Uel 1 - Fanawbuid tagsibaliwas Fakayabian

¹ Katatuy Yawi at longan sas Uel, Petuel at baguama.

Ngay Liung Nafamin ngay Tanuman

² Am fag ngay tagfangguna ay ngay tagbanwan sis Uda, dungugani ku longan sa ayu. Ya batang anfasludan takatatuy dewa ebi gina ay ngay mangaguyang gleleg anggan dasug katsi.

³ Foyungi ban tuy fagayu sa ay ngay sisian, ay ay ngay sisian ban gfoyung yangay sat ngay sisian, ay kanya ban fagayu gfoyung yangay anggan sat fadogan fag ngay kasugfunanan.

⁴ Ngay liung ban gungbusan namamin ay ngay tanum. Taguna fag gaban at nayud nafamin, taguyan fag gaban nangon yakmay namin.

⁵ Am fag ngay tagalangu, abangkadi ay waywayi! Aroro wam e fanmamaman ya, namin wan ay ngay tanum wat ubas at rawvg fangawat ay fanlangu.

⁶ Ngayuk liung nafamin wan ku tanuman. At ngay bagang maglat kata liun at ngay bagang.

⁷ Kanya fagayu nafamin wan ku ngay tanum wat ubas ay ku ngay kayu igus, ay naurit ngay tanum at ngay lukba yakmay namin.

⁸ Waywayi maksvn kata sik baguina tagalanbungan saku laman gfalag te, kabalu at fainduganan, aroro anbul gina ganangadadwaun.

⁹ Aroro wat ubas we rawvg ya ay we mamam ya fanlangu laman at fanggalangun sas Yawi at bale. Nu katanya, ngay tagfon fanggalangun tagfakamulun sa anya maksvn nu kabalu.

¹⁰ Fagayu at ngay tanum sit gamasun namin wan. Ay at ngay gamasun antubas wan. Fagayu at tanum wat ubas ay ngay kayu ulibu anyango wan ay at ngay gutluan namling wan.

¹¹ Am fag ngay tagtanum abalui! Ay am fag ngay tagulit wat ubas waywayi maksvn, aroro fagayu rawvg takagutlu anfangulan wan.

¹² Ngay tanum wat ubas ay fagayu, kayu kata igus, ay pumigranata, ay layag ay mansanas anyango wan. Nu katanya, fagayu taw we fagmanabayanun ya.

Darangin laman Gubun at Asalanan

¹³ Am fag ngay tagfon fanggalangun tagfakamulun si ku Dius at bale, suluni ngay saku ay waywayi maksvn fagngabak yabi aroro namin wan ngay rawvg fangawat fanlangu laman fanggalangun sa ay Dius.

¹⁴ Nanlong am sas Uda at ngay tagfangguna ay sas fagayu tagbanwan te, fagayu am loi sas Yawi at bale laman e buknga am nu yud kon, ay eti sas Yawi te, “Gubuki emi.”

¹⁵ Anud! Munakbang wan Yawi at nafalganan fag menit laman namaurianan.

¹⁶ Nalag watam nu setain tam fakonun nu kamin ay nu yud e fagmanabayanun ya sas Dius at bale.

¹⁷ Ngay bvtang wa gtugbung sit matugas fag daga. Nu katanya, wam e fagfasakboun ya sa ay ngay fagfungsuan, aroro niklas wan.

¹⁸ Dungugani, ngay fagbaugun guni aroro kalunus. Ngay baka nusnga nday way lang nu grvbvy at fakonun, ay anggan ngay tupa kalunus wan.

¹⁹ Ay Uel gdarangin te, “Yawi, guro au emu aroro ngay makmak sa sangay fagnamafangonan anyango wan, ay anggan fagayu kayu sis talun anyango yangay, kata afuy nu nafamin.

²⁰ Anggan ngay mangilafang maksvn nu gengasan gurungan get sa emu, aroro anlanggang wan ngay liskung, ay an-gong wan ngay fagnamafangonan kata afuy nu nafamin.”