Ub 20 - Fanawbuid tagsibaliwas Fakayabian

Sufar Naringang

¹ Ay Sufar tagsiginans Naama nabalus te,

² “Garingang au aroro kwa kagwanta ya.

³ Nasalag o angku ay nafamatanganan o angku laman gbalus emu.

⁴ Nasaful wo siginan yay ebi sfagsigadan, siginan nu kawat taw ste swa daga,

⁵ at mauri fag taw wa ngaduge nu manabayan, ay sik taw at yud gafanud sas Dius wa ngaduge nu e fagusegananun.

⁶ Kanya nu gdama at sadili dewa kabat sbanwa ay slinyabu,

⁷ kanya ban umtabu way kata sik nakaurian. Ay tagtoglag anya fag ngay taw rumvbvy ban anya.

⁸ Kanya umkalyam kata sik taginfan at yud ya gdog kamatang.

⁹ Ngay taw at nalag anya ebi, wa ban gdog ya glag anya. Kanya umkalyam wan siginan at fagbanwanan.

¹⁰ At ngay sisian wan at namafoli at ngay nafangkamul siginan tagidapan fag ngay taw.

¹¹ Kanya mabitsug ay mabaguama yay nu kabul.

¹² At mauri fag fakamulun, kata sik fakonun at matamis,

¹³ at nafangamsak fia masine.

¹⁴ Ay dewa katanya, nu ndasug sat ungdan, kanya ankenal way, ay ansuya kata nu naon sik ule at ganga.

¹⁵ Ay kanya ban kata nu nansufa at nafangkamul fag ngay ramraman, Dius namafangkok ban anya dewa siwa at basad ungdan.

¹⁶ Kanya kata nu nangvp ngay ule at ganga, ay kanya wan at nafabul anya.

¹⁷ Kanya ban we nabul ya langis ay susu bilug ay deut tagfamilugan kata sik liskung.

¹⁸ Ay wa ban e gfafoli ya sa anya at nainlufuyan, ay wa ban guseganan ya sat ramraman.

¹⁹ Kanya nafabayan wan ngay tagidapan, nustua, naago wan at ngay bale.

²⁰ Kanya gfangalabian gugat, ay at ramraman wa mafalangfe anya.

²¹ Wa ban e sawad si anya at ngay fakonun aroro umkamin ban at ngay ramraman.

²² Gina yay ban e ramraman, umdasug ban sa anya at maksvn fag fagidapun.

²³ Kafag taw gina manabayan, Dius maksvn nu kadotama anya, ay gfadasug at faurianan.

²⁴ Kanya dewa anlagyu sis fiso, gatayukan yay ro fia banyas.

²⁵ Kanya fag banyas naurus at mayat ay natalfus sat guyuy. Ay kanya nu nalag gtadtaruyan kalimu.

²⁶ Ay kanya at ramraman umkalyam wan. Ay e mirug anya gasfuan fagayu at kinfamato sit fagbanwanan, at nafaigang kafag afuy, bundi taw.

²⁷ Banwa gfasure at ngay asalanan, ay daga gfasaful sabaliwa anya.

²⁸ Ay gina ban Dius nafadasug at dotama, lugwak ban namalimus at bale.

²⁹ Katanya ban at mauri fag taw at fakadasugan. Dius wan at nafalganan fagayu takatanya sa anya.”