Tap 32 - Fanawbuid tagsibaliwas Fakayabian

Ngay Kasugfunanan sas Fakamenitan Liskung Urdan

¹ Rubin ay Gad at ngay kasugfunanan ngayu at fagbaugun. Ay kanya nu nalag te, furuan Aser ay talun Gilyad masine laman at fagfafangonan,

² kanya nalo sas Muisis, ay sas Elyasar, ay sa sangay tagfangguna ngay taw Israel ay nalong te,

³ “Atarut, Dibun, Aser, Nimra, Kesbun, Elyale, Sebam, Nebu, ay Beun

⁴ fag ngay furuan Yawi at nafagbilug sa sangay taw Israel, ay masine laman at fagfafangonan, aroro ami, ay ngay fagsuguan, ngayu wan em fagbaugun.

⁵ Nu katanya, nu masine tua sa ayu, foni wa emi kanya fag ngay talun ay kanya ban em fagagbilugun, ay lag gtaban ya emi sas dife Liskung Urdan.”

⁶ Ay Muisis nalong sas Gad ay Rubin at ngay kasugfunanan te, “Nataw manga at masuad ay nalong? Ay wain ay fakafamatoun ste, ay ay ngay kaiban ngap namawayan wan?

⁷ Nu katanya way ay fakamulun, gfamomuy wayam ngay taw Israel at amatanganan nu nangadasug sas Yawi at nafon anya fag talun.

⁸ Katanya yangay ebi ay ngay mangaguyang at nafakamulun gina au nasugu anya fagayu siginans Kades-Barnea laman nanginsaful ste fag talun.

⁹ Ay kanya fagayu nu ndasug sas Liskung Eskul, ay nu nalag kafag talun, nafamomuy ngay taw Israel at amatanganan laman wa manangadasug sas Yawi at nafon anya fag talun.

¹⁰ Ginanya fag menit, maksvn Yawi at dotama ay nafaksvn at longan te,

¹¹ ‘Aroro kanya fagayu wa gfaning angku sas fagdaul at amatanganan, fagayu taw tagduak safuluk banwa sat tungud baliwa gina glo siginans Igiptu, nusdi sadi wa ban lumag kafag talun ku nafatuyanan sas Abrayam, ay sas Isak, ay sas Akub.

¹² Ay Kaleb, Efune at baguama sik taw Kenis, ay Uswe, Nun at baguama, kanya way lang fag dua at lumag kafag talun aroro nafaning tua angku sas fagdaul at amatanganan.’

¹³ Ay Yawi maksvn nu kadotama ngay taw Israel, ay gfabaraudan anya fagayu sa sangaba talun at yud e taw kaduge ufatk safuluk banwa, yakmay anbul kafag kasugfunanan tagfakamulun at mauri.

¹⁴ “Ay am, sik ngay tagasalanan am, at naungbus ay ngay mangaguyang ay nafamut yayam Yawi at fandotaman sa sangay taw Israel.

¹⁵ Ay nu dway am gfaning Yawi, kanya ban gfabayan yay fia ayu ste sis talun yud e taw, ay am waban at fanlonganan ngay taw Israel nu kamin.”

¹⁶ Dewa katanya, kanya fagayu ankakbang yay sas Muisis ay nalong te, “Nangawat waymi lang ste sik ngay ubung laman sa em ngay fagbaugun, ay nangawat waymi lang sik ngay furuan laman sa em ngay talnayan.

¹⁷ Dewa katanya, mafalganan ami gfangguna em ngay kaiban fag ngay taw Israel nu gfawayan yakmay ami nafadasug anya fagayu sat fagnamanwanan ban fag talun. Ay kaduge ami sis awayan, gfamato wami em ngay talnayan sit maaladan fag ngay furuan laman kanya fagayu umlangfe siginan sangay taw tagbanwan sanya fag talun.

¹⁸ Ya ban mi guli yakmay fagayu taw Israel nagbilug at ngay talun at fagnangagbilugun ban.

¹⁹ Dewa katanya, wa ban mi nangagbilug em ngay kaiban at daga sis dife Liskung Urdan. Aroro nagbilug wami em afud daga ste baliwas fakamenitan Liskung Urdan.”

