Uan 15 - Fanawbuid tagsibaliwas Fakayabian

At Matuyan fag Fun Wat Ubas

¹ “Au wan at matuyan fag fun wat ubas, ay ku Mama tagalaga.

² Ay ku ngay sanga at yud grawvg, ku Mama ggatvng wan, ay tagrawvg fag ngay sanga, ku Mama galaga laman ngayu nu grawvg.

³ Ansine tuam siginan ku nafoyung sa ayu fag longan.

⁴ Banwani si angku ay gbanwan kyangay si ayu. Sik sanga nu dway masugfun sit bilugan wa grawvg. Katanya yangay, nu dway am gbanwan si angku wam grawvg.

⁵ “Au wan fun wat ubas, ay am at ngay sanga. Tagbanwan si angku, ay si kyangay anya, ngayu kanya nu grawvg. Wayam masugfun si angku, wam e fagmakatuun nusnge wain.

⁶ Nusnga sinu at yud gbanwan si angku, kanya kata sik ngay sanga at kin-gong ay fagukasun. Ay sanya ginan gfaful kafag ngay sanga ay nangukas sasad afuy laman nangirug.

⁷ Nu gbanwan tuam si angku, ay ku ngay longan gbanwan si ayu, eti nusnge wain ay fakaylatun, ay gfon kwa fia ayu.

⁸ Gfafauseganan am ku Mama nu ngayu tua ay rawvg, ay nu katanya tua, gfatuyan am te, am wan ku ngay tagadal.

⁹ Kesug au ayu kata ku Mama nu kesug angku. Banwani sa ku fakesugun.

¹⁰ Nu gfaning tuam ku ngay suguan, gbanwan tuam sa ku fakesugun, kata nu gfaning au ku Mama at ngay suguan ay gbanwan sat fakesugun.

¹¹ “Ku fagnafoyungun ayu takatanya laman guseganan tuam kata angku, ay laman kaksvn nu guseganan am.

¹² Katatuy ku suguan ayu, edkesugani tua kata nu kesug au ayu.

¹³ We gtungud ya sik taw nu kesug, nu nafon wa at leleg sat ngay fagadgalangan.

¹⁴ Am wan ku ngay fagadgalangan nu gfaning tuam ku ngay suguan.

¹⁵ Kwa gfangayan ya ayu te, fagsuguan, aroro sik fagsuguan wa saful at tagfayafun at fakamulun, nu bunway gfangayan au ayu te, ku ngay fagadgalangan am, aroro nafoyung kwa sa ayu fagayu ku ngay nadungug siginan ku Mama.

¹⁶ Bunwam at nafili angku, nu bunway nafili au ayu laman glo am ay grawvg am, ay laman ay rawvg gbanwan kabavn. Ay ku Mama namon ayu nusnge wain ay fagetun sa ku ngayan.

¹⁷ Ay gsugu au ayu te, edkesugani.

Ngay Taw Tagfaning at Mauri fag ngay Ugali Kauri Tagafanud sas Isus

¹⁸ “Ste swa daga fag ngay taw nu kauri way ayu, safuli te, au wan taguna at fakaurian.

¹⁹ Nu gfaning way ro am ste swa daga fag ngay taw at ugali, kanya fagayu kesug ayu. Ay dewa katanya wam gfaning ya ste swa daga, nu bunway nafili kwa ayu sanya ginan fag ngay taw, nu katanya, kanya fag ngay taw kauri ayu.

²⁰ Amatangani ku longan ayu te, we fagsuguan tagtungud at fun. Kafag ngay taw nu nafaidapan way angku, gfaidapan yangay ban anggan ayu. Ay kanya fagayu nu gfaning tua ku ngay longan, gfaning yangay ban anggan ay longan.

²¹ Ay kanya fagayu namakamulun ban sa ayu takatanya aroro gafanud am sa angku; fakatanyaun, kanya fagayu wa natoglag at nasugu angku.

²² Nu dakway ro nastie ay nafoyung sanya fag ngay taw, satu ro kanya fagayu we asalanan. Ay nu katanya, katsi kafag ngay taw we famanlonganan ya te, ‘Wami e asalanan.’

²³ Nusnga sinu takauri angku kauri yangay anggan ku Mama.

²⁴ Nu dyaman au nafakamulun at yud e mafafakamulun fag ngay madulo si sangay taw at daga salubangan, kanya ro fagayu we asalanan. Dewa katanya, kanya fagayu nalag oma ku nafakamulun ay kauri way angku ay ku Mama.

²⁵ Ay siginan kafag ngay taw at nafakamulun takatanya, anfasludan at marirukan sit Faugali te, ‘E kauri ban angku deyud au e asalanan.’ ”

²⁶ Ay Isus nalong te, “Kafag Tagfasun ban nu ndasug, namatuyan sabaliwa angku. Kanya at matuyan fag Falad siginan ku Mama ku fagnansuguun ban sa ayu.

²⁷ Ay am yangay ban ku tagfatuyan sas fagayu taw, aroro siginan ngays fakasigadan gadgaloan watam gugat.”