Tap 36 - Fanawbuid tagsibaliwas Fakayabian

Selufead at ngay Baguina Nagbilug sik Afud Daga

¹ Gilyad, Makir at baguama ay Manase at fufu, ay Use at fufu tud. Gilyad fag gaban at ngay tagfangguna nalo sas Muisis ay sa sangay taw Israel at ngay tagfangguna,

² ay nalong te, “Gina Yawi nasugu emu te, ‘Afudi ste fag talun laman sa sangay taw Israel at ngay kasugfunanan siginan nu gfafidfilian,’ kanya nasugu yangay te, em faduksay Selufead at afud daga foni sat ngay baguina.

³ Dewa katanya, kafag ngay baguina nu nangadadwa way siginan tibak kasugfunanan, at afud daga mafon sat mangama at kasugfunanan. Nu katanya, tibak kasugfunanan nangagbilug em afud daga.

⁴ Galay ndasug nu gfalfas fag banwa, kafag daga mafon sat mangama at kasugfunanan, ay em mangaguyang at kasugfunanan wa ban gagbilug ya.”

⁵ Ay kata Yawi at suguan, Muisis nalong sa sangay taw Israel te, “Use at ngay kasugfunanan at longan, matuyan.

⁶ Nu katanya, katatuy Yawi at longan sabaliwa Selufead at ngay baguina: Kanya fagayu masine nu nangadadwa sas nusnga sinu at fakaylatun fag mangama, siginan yakman lang at kasugfunanan.

⁷ Galay sik kasugfunanan wa masine gfon at afud daga sa tibak kasugfunanan, aroro at masine galay sik kasugfunanan nu gagbilug tua gugat at mesa mangaguyang at afud daga.

⁸ Nusnga sinu fag baguina at nagbilug sik afud daga siginan tibak kasugfunanan, masine nu nangadadwa siginan at sadili kasugfunanan, laman galay sik taw Israel gagbilug tua gugat at mesa mangaguyang at afud daga.

⁹ Ay galay sik kasugfunanan at nagbilug fag afud daga wa masine gfon sa tibak kasugfunanan, aroro galay sik kasugfunanan taw Israel masine nu gagbilug tua gugat at mesa daga.”

¹⁰ Nu katanya, Selufead at ngay baguina nafaning Yawi at suguan at nalong sas Muisis.

¹¹ Selufead at ngay baguina Makla, Tirsa, Ugla, Milka, ay Nua. Ay kafag ngay baguina nanangadadwa sat mama at ngay kaiban,

¹² tagsiginans Manase at kasugfunanan, Use at baguama. Nu katanya, kafag ngay baguina at fagagbilugun fag daga si tua gugat at mama at ngay kasugfunanan ay gaban.

¹³ Katanya Yawi at ngay faugali ay at ngay suguan at nafoyung sas Muisis laman sa sangay taw Israel kaduge kanya fagayu sis datag Muab sis tigyangan Liskung Urdan munakbang sis Eriku.