Uan 19 - Fanawbuid tagsibaliwas Fakayabian

¹ Pilatu nasugu ngay tagfawayan laman namalang Isus.

² Ay kafag ngay tagfawayan nawat sik sangbo at madugi ay nafasas Isus at alfuyu, ay nafalanbungan anya sik lanbung masialungan.

³ Ay kanya fag ngay tagfawayan gsadsadian nangakbang sa anya ay glong te, “Tubus, taw Udyu at Fun!” Ay sanya ginan nafalang Isus at fingi.

⁴ Ay Pilatu nadog yay naduksun ay nalong sa sangay taw Udyu te, “Gfadog au gfasalubang sa ayu kafag taw laman gfasaful au sa ayu te, kwe nalag at asalanan.”

⁵ Ay Isus naduksun gasangboan madugi ay galanbungan masialungan. Ay Pilatu nalong sanya fag ngay taw te, “Damai tuy fag taw.”

⁶ Ay ngay fun tagfon fanggalangun ay at ngay tagulit nu nalag Isus, kanya fagayu gbarisanan guro te, “Tuktuki anya sas fasulungan kayu!” Ay Pilatu glong sanya fag ngay taw te, “Am wan tagtuktuk anya sas fasulungan kayu. Aroro, au, kwe nalag tuy fag taw at asalanan.”

⁷ Ngay taw Udyu at ngay tagfangguna gbalus te, “E faugali ami, ay gfaning em faugali masine kanya nu kabul, aroro kanya nalong te, ‘Au wan Dius at Baguama.’ ”

⁸ Nu katanya, Pilatu kaugat yay nu kalimu nu nadungug kafag ngay taw at longan.

⁹ Ay kanya nadog yay nasakbo sat bale daul ay nainto Isus te, “Daginan o fia fag talun?” Dewa katanya Isus wa gbalus.

¹⁰ Ay Pilatu nalong te, “Wain am fagyudun gbalus ya angku? O nunda wo saful te, e fagmabalyananun au gfalfas emu, ay e fagmabalyananun kyangay gtuktuk emu sas fasulungan kayu?”

¹¹ Ay Isus nabalus anya te, “Wo e fagmabalyananun sa angku nu dway nafon emu siginans banwa. Nu katanya, at nataban angku sa emu at ngay asalanan amaksvn yap am asalanan.”

¹² Ay sanya ginan Pilatu ankugat yay nu gafalfasun Isus. Ay taw Udyu at ngay tagfangguna gbarisanan guro te, “Nu nafalfas way ro wo kanya fag taw, bunwa o talun Ruma at fun at fagadgalangan. Aroro nusnga sinu fag taw taglong te, ‘Sik fun au,’ kanya gfauri way talun Ruma at fun.”

¹³ Pilatu nu nadungug takatanya, nafaduksun Isus ay nananmalunggung sas fagnanginsafulan asalanan fag faglunggungan sis fagawean at ngayan te, at Nafadatag fag Gang. Sas Ebreu fag fangaringang at ngayan te, Gabata.

¹⁴ Ginanya fag menit Famalganan ngay fakonun laman sas fagmafulun sabaliwa Tagbarita nu Glangfe. Ay nu gakawabilugun menit wan, Pilatu nalong sa sangay taw Udyu te, “Tuy wan ay fun.”

¹⁵ Ay kafag ngay taw gbarisanan guro te, “Fabuli wan. Fabuli wan. Tuktuki sas fasulungan kayu!” Ay Pilatu ginto e, “O gtuktuk kwan ay fun sas fasulungan kayu?” Ay ngay fun tagfon fanggalangun gbalus te, “We tiba em fun nu bunway talun Ruma at fun.”

Nu Gtuktuk Isus sas Fasulungan Kayu

¹⁶ Ay Pilatu nafatigwanan Isus sa sangay taw Udyu at ngay tagfangguna, laman nantuktuk sas fasulungan kayu. Nu katanya, ngay tagfawayan natabanan Isus.

¹⁷ Sanya ginan Isus gfasanan at fasulungan kayu ay nalao sa sik talun at ngayan Butul Alfuyu. Sas Ebreu fag fangaringang at ngayan, Gulguta.

¹⁸ Ay nu ndasug sanya fag talun, kanya fag ngay taw natuktuk anya sas fasulungan kayu gasfuan duak taw gsumbalian anya.

¹⁹ Pilatu nafariruk sik rirukan ay nafadafut sis fasulungan kayu. Katatuy kafag rirukan: Isus fag Taw Nasaret, ngay Taw Udyu at Fun.

²⁰ Ngayuk taw Udyu at natap kanya fag rirukan aroro Isus at fakatuktukan munakbang sis furuan daul. Kafag rirukan anriruk sas Ebreu ay sas Ruma ay sas Griegu fag ngay fangaringang.

