Ubadyas 1 - Fanawbuid tagsibaliwas Fakayabian

Yawi Namaurianan Talun Edum

¹ Katatuy Yawi at longan takafasludan ban sas talun Edum, at nalong sas Ubadyas. Ami fag ngay taw Israel, nadungug ami siginans Yawi sik longan te, “E nasugu sik tagfosuk longan sa sangay talun laman nanlong te, ‘Wainyayam, namawayan watam talun Edum.’ ”

² Yawi nalong sa sangay taw Edum te, “Namakata au ayu sik yud e fagmakatuun fag talun, ay tagafalingunan maksvn sas fagayu taw.

³ Gfaseg wayam ay ngay sadili, siginan nu kamatungudun am glong te, we mababo ayu aroro gbanwan am sis wa gang tagsis tungud fungsu.

⁴ Dewa ban am kata sik bio tangabat nu glayug, ay dewa ban am nawat ay fagbanwanan kabat bio at fagfugadan, gfatong kway ban ayu. Au, Yawi, taglong tuy.”

⁵ O nunda tagfangkamul nu nasakbo sa ay bale sad yabi at fagnamulun bunwa at fakaylatun? Ay o nunda taggutlu ubas wa gfasawad ya tibak rawvg laman sat ngay yud e kwa? Dewa katanya, ay ngay fawayan ban namamin wan ayu.

⁶ Ay kanya ban fagayu nanrvbvy ay nangagbilug Isaw at ngay kasugfunanan at ngay ramraman.

⁷ Tagfadiugan ayu fag ngay talun nangaiyan ban ayu. Ay fagadgalangan fag ngay talun namabo ban ay nangaiyan ayu siginan ay furuan, ay fagayu ban at nafasfuan ayu gfangon nanrvbvy at balyawvtan laman namauri ayu.

⁸ Au Yawi, glong au te, gina kban ginsaful fag menit, namamin kban ngay taw at ke fagsafulun, ay umbul ban at mamatanganan fag ngay taw sis Edum, at ngayan yangay te, Isaw at fagagbilugun fag buksul.

⁹ Ay am fag ngay tagfawayan sis furuan Teman, gtadtaruyan ban am kalimu. Ay am tagbanwan sis Isaw at fagagbilugun fag ngay buksul, umbul ban am.

Taw Edum at ngay Asalanan

¹⁰ Aroro nafauri am ay kaiban Akub at kasugfunanan, gafaplan ban am gugat, ay kabavn ban gfauri au ayu.

¹¹ Nafabayan am tibak talun nu gfauri Erusalem. Ay nafabayan am at ngay fawayan nu gbul ay nu gafudan at ngay ramraman siginan nu gfafidfilian. Nu katanya, Israel yangay am at ngay fawayan.

¹² Wam nangus nauseganan ay kaiban fag ngay taw Uda gina gidapan. Ay wam nangus nauseganan gina e giklas at talun, ay wam nangus nafamatungudun gina kanya fagayu gidapan.

¹³ Wam nangus nasakbo sa ku ngay taw at furuan daul gina gidapan laman namul at ngay ramraman, ay wam nangus nauseganan gina gidapan.

¹⁴ Wam nangus nanamalabag sa sangay sagbatan laman namabul at nalagyu siginans Erusalem. Ay gina kanya fagayu gidapan, wam nangus nanamon anya sat ngay fawayan.

Dius Namaurianan ngay Talun

¹⁵ Munakbang wan nu nanginsaful au fagayu talun at ngay taw. Nu setain ay nafakamulun say iba, katanya yangay ban ku fakamulun sa ayu. Nu setain ay nalong say iba, katanya yangay ban at longan sa ayu.

¹⁶ Nu katanya, nu setain ku ngay taw nu gafaurianan si ku nafili fag buksul at yud e malong, namaurianan kyangay ban fagayu talun at ngay taw. Gfadasug kban sa anya fagayu at maksvn fag fagidapun, yakmay ban kanya fagayu namin.

Israel nu Gbabo

¹⁷ Dewa katanya, taw Israel ban e kasawad yay sis Buksul Siun, ay kanya ban umsik matuyan fag furuan, ay Akub ban at kasugfunanan gdog yay nangagbilug at daga.

¹⁸ Akub ban ay Use at kasugfunanan umkata sik afuy, ay namamin ban Isaw at kasugfunanan, ay Isaw ban umkata sik nagbiluganan fare at masakit nu kairug, yakmay namin. Au, Yawi, taglong tuy.

¹⁹ “Ngay taw Israel tagbanwan sis talun Negeb, nangagbilug ban Isaw at fagagbilugun fag ngay buksul. Ay ngay taw Israel tagbanwan sa sangay buksul, nangagbilug ban ngay taw Filistia at talun, ay nangagbilug yangay ban Efraim ay Samarya fag talun, ay Benamin ban at kasugfunanan nangagbilug Gilyad fag talun.

²⁰ Ngay taw Israel at natabanan sas Babilunya nangagbilug ban Kanaan fag talun sitsigons Sarefat. Ngay taw Erusalem at natabanan sas Sefarad, nangagbilug ban talun Negeb at ngay furuan ayu daul.

²¹ Ngay taw at nafalangfe ngay taw Israel nangundaud sas Buksul Siun laman namagtainan Isaw at fagagbilugun fag ngay buksul. Au Yawi tagfagtainan ban kabavn.”