Usea 1 - Fanawbuid tagsibaliwas Fakayabian

¹ Katatuy Yawi at foyungan sas Usea, Beeri at baguama, gina Usya, Utam, Akas ay Esekyas, gtudtubusan gfunan sis Uda, kaduge Erubuam, Yuas at baguama, gfunan sis Israel.

Usea fag Talanan

² Katatuy Yawi at longan taguna sas Usea, “Famubayi sik mangena takamatugtug, ay ay ngay sisian ban kangayan te, sik takamatugtug fag mangena at sisian, aroro ku ngay taw kata sik ngay takamatugtug siginan nu gseg tibak fagsegan.”

³ Nu katanya, Usea andadwa sas Gumer, Diblaim at baguina, ay siginans Usea, Gumer nafafion ay nafasalug sik munama.

⁴ Sanya ginan, Yawi nalong sas Usea te, “Fangayani am ngenge te, Esreel, aroro wa ban glugo ya gfaurianan kwan Israel at fun, aroro fun Yeu nafakamulun at mauri sas furuan Esreel. Nu katanya, gfaragang kwa ban Israel fag fagfagtainanan.

⁵ Ginanya ban fag menit, gfababawan au Israel at ngay tagfawayan sis datag Esreel.”

⁶ Ay sanya ginan Gumer gdog yay nafafion ay nafasalug sik munina. Dius nalong sas Usea te, “Fangayani kafag munina te, Lu-Rukama, aroro kwa kafanyu ya ngay taw Israel ay kwa gfalyam ya at ngay asalanan.

⁷ Dewa katanya, kafanyu kban ngay taw Uda. Au, ay Dius Yawi, namalangfe kban anya fagayu siginan ku fagmabalyananun, bundi siginans ngay tagfawayan at ngay famawayan, kata godun, fiso tagsumbalian at uyup, ay ngay kabayu ay fagayu tagsakay sanya.”

⁸ Gina Lu-Rukama yud gsusu ya, Gumer gdog yay nafafion ay nafasalug sadi yak munama.

⁹ Yawi nalong sas Usea te, “Fangayani anya te, Lu-Ami, aroro ngay taw Israel bunwa ku ngay taw ya, ay bunwa au ya at Dius.

¹⁰ Dewa katanya, kadasug ban tibak menit, gdog kyay ban kafanyu anya fagayu ay kanya ban fagayu umkayu kata lagnas sis tigyangan dagat at yud katap ya. Ay kadasug ban sik menit kanya fagayu kangayan te, ‘ku ngay sisian.’

¹¹ Ay ginanya ban, ngay taw Uda ay taw Israel gdog yay kagamut, ay gfili ban at fun. Kanya ban fagayu gdog yay kaayu sit talun, ay maksvn ban nu guseganan sis Esreel.”