላ ጋልዳፖ ቡ̈ታ̇ንዳቦ ኣቲና ጌይዛ ዎይ ማጫ ኤኮ̇ጋ̈ቤ፤ ማጫ̇ንሬ ዎይንቦ ኣስኒ ኢንታ̇ብ ዶኣጋ̈ቤ። 3 ኣስና̈ዲ ፌ ማጪ̇ንቦ ኮሻ̇ዝ ባዚን ኢዞ ካያፖጋ̈ቤ። ኢዛሬ ኢ̈ብ ኮሻ̇ዝ ባዚን ኢያ ካያፖጋ̈ቤ። 4 ማጪ̇ንዳ ኢዛ ፌ ጋል̇ ጌ̈ቲን ጋልዳ ኢዝቦ ሲልጣ̈ና ባ̈ዬ ኢዝ ጋሊ̇ን ጋልዳ ሲልጣ̈ና ዎ̈ዲ ኢዝ ኣስና̈ቦ፤ ዪና̇ ኢዝፌ̈ኒ ኣስና̈ዳሬ ኢ ጋሊ̇ን ጋልዳ ኢ̈ብ ሲልጣ̈ና ባዬ̇ ሲልጣ̈ኒንዳ ኢ ማጪ̇ንዴዬ። 5 ዪንቲ ናምኣን ዎልኣ ዞሪንታ̇ሪ ዎ̈ሳ ዎ̈ሳንዳቦ ዪና̇ሬ ጊላ̇ ቃማ̇ቦዶኬ ዪ̈ፖ ኣቴ̇ጌይን ዎል ዎልኣ ካያፒ̇ቴ̇። ዪንቲ̇ ዪንታ̇ ና̈ጋንዳ̇ብ ጋማር ሴ̈ጣኖ ዪንታ̇ ፋታ̇ናር ናጋራ ጋርታ̇ ጌልሳካ̇ዮ̈ዲፌ̈ኒ ማ̈ቃ̇ር ዎል ዎልኣ ቆፒ̇ብቴ። 6 ዪኖ̇ ቴ ዪንታ̇̇ክ ጋ̈ዚንዳ ዪንታ̇ ዞራ̈ርዶኬ ዪንታ̇ ኪ̈ታ̇ባሴ። 7 ኣሲ ዎይ ታናፌ̈ን ማጫ̇ ኤካካ̇ይ ዶኢ̈ርኮ ቴ ዶሳ̈ርዶን ዎቲናካሬ ጾ̈ሲ̇ ኣሳብ ቆሚ̇ን ቆሚ̇ን ዱማ ዱማ ኢሚ̇ቲ ኢሚ̇ኔ፤ ፔታ̇ናቦ ፔታ̇ኒ ሜላ̈ቦ ሜላ ኣይናታ ኢሚ̇ኔ። 8 ማጫ̇ ኤካካ̇ይኬ ኢስታካ̇ይ ዎንብኬ ኣስኒ ዓይቂ̇ኖ ማጫ̇ንቦ ታ ጋ̈ዚንዳ፦ ኢንቲ̇ ኢስታካ̇ይኬ ማ ኣቲናንር ማጫ̇ ኤካካ̇ይ ቴፌ̈ን ዶኢ̈ርኮ ኮሼ̇። 9 ዎቲናካሬ ዪንታ̇ ኢኒ̇ን ጋማንዳቦ ዪንታ̇ብ ዳንዳኢንታ̇ካ̇ይ ኣቴ̇ጌይን ኣቲና̈ዳሬ ማጫ̇ ኤኮ̇ጋ̈ቤ ማጫ̇ናኣር ኢስታ̇ጋ̈ቤ። ኢና̇ባር ዓይቃ̇ናፖ̇ ማጫ̇ ኤኪ̇ዛ ኮሼ፤ ማጪንዳር ኢስታዚን ኮሼ̇። 