Ub 30 - Fanawbuid tagsibaliwas Fakayabian

Ub at ngay Fagidapun

¹ Dewa katanya, katsi ku ngay mun fag ngay mangama gfalingun wan angku aroro at ngay mama bunwa ya sik ngay fagfatigwanan. Amasine yap tua ngay idu tagalaga ku ngay fagbaugun nu gamut kanya fagayu.

² Nataw ro at fanambagun sa angku kanya fag ngay taw at momuy ay takalufuy?

³ Kanya fagayu maniwang aroro maksvn wan nu gidapan ay nu kalunus, ay kurit wan ngay tanum tagsit magong fag lutuk sis talun at yud e taw.

⁴ Ay kanya fagayu ggunut ngay tanum tagsisad talun ay kon wan, anggan at lalid.

⁵ Ay e naiyan anya fagayu siginan at ngay kaiban, ay guro gaiyan anya fagayu kata nu gaiyan sik ngay tagfangkamul.

⁶ Kanya fagayu nu gbanwan siway lang sangay luib, ay si sangay lusung ay si sangay salifitan gang.

⁷ Ay kanya fagayu gfangunian kata sik ngay mela tagsisad talun ay kedkenbungan gsarirung si sik daga funfun.

⁸ Kanya fagayu kata nu yud e fanambagun ya ay we gtoglag ya anya fagayu, ay nustua e naiyan wan anya fagayu siginan at talun.

⁹ Ay katsi kafag ngay baguama nu gfalingun angku galubadan tua, ay katsi au kafag ngay taw kway lang at fagfalingunun.

¹⁰ At kaksvnan kanya fagayu nu kauri angku gsaruyan wan, ay wa gadgaragun ya gtufe ku kamatan.

¹¹ Katsi Dius gfamomuy ay gfaidapan angku, kanya fagayu nafakamulun sa angku kata at ngay fakaylatun.

¹² Kanya fag ngay taw mauri nafawayan angku, ay nafae sangdaw si ku dalan, kanya fagayu e algan namaurianan angku.

¹³ Kanya fagayu gfae mauri ku dalan laman namabul angku, ay gbabo deyud e ggubuk ya anya fagayu.

¹⁴ Kanya fagayu namawayan angku kata sik ngay tagfawayan at dalan sat kinrufa fag afud alad.

¹⁵ Ay anke fakalimuun au maksvn, ay ku fagmasineun masakit way lang nalyam, kata sik tagmara at magaras nu nauyup, ay ku ngay ramraman nalyam yangay kata linyabu nu nalyam.

¹⁶ Ay katsi kata wa nu gakabulun au, ay ku fagidapun wa karagang ya.

¹⁷ Galay yabi ku ngay bini masait, ay wa kalyam ya nu ganini.

¹⁸ Dius nafauri angku siginan at fagmabitsugun ay nated ku lanbung tagsi ku liug baliwa ay naranggut.

¹⁹ Ay naukas angku sasad lifak, ay nalukbuun au.

²⁰ Dius, naet au gubuk sa emu ay wo nabalus angku. Malindug koma gugat sim akbang ay wo kasalag angku.

²¹ Siginan am fagmabalyananun, kauri o ay gfaidapan angku.

²² Kata nu naukas o angku sas tagmara, ay kata nu naukas o angku sas fulug.

²³ Nasaful au te, gbuba o angku sat kinbul at talun sam nafalganan fag talun laman sas fagayu taw.

²⁴ Gtuyan au te, kwe nafauri nusdi sadik taw tagidapan ay taget gubuk.

²⁵ Nawayway au laman sa tagidapan fag ngay taw ay sat yud e kwa.

²⁶ Ay nu au ngap tagseg te, ggubuk ro angku, kanya fagayu at fakamulun sa angku mauri way, ay ku fagsegun takadasug sa angku fagmayamagun tua, ay aroro mangaro at kindasug fagmadulumun way.

²⁷ Nu katanya, tagfamomuy ku amatanganan wa karagang ya, ay kayu menit fagidapun way lang takadasug sa angku.

²⁸ Ku balat at faginlayungun bunwa siginans baksak, nu bunway siginan way ku fakasaitun, ay malindug au sis fagngayuan taw ay get au gubuk.

²⁹ Ay nu garingang au, kata idu talun nu gsubang ay kata sliaw nu guni.

³⁰ Ku balat anlayung ay anlusi way lang ay ku bilug masugba.

³¹ Ay mabaluanan kway lang gdungugan nu e gfawang ku fagfawangun ke ngay bakyang ay tulali.