Usea 9 - Fanawbuid tagsibaliwas Fakayabian

Faurianan sa sangay Taw Israel

¹ Usea nalong te, “Am fag ngay taw Israel, faragangi wan nu guseganan am kata tibak ngay talun, aroro gseg am sa tibak fagsegan ay kayayu wayam ay Dius. Dewa nday fag fagruyusan fare, gseg wam ay gutluan ay glong am te, ‘Tuy wan tam famayad siginan tam ngay fagsegan aroro gseg tam anya.’

² Dewa katanya, sa taguyan, naminan am ay ngay tanum ay anggan ay ngay fanlangu.

³ Gubun ban am Israel, Yawi at talun, ay kafoli ban am sas talun Igiptu, ay tiba malao sas Asirya, ay sanya nu kon at masuya fag fakonun.

⁴ Kanya ban wa kaylat ya nu gfon am ay fanginum fag ngay fanggalangun sas Yawi. Dewa ban am gfon gugat takatanya, wa guseganan. Ay nusnga sinu ban takon at nafon fag fanggalangun glong te, masuya way, aroro kata fakonun si sik bale ke mabulan. Ay ngay fakonun sa way lang ay sadili, bunwa sas Yawi at bale.

⁵ Nu katanya, nataw ro katsi ay fakamulun nu ndasug sis fagmafulan fag menit ay laman gfauseganan Yawi?

⁶ Dewa am glagyu fakabulun, gfaful yay ban ayu sas talun Igiptu ay namoli ayu sas Memfis. Ngay makmak ay madugi fag ngay tanum gfaut ay ngay mabyat fag ngay fagagbilugun salapi ay ngay bale.

⁷ Ngay taw Israel, andasug wan nu gafaurianan am fag menit, ay kafag menit namasure ban ay nafakamulun. Sumaful wam te, andasug wa ngaro kafag menit, ay glong am te, ‘Kanya fag taglong kata nu yud mamatanganan.’ Makatu wayam glong takatanya, aroro ngayu wan ay ngay asalanan ay kadotama am angku.

⁸ Au wan Dius at taglong ay kanya gufud angku kaduge au gfangguna ayu. Dewa katanya, nusnga nday tam, kaylat wayam gfaidapan angku. Kata au sik manuk tungud at kinsangdaw. Ngay taw Israel wan Dius at natuyan at fagbanwanan, dewa katanya, kanya fagayu kadotama angku.

⁹ Mauri wayam kata sik ngay mangama ebi sis Gibya. Dius gamatangan gugat ay ngay fagmauriun, ay kanya gfaurianan ayu sa ay asalanan.”

¹⁰ Dius nabalus te, “Ngay taw Israel, ebi gina au gfili ay ngay mangaguyang laman ku ngay taw, maksvn nu guseganan au. Kata au sik taw taguseganan nu nalag sik tanum wat ubas nu natugbung si sik talun at yud e taw, ay mannga nu nalag taguna fag rawvg si sik tanuman fun igus. Dewa katanya, nalao wam sas Baal-Peur, ay nafalganan ay ngay sadili sa kafag fagsegan at mauri, ay nu katanya, ansik mauri am kata kafag fagsegan ay fakesugun.

¹¹ Ngay taw Israel, ay fagmabalyananun umkalyam kata sik manuk tungud taglayugan. Ay ngay mangena wa ban gfafion ya ay wa gsisian ya.

¹² Nung way e gsisian man ban, gbul kwa ban anya fagayu ay kabalu ban am. Afanyuan ban am nu naubun au ayu.

¹³ Ebi, nu gdama au ayu kata tuam sik kayu tagtugbung sit masine fag daga. Dewa katanya katsi, masine nu gbuba am ay ngay sisian sas fagawayanan laman sanya nu kabul.”

¹⁴ Usea nalong te, “Yawi, fakatanyai wan am fakamulun sam ngay taw. Fayudi wa gsisian ay gfasusu ya at ngay mangena.”

¹⁵ Dius nabalus te, “Fagayu ku ngay taw at fagmauriun gfasigad siginans Gilgal. Kanya fagayu gina sanya, kadotama au anya fagayu. Aroro siginan at fagmauriun, gaiyan kwa ban anya fagayu siginan ku fagbanwanan fag talun Israel. Ay kwa ban kesug ya anya fagayu. At ngay tagfangguna kamabo angku.

¹⁶ Kanya fagayu kata sik tanum at kin-gong at lalid ay nu katanya, wa grawvg ya. Ay dewa ban gfafion, gfabul au at ngay fakesugun fag ngay sisian.”

¹⁷ Usea nalong te, “Ku Dius gaiyan ngay taw Israel aroro wa gfaning anya. Nu katanya, kanya fagayu gsaruayan waban sa tibak talun.