Usea 8 - Fanawbuid tagsibaliwas Fakayabian

Dius Nafaurianan ngay Taw Israel aroro Naseg Tibak Fagsegan

¹ Uyupi ay ngay budyung laman sik famararang sa ku ngay taw, aroro at ngay fawayan namawayan anya fagayu kasakit sik bio, aroro ku ngay taw wa nafae masuad em nasadian ay wa nafaning ku ngay foyungan.

² Kanya fagayu guro sa angku te, ‘Gtuyan ami te, o wan Israel at Dius.’

³ Dewa katanya, kanya fagayu nafaning nusnga setaw at matuyan, nu katanya, at ngay fawayan namafalo anya.

⁴ Kanya fagayu nafili yay at ngay fun ay at ngay tagfangguna dewa au yud kaylat. Kanya fagayu nawat at ngay fagsegan mawatan siginans salapi ay gintu, ay kafag ngay fagsegan at nafae faurianan anya fagayu.

⁵ Kwa kaylat ngay taw Samarya at fagsegan fag baka. Maksvn nu kadotama au anya fagayu. Seduge ya ban kanya fagayu nu yud gfakamulun at masine?

⁶ Samarya at fagsegan fag baka, ngay taw Israel way at nawat. Kanya bunwa Dius. Matuyan, kanya ban karufa way.

⁷ Kanya fagayu kata way nu gtanum tagmara ay ggutlu tagridribudan fag tagmara. Ay kanya fagayu kata yangay sik trigu at yud e rawvg. Ay kanya nu narawvg di, tiba way ro ktalun takon.

⁸ Ngay taw Israel kata nu naonan tibak talun. Katsi kanya fagayu gfasuglatan way lang sanya fag ngay talun, kata way lang at yud e fanambagun fag fagagbilugun.

⁹ Kanya fagayu kata way lang sik mela fag asnu tagsesadian ay malyaman sad talun. Kanya fagayu nanget gubuk sas Asirya ay namon famayad sat fagadgalangan fag ngay talun laman ggubuk anya.

¹⁰ Ay kanya ban fag ngay talun dewa nagbilug Israel, namaful kyay ban fia anya fagayu laman gfaurianan. Ay sik fun ban gadgaloan at ngay tagfangguna at namaidapan anya fagayu.

¹¹ Ngay taw Israel dewa nawat ngayuk fagirugan laman fagnangirugan at famalyam asalanan fag ngay fanggalangun, sanya yangay nu gfakamulun at mauri.

¹² Ngayu ku nafariruk suguan laman at fagnamaningun, dewa katanya, kanya fagayu nu glong, wa sa anya nu gfon au kafag suguan, sa way tibak taw.

¹³ Kanya fagayu nafon sa angku at ngay fanggalangun ay naon yamas, dewa katanya, kwa guseganan anya fagayu. Siginan takatanya, namatang au at ngay fagmauriun, ay namaurianan au anya fagayu aroro sat ngay asalanan, ay namafoli sas talun Igiptu.

¹⁴ Ngay taw Israel nalyam at takawat. Ngay taw Israel ay ngay taw Uda nawat at ngay bale ayu daul, ay at mogat fag ngay furuan ayu daul. Dewa katanya, nangirug kban kafag ngay furuan ay anggan at mogat fag ngay afud.”