10 ማጫ̇ ኤኪ̇ኖ ኣቲናንኬ ኢስቲኖ ማጫንቦ ቴ ኢማ̇ዝ ኪ̈ታ ታ̈ብ ዎ፦ (ዪና ኪ̈ቲንዳ ጎዳ ጋልዳፖዶኬ ታ ጋልዳፖ ጊዳካ̇ዬ)፤ ዪ̈ዳሬ፥ ኢስቲ̇ኖ ማጪ̇ንዳ ፌ ኣስና ጋልዳፖ ኬስካፓ̇ጋ̈ቤ፤ 11 ፌ ኣስና ጋልዳፖ ኬስኬጌዪናር ኢስታ̇ካይ ዶኣጋ̈ቤ። ዎይ ማ̈ቃ̇ር ፌ ኣስና̈ባር ኢጊንታ̇ጋ̈ቤ። ዪና ኢዝፌ̈ኒ ኣስናዳር ፌ ማጪ̇ን ኬሳ̇ፖ̇። 12 ዓት ማ ታ̈ኒ ኣቲ̇ናንቦ ዪንታ̇̇ብ ዞሪዝ ባዚ ዎ፦ (ዪና̇ ዞሪንዳ ጎዳ ጋልዳፖ̇ ጎዳካ̇ይዶን ታ ጋልዳፖ ኢማ̇̈ሬ)፤ ፔታ̇ና ኣማ̇ኒኖ ና̈ሳ̈ዲ ኣማ̇ናካ̇ዮ ማጫ̇ ኢ̈ብ ዎኮ ኣሲን ኢባር ዶኣንዳ̇ብ ኮዬጌይን ኢዞ ኬሳፓ̇ጋ̈ቤ። 13 ኣማ̇ኒኖ ኣሲንዳ ኣማ̇ናካዮ ኣስኒ ኢዝቦ ዶኤጌዪንዶ ኢ ኢዝባር ዎልኣ ዶኣንዳብ ኮዬጌዪን ኢ ጋልዳፖ ኬስካፓ̇ጋ̈ቤ። 14 ኣማ̇ናካዮ ኣስና̈ዲ ፌ ማጪ̇ን ጎይባራ ጾ̈ሳ̇ ኣማ̇ናንዳ ዳንዳኢ̈ሬ፤ ኣማ̇ናካዮ ማጪ̇ንዳሬ ፌ ኣስና ጎይባራ ጾ̈ሳ̇̇ ኣማ̇ናንዳ ዳንዳኣ̈ሬ፤ ዪኒፌ̈ን ዎታካ̇ይ ኣቴጌዪን ኢንታ ናኣን ጾ̈ሳ̇ ኣማ̇ኒዝ ኣስ ማ̈ቂ̇ባሴ፤ ዪኒ̇ፌ̈ን ዎልኣ ፔታ̇ን ማ̈ቃ̇ር ዶኤጌይን ዪንታ̇ ናኣን ጾ̈ሳ̇ ኣማ̇ኒዝ ኣስ ማ̈ቂ̇ሬ። 15 ኣማ̇ናካ̇ዮ ና̈ሳ̈ዲ ዎይ ኣሲንዳ̇ ኣማ̇ኒኖ ፌ ማጪ̇ን ዎይ ኣማ̇ኒኖ ፌ ኣስናባራ ዎልኣ ዶኣብዳ ጌዪ ኢጼጌይንዶ ዎል ፋጊንታ̇ንዳብ ዳንዳኢ̈ሬ። ዪዚ ዪኒ̇ባራ ኢንታ ጋርታ ኣማ̇ኒኖ ኣሲ ማጪ̇ንዳር ማ̈ቆ̇ ኣስና̈ዳር ዎልቃባራ ኢንታ̇ ዎልኣ ዶኦ ጌይዝ ባዚ ባዬ̇። ጾ̈ሲ ኑ̈ና ጼይጊኖ̈ዲ ኑ̈ኒ ሳሪቲባር ዶኣምፔ̈ኒዬ። 