Unas 1 - Fanawbuid tagsibaliwas Fakayabian

Unas wa Nafaning Yawi at Suguan

¹ Yawi nalong sas Unas, Amitay at baguama te,

² “Loi wan sas furuan daul Ninibe, ay namararang o sanya, aroro at ngay taw at fagmauriun andasug wan sa angku.”

³ Dewa katanya, kanya nananuksuan Yawi, at algan sas talun Tarsis. Kanya ndasug sas furuan Upa ay nalag sik sakayan lino tagsas Tarsis. Unas nafon at famayad ay nasakay magamut ngay tagfakamulun sis sakayan lino ay tiba yak tagsakay.

⁴ Ay kanya fag sakayan lino nu siwa sad fagngabasadan dagat, Yawi nafadasug sik maksvn fag tagmara, ay at kaksvnan nu gfulug kafag sakayan lino gakarasrasun wan.

⁵ Nu katanya, ngay tagfakamulun sis sakayan lino maksvn nu kalimu ay get gubuk sat mesa fagsegan, ay naukas at ngay famubaun sas dagat laman at sakayan lino kagan. Ay Unas gtiug way fia sit daga fag salug.

⁶ Ay sakayan lino at funan nanangakbang sas Unas, ay glong anya te, “Wain am fagtiugun fia gina katatuy at buknga? Alunggungi wan ay eti gubuk sam fagsegan. Bangaran ro kanya anfanyu ay gfalangfe antam siginans fakabulun.”

⁷ Ay kafag ngay tagfakamulun gkamatoan te, “Nanginsaful yap tam laman sumaful tam te, sinu tam at ke malong at fagindasugun sa antam takatatuy fag fagidapun.” Ay nu nainsaful wan, at kinsaful Unas at ngayan.

⁸ Ay ngay tagfakamulun nalong sas Unas te, “Kaylat ami gyasafulun te, sinu tam at ke malong fagindasugun sa antam takatatuy fag fagidapun. Nataw am fanambagun? Ay longi emi, daginan o ay sinu am mangaguyang?”

⁹ Ay Unas gbalus te, “Sik taw Ebreu au ay gseg au Yawi, Dius tagsis banwa at nawat dagat ay daga.”

¹⁰ Nu katanya, ngay tagfakamulun maksvn nu kalimu, aroro siginan Unas at nalong te, nasuksuan au Yawi. Ay kanya fagayu nalong te, “Wain am fagnafakamulunun takatanya?”

¹¹ Kadugenya, kaugat way nu gfulug, ay kafag ngay tagfakamulun sis sakayan lino gdog yay gfakamatoan Unas te, “Tain ro em fakamulun sa emu laman ro lugwak umragang ay umlangfe tuami siginans faurianan?”

¹² Ay Unas gbalus te, “Ukasi angku sas dagat, ay wa ro glugwak ya. Aroro nasaful kwa te, au wan at ke malong at fagindasugun tuy fag fulug at maksvn.”

¹³ Ay kanya fagayu wa nafaning Unas at longan, abat ngate, gugatan yay namasas tigyangan dagat at sakayan lino, dewa katanya, gidapan way aroro kaugat way nu gfulug.

¹⁴ At ngay tagfakamulun guro sas Yawi te, “Gfainfanyuan ami get sa emu te, lag o gfabayan emi nu kabul ami aroro sa em fagnamakamulunun ste fag taw. Lag ro gfauri emi nu namabul ami anya, aroro yami fia gtuyan te, e asalanan. Dewa katanya, nasaful ami te, at kindasug sa emi am fakaylatun wan.”

¹⁵ Ay kanya fagayu naurug Unas ay naukas sas dagat, ay dagat anragang nu glugwak.

¹⁶ Aroro sat kindasug, ngay tagfakamulun maksvn nu kalimu Yawi. Nu katanya, kanya fagayu nafon sik fanggalangun sas Yawi, ay nafatuyanan te, gfataglayun ban nu gfaning ay nu gseg anya.

¹⁷ Ay Yawi nafalganan sik albon daul laman nanngvp Unas. Ay Unas nu sisad basad albon, tuluk menit ay tuluk yabi.