Usea 2 - Fanawbuid tagsibaliwas Fakayabian

¹ “Nu katanya, fangayani ay kaiban fag ngay taw Israel te, ‘Ku ngay taw,’ ay ‘Ku ngay fakesugun.’

Gumer Nanangalo sa Tibak Mangama

² Ku ngay sisian, salagi ay mina aroro bunwa sia ya ku mangena ay bunwa au ya at mangama. Longi anya te, faragangi wan nu kamatugtug.

³ Kanya nu dway gfaragang, namayud au e lanbung anya, kata gina bagu kasalug. Namakata au anya sik talun at yud e taw, ay gfabayan kwan nu kabul sas fakadanumun.

^4-5 Ay am, at ngay sisian, kwa kesug ya ayu aroro sik takamatugtug wayam fag mangena at ngay sisian. Ay mina at nafakamulun at mauri, maksvn nu mapla. Ay kanya glong yay te, ‘Namafalo au ku nanangalo fag ngay mangama at nafon angku fakonun, mamam, lanbung at mawatan siginans tupa at sigyu ay at masine fag ramit, langis, ay fanlangu.’

⁶ Nu katanya, nangubung kwan anya sik madugi fag fangalad laman wa maduksun.

⁷ Ay kanya ban dewa namafalo kafag ngay mangama, wa masud. Ay dewa yay nanrvbvy anya fagayu, wa glag. Sanya ginan, kanya glong te, ‘Kafoli kway sa ku mangama aroro gina au magamut si anya, amanabayan yap tua ku kayaunanan.’

⁸ Gumer wa namatangan ya te, au at nafon anya ngay rawvg, ngay fanlangu, langis ay ngayuk gintu ay salapi. Ay kafag ngay gintu ay fag ngay salapi kanya wan kafag ngay mangama at fangawat Baal fag fagsegan.

⁹ Nu katanya, gina ban fanggutluan gbul kyay ku nafon fag ngay rawvg ay fag fanlangu. Ay gbul kyangay ban ku nafon fag ngay lanbung at mawatan siginans tupa at sigyu, ay at masine fag ramit laman fantabun at fagmalulasanun.

¹⁰ Katsi, namasure au at fakamatugtugun sat ngay mangama at daga salubangan, ay we mafalangfe anya siginan ku faurianan.

¹¹ Gfaragang kwan at ngay fagmafulun galay banwa, ay galay fagmafulun sabaliwa Magdanun nu Bagu Kasure, ay galay Famiangalay fag Menit.

¹² Nanrasras kwan at ngay tanuman wat ubas ay ngay fun kayu igus ngay mangama at famayad sa anya. Namafaut kwan kafag tanuman, ay takon ban at ngay rawvg, ngay mangilafang way lang tagsis talun.

¹³ Gfaurianan au anya aroro kanya nairug ngay famaebebanglu sas Baal fag ngay fagsegan, ay nasulun bauyung ay fanumyu, ay nanangalo at ngay mangama, ay nalyam wan angku. Au, Yawi, taglong tuy.

¹⁴ Dewa katanya, nantaban au anya sas talun at yud e taw ay nandog au namaylatan anya yakmay nesug angku.

¹⁵ Nu nfoli ban mi, gdog au namafoli sa anya at ngay tanuman, ay datag Akur, nangawat au sik sakbawan tagfon fagsegun. Ay kanya ban gbalus angku kata at nafakamulun ebi, gina au gfalfas anya siginans talun Igiptu.”

¹⁶ Yawi nalong sa sangay taw Israel te, “Gina ban am anfoli sa angku, gngayan ban am angku te, ay mangama ay wa ban am gngayan ya angku te, Baal.

¹⁷ Kwa kaylat ya nu glong am Baal at ngayan.

¹⁸ Ginanya ban fag menit, nangawat au sik nasadian sas fagayu mangilafang laman ban wa gfauri ayu. Gbul kyangay ban siginans Israel at ngay godun ay at ngay fiso, ay wa ban e awayan ya, laman ban manabayan tua nu gtiug am.

¹⁹ Gtuyan kban te, am wan ku mangena kabavn. Ay namakamulun kban sa ayu at matuyan ay at kasakan. Ay kesug kban ayu ay kafanyu.

²⁰ Kabavn ban matuyan ktua sa ayu, ay gtuyan ban am angku te, au wan Yawi.

²¹ Ay ginanya ban fag menit, gbalus au ay ngay darangin. Au, Yawi, taglong tuy. Ay ginanya ban gfarak au laman gfatugbung ngay fananumun,

²² ngay bvtang, ngay wat ubas, ay ngay fun ulibu laman sa sangay taw Esreel.

²³ Ay namabanwan kban ayu sa ay talun laman ku ngay taw am. Kesug kban ku ngay taw ku nafangayan ebi te, Lu-Rukama, ay lumong kban te, ‘Am wan ku ngay taw,’ ebi ku nafangayan te, ‘Lu-Ami.’ Ay ginanya ban, glong am te, au wan ay Dius.”