Uan 9 - Fanawbuid tagsibaliwas Fakayabian

Isus Nafafia sik Taw Yud Glag

¹ Gina Isus gdalan nalag sik mangama yud glag siginan nu kasalug.

² Ay at ngay tagadal ginto anya te, “Takamoyung, sinu at ke asalanan, in fag mangama at fagyudun glag, o sia wan ay o mannga at ngay fagtainan?”

³ Ay Isus gbalus te, “Tuy fag mangama at fagyudun glag, bunwa sia ay at ngay fagtainan at ke asalanan, nu bunway laman Dius at fagmabalyananun umsure siginan nu gfafia anya.

⁴ Kaduge mamenit yay, masine nu gfakamulun tam at nasugu angku at fagyafakamulunun. Aroro nu nyabi wan, we taw ya mafakamulun.

⁵ Kaduge au ste swa daga, au wan fagmayamagun sas fagayu taw.”

⁶ Ay Isus nu nalong wan takatanya, kanya natufe sas daga ay nawat lifak siginan at tufe, ay nafatayuk sa kafag mangama at mata.

⁷ Ay sanya ginan, Isus glong anya te, “Loi wan sas Siluam fag fagigusan ay namegus o am mata.” (Siluam at masuad te, Nasugu.) Ay kafag taw at yud glag nafaning, ay gina kafoli glag wan.

⁸ Nu katanya, at ngay fasabale ay tibak taw at nalag anya ebi gina gfanget, nalong te, “O nunda bunwa in fag mangama taget gugat?”

⁹ Ay tibak taw glong te, “Sabv.” Ay tibak taw glong way te, “Duan! In takata way at kamatan.” Ay kafag mangama glong te, “Au wan.”

¹⁰ Ay kafag ngay taw ginto anya te, “Setain nu namadama o?”

¹¹ Ay kanya nabalus te, “Sik mangama at ngayan Isus nawat sik lifak ay nafatayuk sa ku mata, ay nalong sa angku te, ‘Loi sas Siluam ay namegus o am mata.’ Ay nalo au sanya ay nafegus au ku mata, ay glag kwan.”

¹² Ay kafag ngay taw gdog yay ginto anya te, “Dada wan am nalong fag mangama?” Ay kanya nabalus te, “Kwa saful.”

Ngay Taw Fariseu Nainsaful sabaliwa nu Kafia

¹³ Sik ngay taw nataban at yud dan glag sa sangay taw Fariseu.

¹⁴ Isus nu kawat lifak ay nu gfafia at yud glag, gina Famiangalay fag Menit.

¹⁵ Ay sanya fag ngay taw Fariseu ginto sat yud dan glag te, “Tain nu kafia o?” At yud dan glag gbalus te, “Isus nafatayuk sa ku mata lifak ay sanya ginan nanamegus au ay glag kwan.”

¹⁶ Ay tibak taw Fariseu glong te, “Kafag taw wa siginans Dius, aroro dewa sis Famiangalay fag Menit, gfakamulun way.” Ay tibak taw glong te, “Tain ro kanya nu mafafakamulun at ngay madulo fag fakamulun nu sik tagasalanan way?” Ay kafag ngay taw at amatanganan wa masadi.

¹⁷ Nu katanya, kafag ngay taw gdog yay ginto sat yud dan glag te, “Ay nu sa emu, tain am longan sabaliwa anya, dakngani kanya nafafia am mata?” Kanya gbalus te, “Kanya Dius at taglong.”

¹⁸ Ay taw Udyu at ngay tagfangguna wa gafanud te, kanya wa ngaro fia yud dan glag, ay kanya nafauro kafag taw at fagtainan,

¹⁹ ay ginto anya te, “O tuy ay baguama, ay longan te, wa glag siginan nu kasalug? Wain katsi at faglagun wan?”

²⁰ At ngay fagtainan gbalus te, “Sabv, kanya em baguama, ay saful ami te, wa glag siginan nu kasalug.

²¹ Dewa katanya, yami saful te, wain katsi at faglagun wan. Yami yangay saful te, sinu at nafafia anya. Intoi wa sa anya, kanya mafagtainan wan. Mafafoyung wa ro sabaliwa at sadili.”

²² At fagtainan at fagnalongun katanya, aroro kalimu taw Udyu at ngay tagfangguna, aroro kanya fagayu ansadi te, aiyani wan siginans bale fakafulan nusnga sinu tagfoyung te, Isus, Dius at nafili fag Fun.

²³ Kanya wan at ngay fagtainan at fagnalongun te, “Kanya mafagtainan wan, sai wa anya nu ginto am.”

²⁴ Ay kafag ngay tagfangguna gdog yay gfauro at yud dan glag ay glong anya te, “Sis Dius at daga salubangan foyungi sa emi at matuyan. Nasaful ami te, kanya fag taw sik tagasalanan way.”

²⁵ Kanya gbalus, “Kwa saful te, o kanya sik tagasalanan way, ay mannga duan. Ku fagsafulun, dan au yud glag, ay katsi glag kwan.”

²⁶ Ay kafag ngay taw ginto anya te, “Setain at nafakamulun sa emu? Setain nu gfafia emu?”

²⁷ Kanya gbalus te, “Nafoyung kwa ayu, ay dewa katanya, wam gafanud. Ay wain ay fakaylatun yay gdungug ku famalus? O kaylat am laman at ngay tagadal yangay am?”

²⁸ Ay kanya fagayu gfalingun glong te, “O way at tagadal.

²⁹ Nasaful ami te, Dius naringang sas Muisis, ay wami saful te, daginan kanya fag taw.”

³⁰ Kafag mangama gbalus te, “Kanya wa ngaro at madulo. Wam nasaful te, daginan kanya, dewa nafafia ku mata.

³¹ Nasaful watam te, Dius wa gdungugan ngay tagasalanan, nusnga sinu way lang tagfakamulun at fakaylatun at fagdunguganun.

³² Siginan ngay ebi, ya tam e nadungug sik taw at mafafia sik yud glag siginan nu bagu kasalug.

³³ Kanya fag taw nu dway siginans Dius wa ro mafafakamulun.”

³⁴ Kafag ngay tagfangguna gbalus te, “Siginan yay nu bagu o kasalug sik tagasalanan wo, ay katsi kamoyung yay o sa emi.” Ay kafag ngay taw naiyan wa anya siginans bale fakafulan.

Sas Fanfalad fag Fagyudun Glag

³⁵ Isus nadungug te, taw Fariseu naiyan kafag taw at yud dan glag. Ay kanya nalo sa kafag mangama ay ginto te, “O gafanud o sas Taw at Baguama?”

³⁶ Ay kafag mangama gbalus te, “Fagtainan, longi angku sinu kanya. Kaylat au gafanud sa anya.”

³⁷ Isus glong te, “Nalag wo anya. Katsi tagfakamatoan emu, kanya wan.”

³⁸ Kafag mangama gbalus te, “Ku Fun, sabv, gafanud au.” Ay kanya gtudan sas Isus at daga salubangan.

³⁹ Ay Isus glong anya te, “Ku fagindasugun ste swa daga laman nanginsaful au fagayu taw te, o e asalanan, laman at ngay yud glag, glag tua ban, ay at ngay taglag wa ban glag.”

⁴⁰ Tibak taw Fariseu at malindug sanya nadungug ay ginto Isus te, “O am longan at masuad te, wami yangay glag?”

⁴¹ Isus gbalus, “Nu dway am glag, wam nangus e asalanan. Ay aroro glong am te, ‘Glag tuami,’ nu katanya, e asalanan yayam.”