16 ኣ̈ሽ ኣማ̇ኒኖ ኣሲንዴ! ኔ ኣስና ኣማ̇ናካዮ ኔ ኢያ ፋርኪሽ ኦ ኤሬ? ኣ̈ን ኔ ኣማኒኖ ና̈ሳ̈ዶ! ኣማ̇ናካ̇ዮ ኔ ማጪ̇ን ኔ ኢዞ ፋርኪሼ ኔ ኤራ̈ራ? 17 ኣሲ ፌ ቆ̈ሚን ቆ̈ሚን ጎዳ ኢያ ጋዲ̇ኖ ቤሲ̇ን ጋልዳኬ ጾ̈ሲ ኢያ ጼይጊ̇ኖ ኬል̇ባራ ፌ ዎንዲፌ̈ን ዶኣ̈ጋቤ። ዎይ ዎሳ ኬ̈ንቦ ቴ ኢሚ̇ኖ ኪቲ̇ን ዪና̇ ኢዞ። 18 ጋራዚንቲ̇ኖፖ̇ ዎሃ ኣማ̇ኒኖ ኣሲ ጋራ̇ዚንታ̇ካ̇ዮ ኣስፌ̈ን ማ̈ቃ̇ንዳብ ቆፓፖጋ̈ቤ። ማ ጋራ̇ዚንታ̇ካይዶር ኣማ̇ኒኖ ኣሲ ጋራ̇ዚንታ̇ንዳብ ኮያፖጋ̈ቤ። 19 ኣሲ ጋራ̇ዚንቲናሬ ጋራ̇ዚንታ̇ካ̇ይ ኣቲ̇ናሬ ኣባክ ማ̈ዲ̇ዝ ባዚ ባዬ። ኣስ ማ̈ዳ̇ዚንዳ ኣሲ ጾ̈ሳ̇ ኪቲ̇ን ኦ̈ዚንዶ። 20 ዪ̈ኮታ̇ቦ ኣሲ ዎይ ጾ̈ሲ̇ ኢያ ጼይጊኖ ኬል̇ባራ ዎንዲፌ̈ኒ ዶኣጋ̈ቤ። 21 ኔ ኣይላዶ̈ራ ጾ̈ሳ̇ ኣማ̇ኒና? ዪ̈ፌን ማቂ̇ናካሬ ኣባክ ባዬ፤ ዪ̈ቦ ሜቲንታ̇ፔ፤ ኔ̈ ኣይላ ጋርታ̇ፖ̇ ኬሲ̇ኪ̇ዝ ጎይ ኔ̈ብ ቤንቴ̇ጌዪንዶ ኬስካ̇ዚን ኣሻፔ̇። 22 ኣይላ ማ̈ቃር ዎዶሪ ጎዳ ኣማ̇ኒኖ ኣሲ ጎዳባራ ናጻ ኬስኪ̇ኔ፤ ማ ናጻ ዎዶሪ ጎዳ ኣማ̇ኒኖ ኣሲ ክርስቶ̈ሳ ኣይላ ማ̈ቂ̇̈ኔ። 23 ጾ̈ሲ ዋ̈ጋ ጪጋ̇ር ዪንታ̇ ዎጚኖኮታ̇ቦ ዪንቲ̇ ኣሳብ ኣይላ ማ̈ቃፒ̇ቴ። 24 ዪ̈ኮታ̇ቦ ቴ ኢሺንታን! ኣሲ ዎይ ጾ̈ሲ̇ ኢያ ጼይጊኖ ኬል̇ባራ ኢ ዎንዲፌ̈ኒ ጾ̈ሳ̇̇̈ባር ዶኣጋ̈ቤ። 25 ማጫ̇ ኤካካ̇ዮንብኬ ኢስታካ̇ዮ ኣሳንቦ ታ̈ኒ ጎዳ ጋልዳፖ ኤኪ̇ኖ ኪ̈ታ ታ̈ብ ባዬ፤ ማ̈ቂ̇ናካር ጎዳ ማ̈ሪቲባራ ታ̈ኒ ኣማ̇ኒንቲ̇ኖ ኣስ ማ̈ቂ̇ኖኮታ̇ቦ ታ ጋልዳፖ̇ ኢንታ̇ ዞራ̈ሬ። 