²¹ Ngay fun tagfon fanggalangun nalong sas Pilatu te, “Lag o griruk te, ‘Taw Udyu at Fun,’ nu bunway, ‘Tuy way fag taw at nalong te, sia wan taw Udyu at Fun.’ ”

²² Ay Pilatu nabalus te, “Ku nariruk, anriruk wan.”

²³ Ngay tagfawayan nu natuktuk wan Isus, kanya fagayu nafuyut Isus at ngay lanbung ay nafud sas ufat, tagsadi galay tagfawayan. Ay nafasawad Isus at lanbung aba at yud e simat.

²⁴ Ay kafag ngay tagfawayan gkamatoan te, “Lag tam ggirat tuy fag lanbung, nangawat way tam sik fakasafulan laman sumaful tam te, sinu ro tagagbilug.” Anfasludan takatanya laman gfafasludan Dius at Longan te, “Kafag ngay taw nafudan ku ngay lanbung, ay kanya ban fagayu gukas gang, laman sik fakasafulan te, sinu ban tagagbilug ku lanbung aba.” Kata kanya ngay tagfawayan at nafakamulun.

²⁵ Isus at mina ay at bay, ay Kleupas at mangena fag Maria, ay Maria Magdalena, malindug munakbang sis Isus at fasulungan kayu.

²⁶ Ay Isus nu nalag at mina ay at fakesugun fag tagadal nu malindug sanya, kanya nalong sat mina te, “Tuyani anya te, am baguama.”

²⁷ Ay Isus nalong yangay sa kafag tagadal te, “Tuyani anya te, am mina.” Ay siginan ginanya, kafag tagadal kaylat Maria nu gbanwan sit bale.

Isus nu Kabul

²⁸ Ay sanya ginan, Isus nasaful wa te, antabu wan fagayu nusnge wain, ay kanya nalong te, “Kadanum au.” At fagnalongun takatanya laman gfafasludan Dius at Longan.

²⁹ Ay sanya e sik fagsuadan at mayat fag sanggvtan. Ay e nafasurung sanya fag sanggvtan sik fanrarus ay natvgdan sa sik faltu laman gdasug sas Isus at bibig.

³⁰ Ay Isus nu nasupsup wan, kanya nalong te, “Anfasludan wan.” Sanya ginan kanya narungan ay anbul wan.

³¹ Ginanya fag menit, Famalganan ngay fakonun, ay taw Udyu at ngay tagfangguna wa kaylat Isus at bilug nu si yays fasulungan kayu gina Famiangalay fag Menit, aroro ginanya tiba tungud nu mafanud fag Famiangalay fag Menit. Nu katanya, kanya fagayu get sas Pilatu te, “Fagatvngi at ngay matuktukan sis fasulungan kayu at ngay bini bitis, ay fadagai wan at ngay bilug.”

³² Nu katanya, ngay tagfawayan nalao wan laman nanggatvng kafag duama at ngay bini bitis.

³³ Ay kanya fagayu nu ndasug sas Isus, nalag te, Isus anbul wan, ay wa nagatvng ya Isus at bini bitis.

³⁴ Dewa katanya, at sadik tagfawayan naurus Isus at tigyangan, ay Isus at taguk gasfuan sik mamam masakit ankugwag.

³⁵ Ay nalag au at kinfasludan sas Isus, ay nafoyung au sa ayu. Ku ngay nalong matuyan ay nafoyung au sa ayu takatanya laman gafanud yangay am.

³⁶ Ngay taw nafakamulun sas Isus takatanya laman gfafasludan Dius at Longan te, “Nusdi sadi at bini di n-gatvng.”

³⁷ Ay sa tibak afud Dius at Longan nafoyung yangay te, “Ngay taw ban lumag at naurusan fag taw.”

Nu Namoli Isus at Bilug

³⁸ Ay sanya ginan, Use fag taw Arimatea, nalao sas Pilatu laman nanget Isus at bilug. Use, Isus at tagadal at sadi, dewa katanya kanya wa nafasaful sas nusnga sinu, aroro kalimu taw Udyu at ngay tagfangguna. Ay Pilatu naylat. Nu katanya, Use nalao laman namul Isus at bilug.

³⁹ Nikudemu, at kindasug ebi sas Isus sisad yabi, nanangalo Use, ay kanya gbuba ngayuk famaebebanglu, at mabyat nu kaurug.

⁴⁰ Ay nu katanya, duama nabul Isus at bilug ay nararus sa anya at famaebebanglu ay nasifig sa tangaba fag ngay ramit, gfaning ngay taw Udyu at ugali nu namoli.

⁴¹ Ay sis fagtuktukan Isus e munakbang sik tanuman, ay sanya fag tanuman e sik bagu fagfolian at yud batang e nanamoli.

⁴² Aroro ginanya fag menit, Famalganan way ngay fakonun, sanya wan duama nu gfoli Isus at bilug, aroro munakbang sanya kafag fagfolian.