Usea 11 - Fanawbuid tagsibaliwas Fakayabian

Dius Kesug Israel

¹ Dius nalong te, “Kesug au Israel ebi gina kanya sik masisian yay. Nafangayan au anya te, ku sisian ay nafaduksun kwan anya siginans talun Igiptu.

² Dewa katanya, dewa au gfataglayun guro ngay taw Israel, kaugat way nu kayayu angku. Kanya fagayu gfon fanggalangun ay girug ngay famaebebanglu sat fagsegan Baal.

³ Au at naulit anya fagayu. Nataban au anya fagayu, ay gfoyung au anya fagayu nu glao, ay dewa katanya, wa natoglag te, au takafanyu anya.

⁴ Naufud au anya fagayu fagdaul ku fakesugun, kata sik taw nu galaga at baka laman namafangon anya.

⁵ Aroro kanya wa kaylat kafoli sa angku, kaylat way lang nangafoli sas talun Igiptu, ay Asirya ban gagbilug anya.

⁶ Ay at ngay fawayan ban kadasug sat ngay furuan, ay nanrasras ban at ngay famalabag sakbawan. Ay at ngay fawayan ban tagfatabu fagayu at ngay algan.

⁷ Ku ngay taw namatangan nangayayu angku, nu katanya, dewa kanya fagayu masadi nangakbang sa angku, kwa ban ggubuk ya anya.

⁸ Ngay taw Israel, kwa ban gaiyan ay gfabayan ayu. Kwa ban gfamin ayu kata ku nafakamulun sa sangay furuan Adma ay Sebuyim. Kauri au sa ku amatanganan nung au gfakamulun takatanya sa ayu. Maksvn nu kafanyu au ayu.

⁹ Ay kwa ban gfasure ya at maksvn ku dotama. Ay kwa ban gfamin ngay taw Israel, aroro au wan Dius bundi au taw. Au wan at matuyan fag Dius tagufud ayu. Kwa kadasug sa ayu at ke fandotaman.

¹⁰ Galo am angku nung au gsubang kata sik liun. Ay gina au gsubang, masakit nu guli am siginans fakayabian.

¹¹ Masakit nu kadasug am kata sik ngay manuk tungud siginans talun Igiptu, ay mannga kata sik ngay labikung siginans Asirya. Gdog kyay gfauli ayu sa ay ngay fagbanwanan. Au wan Yawi taglong tuy.”

Gfaurianan Israel ay Uda

¹² Dius nalong yay te, “Ngay taw Israel malayun nu kamuagan ay nu gfalingun angku. Ay ngay taw Uda anyayu wan siginan angku, Dius at matuyan ay at yud e malong.”