Udas 1 - Fanawbuid tagsibaliwas Fakayabian

¹ Siginan angku, Udas, tam Fun Isus at fagsuguan, ay Santiagu at faduksay. Sas Dius at fakesugun fag ngay taw, ay tam Fun Isus at fagdiriun.

² Sumawa nangus fia ayu fakafanyun ay fagmanabayanun ay fakesugun.

Takamuag fag ngay Takamoyung

³ Ku ngay fakesugun, maksvn nu kaylat au griruk sa ayu sabaliwa tam fakalangfean. Dewa katanya, gtungud yay nu kaylat au griruk sa ayu sabaliwa tagfaksvn ay fagafanudun, laman mabakvd tuam sa ay nadungug fag foyungan, Dius at nafatigwanan sat nafili fag ngay taw.

⁴ Aroro wam nasaful nu kadasug sa ayu tibak taw tagfabulun gfabali foyungan sabaliwa Dius at fagmagalangun, laman mafakamulun at fagfanugtugun. Kanya wa kaylat gtoglag Isus tam Fun tam tiba tungud fag Fun. Ay siginans fakasigadan e rirukan te, kafag ngay taw gafaurianan ban.

⁵ Ay dewa am nasaful wan takatatuy, kaylat au gfamatang sa ayu sabaliwa ngay taw Israel. Tam Dius dewa nafalangfe anya fagayu siginans talun Igiptu, kanya nafaurianan at yud gafanud sa anya.

⁶ Ay amatangani yangay ngay tagbarita at naubun at ugali ay at fagbanwanan. Dius nasiuk takatanya fag ngay tagbarita ay naubung sasad fagmadulumun yakmay ban andasug fanginsafulan asalanan fag menit.

⁷ Amatangani at kinfasludan sas furuan Suduma ay Gumura, ay sat fakbangan fag ngay furuan. Aroro kanya fag ngay furuan at ngay taw gugatan sat fagfanugtugun ay sas fagmauriun. Nu katanya, Dius nafaurianan kanya fagayu sat yud karabung fag afuy. Takatanya sik famararang sas fagayu taw.

⁸ Ngay taw takamuagan at kindasug sa ayu nafakamulun yangay takatanya. Siginan at ngay taginfan, kanya nafae fagmauriun at ngay sadili, ay gfauri Dius at mabalyanan, ay gfalingun ngay tagbarita.

⁹ Mikael wan tagfangguna ngay tagbarita, dewa katanya kanya wa nafabadbaboan ay nafalingun Satanas, gina kanya fag dua gbadbaboan sabaliwa nu sinu at namul Muisis at bilug, nu bunway kata way tuy at longan, “Fun Dius waban nangus tagsalag emu.”

¹⁰ Dewa katanya, kanya fag ngay taw gfalingun nusnge wain at fagyudun gtogdungug. Kanya fagayu we amatanganan kata way ngay mangilafang, ay at fagfakamulunun at sadili way fakaylatun at namamin ban anya fagayu.

¹¹ Afanyuan kafag ngay taw! Aroro kanya fagayu nafaning Kain at fakamulun; ay maksvn nu galabian salapi kata Balaam; ay kamabo kata Kura. Nu katanya, kafag ngay taw umfaurianan yangay ban.

¹² Kafag ngay taw gina gasfuan ayu gfangon, gfae fakaplaun ayu, aroro kanya fagayu gfangkumon. Ay at fagamatanganun at sadili way lang fakaylatun. Kanya fagayu kata way at yud e arak fag linyabu, tagabuban tagmara, ay kata yangay sik tanum tagrare yud grawvg dewa ndasug fanrawvgan, ay an-gulad, ay at lalid anyango wan.

¹³ Kanya fagayu kata at kinramsaw fag burak siginans dagat nu glugwak, ay kata way sik galeme at malyaman, ay at mafalganan wan sat yud e fakatabuan fag fagmadulumun.

¹⁴ At fafituk kasugfunanan siginans Adan, Inuk. Kanya nafoyung yangay sabaliwa kafag ngay taw te, “Amatangani, tam Fun kadasug wan gadgaloan at ngay tagbarita at yud katap ya at kayuan,

¹⁵ laman kanya nanginsaful fagayu taw at asalanan, ay namaurianan fagayu taw at yud natoglag Dius, aroro takatanya fag ngay taw maksvn nu mauri ay nu glong at mauri sa anya.”

¹⁶ Kanya fag ngay taw maksvn nu kamayud, ay maksvn nu gfaning at bilug at fakaylatun, ay kamatungudun sabaliwa at sadili fakamulun, ay gfaylatan tibak taw laman mafafabul at fakaylatun.

Ngay Famararang ay ngay Faluan Longan

¹⁷ Dewa katanya, ku ngay fakesugun, kabavn amatangi tam Fun Isus at ngay nasugu at foyungan sa ayu.

¹⁸ Siginan ebi, kanya nafoyung sa ayu te, sa ban taguyan fag ngay menit kadasug takamalingun fag ngay taw, tagfaning at fakaylatun at mauri.

¹⁹ Kanya fag ngay taw gfakamulun laman gfasaruayan ayu. Ay kanya fagayu gfaning fagdaul daga at ugali, ay wa si anya at Masine fag Falad.

²⁰ Dewa katanya am, ku ngay fakesugun, maksvni tua sa ay mafanud fag fagafanudun. Darangini siginan at Masine fag Falad nu ggubuk ayu.

²¹ Kabavn banwani sis Dius at fakesugun kaduge am gfanya tam Fun Isus at fakafanyun tagfosuk ayu sat yud e fakatabuan fag leleg.

²² Gubuki tagawabilugan fag ngay taw,

²³ ay falangfei anya siginans asalanan kata nu glakwi am anya siginan sad afuy. Ay afanyui yangay tibak taw, baliwan dirii tua ay aurii at ngay asalanan tagfauri anya fagayu.

Fagusegananun

²⁴ Tam Dius tagdiri ayu laman diam gasalanan, ay kanya yangay tagfayud e malong ayu laman mafakbang ayu sat daga salubangan ke fagusegananun.

²⁵ Sadi way tam Dius tam Tagfalangfe. Siwa anya fagmasineun ay fagmabalyananun ay fagmafagtainanun ay fagmafunanun siginan tam Fun Isus siginans fakasigadan, dasug katsi ay kabavn ban. Anud.