²⁰ Ay Muisis nalong sa anya fagayu te, “Agvd, fakamuluni takatanya, ay mafalganani namawayan gasfuan Yawi,

²¹ ay am fag ngay tagfawayan difei Liskung Urdan yakmay Yawi naiyan fagayu at ngay fawayan,

²² laman manangagbilug am kafag talun. Nu katanya tua, masine wam kafoli stie aroro nafakamulun tuam takatanya laman sas Yawi ay sa ay kaiban fag ngay taw Israel. Ay magbilug wam ste fag talun sis Yawi at daga salubangan.

²³ “Dewa katanya, nu dway am nafakamulun takatanya, e asalanan am sas Yawi, ay atuyani te, umsaful yay ban ay ngay asalanan.

²⁴ Kin, awati wan ay ngay furuan laman sa ay ngay talnayan, ay awati yangay sik ngay ubung laman sa ay ngay fagbaugun, dewa katanya, fafasludani ay ngay nafatuyanan.”

²⁵ Rubin ay Gad at ngay kasugfunanan nabalus Muisis te, “Namaning wami am ngay suguan.

²⁶ Gfamato wami ste sfuruan Gilyad em ngay talnayan anggan em ngay fagbaugun.

²⁷ Dewa katanya, ami, am ngay fagsuguan at mafalganan namawayan, nandife ami Liskung Urdan laman namawayan kata am suguan sa emi.”

²⁸ Nu katanya, Muisis nasugu sas Elyasar fag tagfon fanggalangun, ay sas Uswe, Nun at baguama, ay sas Israel at ngay kasugfunanan at ngay tagfangguna.

²⁹ “Rubin ay Gad at ngay kasugfunanan fag ngay tagfawayan at mafalganan namawayan nu nadife ban Liskung Urdan gfasfuan ayu laman namawayan Yawi at ngay fawayan, ay nu nagbilug waban am sanya fag talun, foni wa ban sa anya fagayu talun Gilyad laman at fagagbilugun.

³⁰ Dewa katanya, kanya ban fagayu nu dway nadife gasfuan ayu, masine wan nu nangagbilug kafag talun gasfuan ayu sis talun Kanaan.”

³¹ Ay Rubin ay Gad at ngay kasugfunanan nabalus te, “Kin, namaning wami nusnga setaw Yawi at suguan sa emi.

³² Sis Yawi at daga salubangan, nandife ami Liskung Urdan. Dewa katanya, em fagnangagbilugun fag talun ste way sfakamenitan baliwa Liskung Urdan.”

³³ Nu katanya, Muisis nafon duak fun at talun sas Gad, ay sas Rubin at ngay kasugfunanan ay sas Manase fag wabilug Use at kasugfunanan. Kafag duak fun at ngayan: Sikun, taw Amur at fun, ay Ug, talun Basan at fun. Muisis nafon fagdaul sanya fag talun ay tagsanya fag ngay furuan ay tagsit ligung fag ngay talun.

³⁴ Gad at ngay kasugfunanan nadog nawat ngay furuan Dibun, Atarut, Aruer,

³⁵ Atrut-Sufan, Aser, Ugbea,

³⁶ Bet-Nimra ay Bet-Aran. Kanya fagayu nafae alad kafag ngay furuan, ay nawat yangay ngay ubung laman sat ngay fagbaugun.

³⁷ Ay Rubin at ngay kasugfunanan nadog yay nawat ngay furuan Kesbun, Elyale, Kiryataim

³⁸ anggan ngay furuan at nafangayan ebi te, Nebu ay Baal-Meun, ay Sibma. Ay kanya fagayu natubus wan kafag ngay furuan at ngay ngayan nu ntabu kawat.

³⁹ Makir, Manase at baguama, at ngay kasugfunanan, nanamawayan Gilyad ay nababo, ay naiyan ngay taw Amur tagbanwan sanya.

⁴⁰ Nu katanya, Muisis nafon Gilyad sas Makir at ngay kasugfunanan, ay sanya wan nu gbanwan.

⁴¹ Yair, Manase yangay at kasugfunanan, nagbilug ngay furuan ayu sirut sis Gilyad ay nafangayan te, Yair at ngay furuan.

⁴² Ay Nuba nagbilug yangay furuan Kenat ay anggan tagsit ligung fag ngay furuan ayu sirut, ay nafangayan te, Nuba, kata at ngayan.