26 ዓት ኑ ዎ ኬሊ̇ንዳ ዋ̈ዪዝ ኢ̈ት ኬል̇ ማ̈ቂ̇ኖኮታ̇ቦ ኣቲኖ ማጫ ኤካካ̇ይ ማጫር ኢስታካ̇ይ ዶኢ̈ርኮ ኮሼ። 27 ማ̈ቂናካሬ ኔ ማጫ̇ ኤኪ̇ኖ ኣስኮ ኬሳ̇ንዳብ ቆፓ̇ፔ̇፤ ማጫ ኤካካ̇ዮ ኣስኮ ማጫ̇ ኤካ̇ንዳብ ቆፓ̇ፔ̇። 28 ቴ ዪና̇ ጋ̈ዚንዳ ኔ̈ኒ ማጫ̇ ኤኬ̇ጌይንዶ ኔ̈ብ ናጋራ ማ̈ቂ̇̈ሬ ጌንት ጊዳካ̇ዬ፤ ማ ዉዲሪንዳ ኢስቴጌይን ኢዝቦ ናጋራ ማ̈ቂ̇̈ሬ ጌንት ጊዳካ̇ዬ፤ ማ̈ቂ̇ናካሬ ማጫ̇ ኤኪ̇ዛን ዎይ ኢስቲ̇ዛን ዓኒ̇ ዓላሚን ጋልዳ ዎይሊን ሜታ ኢንታ̇ ዬሊ̇̈ሬ፤ ቴ ኢኒ̇ንዳ ዪንቲ̇ ዪኒፌ̈ኖ ሜቲን ጋልዳፖ̇ ቡ̈ታ̇ምፔ̈ኔ። 29 ቴ ኢሺንታ̇ን! ላይንዳ ዉሪኔ፤ ዪዚ ዓኒፖ̇ ጌዳ ማጫ̇ ኢ̈ብ ዎ ኣሲ ማጫ̇ ኢ̈ብ ባዮ̇ ኣስፌ̈ን ማ̈ቃ̇ሪ ዶኦጋ̈ቤ። 30 ሙዲዲዛን ሙዲዲባ̈ሶ ኣስፌ̈ኒ፥ ኡፋይቲ̇ዛን ኡፋይቲ̇ባ̈ሶ ኣስፌ̈ኒ ማ̈ቃ̇ር ዶኦጋ̈ቤ፤ ፌ̈ብ ኣባክ ዓኒ ዎ̈ጚ ኤኪ̇ዝ ኣሳን “ቴ ዎጛ ኤኪ̇ኖ ባዚን ዓና̇ ቴዬ” ጌዪ ቆፓ̇ፖጋ̈ቤ። 31 ዓና̇ ኣላሚን ጋልዳ ዎ ቆሊንንባር ማ̈ዲንቲ̇ሙታ̇ ዎ ኣሲ፥ ፌ ቆፊን ዎይ ኢዝ ጋልዳ ጋዳካ̇ዮ ኣስ ማ̈ቃ̇ሪ ዶኦጋ̈ቤ። ዓና̇ ኣላሚንዳ ዓት ኢዛ ዎንዲፌ̈ን ዶኣባሴ። 32 ዪዚ ዪንቲ̇ ኣባካባር ቲ̈ራካ̇ይዶ̈ር ዶኣምፔ̇̈ን ቴ ዶሳ̈̇ሬ፤ ማጫ̇ ኤካካ̇ዮ ኣሲ ጎዳ ኡፋይሲ̇ዝ ባዝ ኮዪዛኮታ̇ቦ ፌ ቆፋ ዎይ ጎዳ ኦ̈ሳ ጋልዳ ጋዲ̇̈ሬ። 33 ማጫ̇ ኤኪ̇ኖ ና̈ሳ̈ዲ ዓና̇ ኣላሚን ጋልዶ ባዝኬ ፌ ማጪ̇ን ኡፋይሲ̇ዝ ጎይ ቆፒ̇̈ሬ። 