Uan 1 - Fanawbuid tagsibaliwas Fakayabian

At Longan sik Taw Fia

¹ Siginans fakasigadan, Longan sanya wan. Ay kafag Longan gufud Dius ay kafag Longan Dius.

² Siginans fakasigadan, kanya magamut gugat sis Dius.

³ Siginan anya ankawat fagayu nusnge wain, ay nu dway siginan anya fagayu nusnge wain wa nkawat.

⁴ Kafag Longan leleg, ay kafag leleg kanya wan fagmayamagun sas fagayu taw.

⁵ Ay kafag fagmayamagun gdamlag sis fagmadulumun, ay kanya kabavn di gababawan fagmadulumun.

⁶ Ay Dius nasugu sik taw at ngayan Uan.

⁷ Kanya andasug laman namatuyan sabaliwas fagmayamagun ay siginan at foyungan fagayu taw gafanud.

⁸ Uan bunwa fagmayamagun, ay at fagindasugun laman namatuyan sabaliwas fagmayamagun.

⁹ Andasug wan at matuyan fag fagmayamagun tagdamlag sas fagayu taw sas fagdaul daga.

¹⁰ Kanya andasug sas fagdaul daga. Ay siginan anya ankawat fagdaul daga. Dewa katanya, ngay taw wa natoglag anya.

¹¹ Ay kanya dewa andasug sat sadili furuan, at ngay kaiban wa naylat anya.

¹² Ay dewa katanya, nusnga sinu at naylat ay at nafanud sa anya, kanya natuyan kafag ngay taw te, Dius at ngay sisian.

¹³ Dius at ngay sisian nu kasalug di kata sik mangena nu gfasalug at sisian ay di kata sik taw at fakaylatun ay at algan, nu bunway siginan tua Dius at algan.

¹⁴ Ay kafag Longan ansik taw ay nabanwan magamut antam. Ay nalag ami at fagmasineun. Kanya Dius at mafilian fag Baguama. Ay kanya andasug siginan at Mama, mapnu fag fagmagalangun ay fag fagmatuyanun.

¹⁵ Uan nafatuyan sa baliwa anya te, “Tagguyan ban angku gtungud tua angku, aroro kanya sanya wan siginan yay nu yud au ansalug.”

¹⁶ Aroro kanya maksvn nu magalang ay matuyan, fagayu tam mul tam at fagmagalangun yud e fakatabuan.

¹⁷ Dius nafon antam at Faugali siginans Muisis, dewa katanya at fagmagalangun ay at fagmatuyanun andasug siginan tam Fun Isus.

¹⁸ Kabavn we taw nalag Dius. Ay dewa katanya, at mafilian fag Baguama at nafatoglag Dius sas fagayu taw, kanya Dius yangay ay gbanwan sit Mama.

Uan Tagfasurung at Foyungan

¹⁹ Taw Udyu at ngay tagfangguna sis Erusalem nasugu tibak tagfon fanggalangun ay tibak taw Lebi laman nanginto sas Uan te, “Sinu o?”

²⁰ Ay Uan wa nadgaragun gfatuyan sa kafag ngay taw te, “Bunwa au Dius at nafili fag Fun.”

²¹ Ay kafag ngay taw nadog yay nainto sas Uan te, “Nu katanya, sinu way o? O o wan Elyas?” Ay Uan nabalus te, “Duan.” Ay kafag ngay taw nadog yay fia nainto te, “O o wan em fagfanyaun fag taglong takadasug ban?” Uan nabalus te, “Duan.”

²² Ay kanya fagayu nainto te, “Nu katanya, sinu way o fia? Foyungi emi laman e fagmafoyungun ami sat ngay nasugu emi. Nataw am foyungan sabaliwa am sadili?”

²³ Ay Uan nabalus te, “Au wan at fagfatungulan, Isayas fag taglong at foyungan ebi te, ‘Si bans talun at yud e taw, e guro te, Faturunani tam Fun at dalan.’ ”

²⁴ Ay kafag ngay taw Fariseu

²⁵ nainto sas Uan te, “Wain am fagfasurungun, ay bunwa o Dius at nafili fag Fun, ay Elyas, ay Dius at nafatuyanan takadasug ban fag taglong?”

²⁶ Ay Uan nabalus te, “Au gfasurung kway lang sasad mamam, dewa katanya e sadi yay at magamut si ayu ay fagyudun toglag.

²⁷ Kanya ban tagguyan angku, kwa masine nusdi at fagsuguan laman at nanluas at fansalod at lapak.”

