Ub 42 - Fanawbuid tagsibaliwas Fakayabian

¹ Ub nalong sas Yawi te,

² “Nasaful au te, mafakamulun o fagayu, ay nusnga sinu we mafaragang emu.

³ Nainto o sa angku te, wain ku fagawabiluganun sam fagsafulun. Matuyan naringang au ku yud nayamagan, ay ku yud nasaful.

⁴ Nafakamatoan o angku ay nalong o angku te, gdungugan au sa emu ay gbalus au am ngay fagintoun.

⁵ Ebi siginan way ku iba nu gsaful au sabaliwa emu, dewa katanya, katsi nalag kwan emu.

⁶ Nu katanya, kapla au aroro sa ku ngay nalong sabaliwa emu, ay katsi gubun kwan ku asalanan siginan nu nanmalunggung au sasad dafug ay sas wa lukbu.”

Fakatabuan

⁷ Ay Yawi nu nalong wan sas Ub takatanya fagayu, kanya nalong yangay sas Elifas tagsiginans Teman te, “Kadotama au emu ay am fagadgalangan fagdua. Aroro wam nalong at matuyan sabaliwa angku kata ku fagsuguan Ub.

⁸ Nu katanya, katsi namul am fituk baka tama ay fituk tupa tama, ay namuba am sas Ub, ay namon am sa angku sik fagirugun fag fanggalangun laman famalyam ay fagmauriun. Ay Ub ro gdarangin ayu, ay gbalus kro at darangin, ay kwa ro gfaurianan ayu sat kasakan sa ay nasalan. Wam nalong at matuyan sabaliwa angku kata ku fagsuguan Ub.”

⁹ Nu katanya, Elifas tagsiginans Teman, Bildad tagsiginans Sua ay Sufar tagsiginans Naama, nafaning Yawi at suguan, ay Yawi nabalus Ub at darangin.

¹⁰ Ay Ub nu nadarangin wan at ngay fagadgalangan, Yawi gdog yay nafaramraman Ub duak kayu ebi at ramraman.

¹¹ Fagayu at ngay faduksay ay at ngay fagadgalangan nalao sa anya ay gfangon sit bale. Kanya fagayu gfasun Ub sas Yawi at nafadasug fag fagidapun sa anya. Ay galay at sadi mesa gfon sas Ub salapi, ay fanumyu at mawatan siginans gintu.

¹² Nu katanya, Yawi nafon sas Ub ngayuk ramraman, gtungud yay ebi taguna. At nafon anya labi ufatk libuk tupa, ay unumk libuk kamelyu, sadik libuk baka dadwa, ay sadik libuk tina asnu.

¹³ Ay nafon yangay anya fituk sisian mangama ay tuluk sisian mangena.

¹⁴ At kaka fag baguina at ngayan Emima, ay at faglon Kesya, ay at ngenge Keren-Apuk.

¹⁵ Sas fagdaul talun kanya wa fag tulu at masine. Ay Ub nafon yangay sa anya fag tulu at ramraman, kata at ngay faduksay mangama.

¹⁶ Siginan ginanya, Ub nu gleleg sadi yak sandan ufatk safuluk banwa. Ay kanya nalag yay at ngay fufu anggan sfaufatk kasugfunanan.

¹⁷ Ub mafufuama wan gina kabul.