34 ዪዚ ዪኒ̇ጎይባራ ኢ ቆፊንዳ ናምኢ ፋጊንቲ̇ኔ ጌንቴ̇። ዪና̇ ኢዝፌ̈ኒ ኢስታካ̇ዮ ኣሲንዳ̇ሬ ፌ ኣሲቲን ዎይ ጎዳ̈ቦ ኣ̈ ኢማ̇ንዳብ ኮዪዛኮታ̇ቦ ኢዝ ቆፊን ዎይ ጎዳ ኦ̈ሳ ጋልዳ ማ̈ቂ̇̈ሬ። ኢስቲ̇ኖ ማጪ̇ንዳ ፌ ኣስና ኡፋይሳንዳ̇ብ ኮዪዛኮታ̇ቦ ዓኒ̇ ኣላሚን ጋልዶ ባዝ ቆፓ̈̇ሬ። 35 ታ̈ኒ ዪኖ̇ ዪንታ̇̈ብ ጌይኖንዳ ዪንታ̇ ማ̈ዳ̇ንዳብ ጋ̈ር ሶ̈ሊንዶኬ ዪንቲ̇ ኦ̈ንዳብ ኮዪኖንዶ ዪንታ̇ ካያንዳቦ ጋ̈ር ጊዳካ̇ዬ። ቴ ኢኒ̇ንዳሬ ዪንቲ̇ ኮሽ̇ ዶኣምፔ̈ንኬ ዪንታ̇ ቆፊን ፋጊንታካ̇ይዶር ፎቲ ቡ̈ዳባራ ጎዳ̈ብ ኦ̈ምፔ̈ኔ። 36 ፔቲ̇ ኣሲ ፌ ሳ̈ ማጪ̇ን ኤካ̇ብዳ ጋ̈ሪ ቆፒ̇ኖፖ̇ ዓኒ ማ ዪና̇ ኢ ዎቲኖንዳ ናኢምቦ ኮሽባይ ማ̈ቂ̇ኖን ኢ̈ብ ኤሪንቴ̇ጌይን፥ ማ ኢዝቦ ኢሳ̇ ኬሊ̇ ኣ̈̇ዝ ባዝ ማ̈ቄጌይንኬ ኢ ኢዞ ኤካ̇ዚን ኢ̈ብ ኮሽ ማይጻር ቤንቴጌይን ኢ ኢዞ ኤኮ̇ጋ̈ቤ፥ ኢ̈ብ ናጋራ ማ̈ቃ̇ባሴ። 37 ዎቲናካር ፔቲ̇ ኣሲ ኢያ ዋዪዝ ባዚ ባይዪ ማ̈ቄ̇ጌይን፥ ማ ፌ̈ና ና̈ጋንዳብ ዳንዳኤጌይንዶ ፌ ሳ̈ ማጪ̇ን ኤካ̇ብዳ ጋ̈ር ኣሼ̇ጌይን ኮሽ̇ ዎቲኔ። 38 ዪ̈ኮታ̇ቦ ፌ ሳ̈ ማጪ̇ን ኤኪ̇ዝ ኣሲ ኮሽ ዎቲኔ፤ ኤካ̇ብዳ ጌይዛ̈ዳር ሺ ኮሽ ዎቲኔ። 39 ፔቲ̇ ኣሳ ማጪ̇ንዳ ኢዝ ኣስና ዓይቃካ̇ይ ሼምፓባር ዎኮ ኢዛ ሜላ ኣሳ ኣ̈ል ኢስታ̇ንዳብ ዳንዳኣባሴ፤ ኢዝ ኣስና ዓይቄጌይንዶ ፌ ኮዪኖ ኣስና ኣ̈ል ኢስታ̇ንዳብ ዳንዳኣ̈ሬ፤ ማ̈ቂናካሬ ኢዛ ኢስቲ̇ዝ ና̈ሳ̈ዲ ኣማ̇ኒኖ ኣስ ማ̈ቃ̇ንዳብ ኮሺ̇̈ሬ። 40 ቴ ቆፊፌ̈ንኮ ኢዛ ኢስታ̇ካይዶ̈ር ፌ̈ብ ዶኣ̈ርኮ ኮሽ ኡፋይታ̇ ዶኣ̈ሬ፤ ታ̈ናር ጾ̈ሳ̇̇ ኣያ̇ና ታ ጋልዳ ዎ ጌያ ቆፓ̈̇ሬ። |