²⁸ Anfasludan takatanya sis Betanya, sis dife Liskung Urdan sit fagfasurungan.

Dius at Tupa Riangan

²⁹ Balabag di, Uan nalag Isus nu kakbang, ay nalong anya te, “In Dius at Tupa Riangan, at namalyam ngay taw at asalanan sas fagdaul daga.

³⁰ Kanya wan ku longan ayu te, e kadasug ban tagguyan angku, kanya gtungud tua angku aroro kanya sanya wa gugat siginan yay nu yud au ansalug.

³¹ Kya yangay fia natoglag anya ebi taguna, ay ku fagindasugun, namasurung kway ayu sasad mamam laman namatoglag anya sas taw Israel.”

³² Uan nafatuyan te, “Nalag au at Masine fag Falad nu kadaga siginans banwa kata sik labikung, ay gbanwan si anya.

³³ Kya fia natoglag anya ebi taguna, dewa katanya, at nasugu angku laman namasurung ngay taw sas mamam, nalong angku te, ‘Nu lumag ban o at Masine fag Falad nu kadaga siginans banwa ay gbanwan sa sik taw, kanya ban tagfasurung ngay taw sat Masine fag Falad.’

³⁴ Nalag au fia anya, ay gfatuyan kwa fia ayu te, kanya wan Dius at Baguama.”

Isus Nafili Taguna at ngay Tagadal

³⁵ Ay balabag di, Uan ay at tagadal at dua gdog yay sanya.

³⁶ Ay Uan nalag Isus nu gdalan, ay nalong te, “In Dius at Tupa Riangan.”

³⁷ Ay at tagadal fagdua nu nadungug at longan, kanya nangalo Isus.

³⁸ Isus anbiling ay nalag kanya fag dua nu galo anya. Ay kanya nainto te, “Nataw ay fagrvbvyun?” Ay duama gbalus te, “Rabi, dada nu gbanwan o?” (Rabi at masuad te, Takamoyung.)

³⁹ Isus nalong te, “Wainyayam, lumag ro am.” Ay duama nanangalo ay nalag at fagtaglayunan, ay dayun wa sanya fag bale ginanya fag menit. Ginanya sfaufat sfafun wan.

⁴⁰ At nadungug Uan at nalong ay at nanangalo Isus, Andres, Simun Pedru at faduksay.

⁴¹ Ay arodi vtv Andres grvbvy at faduksay Simun, ay kanya glong te, “Nalag ami Mesias” (at masuad, Dius at nafili fag Fun).

⁴² Ay Andres nataban anya sas Isus. Ay Isus nadama Simun ay glong anya te, “Simun, Uan at baguama, siginan ban katsi am ngayan Sefas.” Sefas at masuad te, Pedru.

Nu Guro Felipe ay Natanael

⁴³ Balabag di, Isus at algan glo sas talun Galilea. Ay nu ndasug sanya, kanya nalag Felipe ay nalong te, “Aloi angku.”

⁴⁴ Felipe siginans furuan Betsaida, ay anggan Andres ay Pedru sanya ginan yangay.

⁴⁵ Felipe nalag Natanael ay nalong anya te, “Nalag ami Isus tagsiginans furuan Nasaret, Use at baguama. Kanya wan Muisis at longan fia sis Muisis at Faugali ay si yangays Dius at ngay taglong at rirukan.”

⁴⁶ Natanael ginto te, “O nunda e batang kadasug at masine siginans Nasaret?” Felipe nabalus te, “Wainyayo, nandamai.”

⁴⁷ Natanael nu munakbang wan, Isus glong te, “Damai, sik matuyan fia fag taw Israel, kanya di kamaningan lang.”

⁴⁸ Natanael nainto anya te, “Tain nu gsaful o angku?” Isus gbalus te, “Siginan yay Felipe nu yud nauro emu, nalag kwa emu sis daga lanbung kayu.”

⁴⁹ Ay Natanael nafoyung te, “Takamoyung, o wan Dius at Baguama. O wan Israel at Fun.”

⁵⁰ Isus glong te, “O gafanud wo angku siginan ku nalong emu te, ‘Nalag kwa emu sis daga lanbung kayu’? Ay lumag yangay ban o gtungud yay am ngay nalag katsi.”

⁵¹ Ay kanya nalong sa sangay taw te, “Matuyan nu glong au ayu te, lumag ban am banwa nu maluangan, ay Dius at ngay tagbarita nu gulul ay gtustus sa angku, Taw at Baguama.”