Tap 28 - Fanawbuid tagsibaliwas Fakayabian

Ngay Fanggalangun Galay Menit

¹ Yawi nalong sas Muisis te,

² “Longi sa sangay taw Israel te, masine kanya fagayu nu gfon sa angku ngay fagirugun fag ngay fanggalangun si ku nafalganan fag buknga. Kanya fag ngay fanggalangun ku fakonun, ay at ayuk at mabebanglu sik famauseganan angku. Nu katanya, longi sa sangay taw Israel te,

³ ‘Ay fagnamubaun ban ay fagnangirugun fag ngay fanggalangun sas Yawi galay menit: duak tupa riangan at yud e malong tagsadik banwa.

⁴ Foni at sadi sis balabag ay at sadi sis fafun,

⁵ gasfuan nu gfon fanggalangun famauseganan Yawi fag duak fabudbungguan at masine fag fangawat tinapay at ke suglat sik baringan langis ulibu.

⁶ Katatuy fag fanggalangun am fagnangirugun galay menit, kata Yawi at suguan ayu ebi sis Buksul Sinay. Ay Yawi guseganan at mabebanglu fag ayuk siginan kafag fagirugun fag fanggalangun.

⁷ Ay ay fanggalangun fag fanginum ay fagfasfuanun sas galay sik tupa at kayuan sik baringan fanlangu. Busbusi sit Mafasamanan fag Suluk laman sas Yawi.

⁸ Fakamuluni yangay takatanya sas faduak tupa ay fagnamonun galay fafun. Fasfuani yangay foni sik fanggalangun famauseganan Yawi ay sik fanggalangun fag fanginum. Kanya at fagirugun fag fanggalangun, ay at ayuk at mabebanglu sik famauseganan Yawi.

Ngay Fanggalangun sis Famiangalay fag Menit

⁹ “ ‘Galay Famiangalay fag Menit, foni fanggalangun duak tupa riangan tagsadik banwa at yud e malong, ay fasfuani foni ay fanginum fag fanggalangun ay fanggalangun famauseganan Yawi, ay foni yangay ufatk fabudbungguan at masine fag fangawat tinapay at ke suglat langis.

¹⁰ Kanya wan at fagnangirugun fag fanggalangun galay Famiangalay fag Menit, saman ya ay fanggalangun galay menit gasfuan fanginum fag fanggalangun.

Fanggalangun galay Magdanun

¹¹ “ ‘Galay fasadik menit si sik magdanun, foni ay fagirugun fag fanggalangun laman sas Yawi. Ay fanggalangun duak tama baka, sik tama tupa ay fituk tupa riangan tagsadik banwa. Ay fanggalangun at yud tua e malong fag ngay fagbaugun.

¹² Fasfuani foni sik fanggalangun famauseganan Yawi at masine fag fangawat tinapay mafasuglatan langis; unumk fabudbungguan fangawat tinapay sas galay sik tama baka, ufatk fabudbungguan fangawat tinapay galay sik tama tupa,

¹³ ay duak fabudbungguan fangawat tinapay galay sik riangan tupa. Ay Yawi guseganan at mabebanglu fag ayuk siginan kafag fagirugun fag fanggalangun.

¹⁴ Galay sik tama baka, fasfuani duak baringan fanginum fag fanggalangun. Ay galay sik tama tupa fasfuani sik baringan ay sik wabilug ya fanlangu. Ay galay sik riangan tupa fasfuani sik baringan fanginum fag fanggalangun. Kanya wan at fagirugun fag ngay fanggalangun galay magdanun bagu kasure.

¹⁵ Galay sik menit foni yangay sas Yawi sik tama kambing laman fanggalangun famalyam asalanan. Fakamuluni takatanya saman ya ay fagirugun fag ngay fanggalangun ay fanginum fag fanggalangun.

Fagmafulun sabaliwa Tagbarita nu Glangfe

¹⁶ “ ‘Nu maful am sabaliwa Tagbarita nu Glangfe, gina sis falabi ufatk menit galay taguna fag magdanun.

¹⁷ Ay sis falabi limak menit ginanya yangay fag magdanun, gfasigad ay fagmafulun. Ay kaduge fituk menit, ay fakonun fag tinapay at yud yakman e famabia.

¹⁸ Gina taguna fag menit ginanya fag fagmafulun, lag am gfakamulun; afuli yakman ay segi Yawi.

¹⁹ Foni sas Yawi fagirugun fag fanggalangun duak tama baka, sik tama tupa ay fituk tupa riangan tagsadik banwa. Ay fanggalangun at yud tua e malong fag ngay fagbaugun.

²⁰ Ay gina am gfon fanggalangun, fasfuani sik fanggalangun at masine fag fangawat tinapay nafaesuglat langis; unumk fabudbungguan fangawat tinapay laman sas galay sik tama baka, ay ufatk fabudbungguan fangawat tinapay laman sas galay sik tama tupa,

²¹ ay duak fabudbungguan fangawat tinapay laman sas galay sik riangan tupa famauseganan sas Yawi.

²² Foni yangay fanggalangun famalyam asalanan sik tama kambing laman famalyam ay ngay asalanan.

²³ Foni ay ngay fanggalangun saman ya ay fanggalangun galay sbalabag.

²⁴ Katanya nu gfon am ay fagirugun fag ngay fanggalangun gina fituk menit. Ay at ayuk at mabebanglu sik famauseganan Yawi. Foni yangay takatanya saman ya ay fagirugun fag ngay fanggalangun ay fanginum fag ngay fanggalangun galay menit.

²⁵ Sis fafituk menit, dogi yap afuli ay segi Yawi. Ay ginanya fag menit lag am gfakamulun.

Ngay Fanggalangun Gina Fagmafulun sabaliwas Fanggutluan

²⁶ “ ‘Taguna fag menit gina fagmafulun sabaliwas Fanggutluan, gina am gfon sas Yawi ay fanggalangun trigu, afuli ay segi Yawi ay lag am gfakamulun ginanya fag menit.

²⁷ Foni fanggalangun fagirugun: duak tama baka, sik tama tupa ay fituk tupa tagsadik banwa. Ay kafag ngay fanggalangun at ayuk at mabebanglu sik famauseganan Yawi.

^28-29 Gina am gfon fanggalangun, fasfuani at masine fag fangawat tinapay mafasuglatan langis; unumk fabudbungguan fangawat tinapay laman sas galay tama baka, ufatk fabudbungguan fangawat tinapay laman sas galay tama tupa, ay duak fabudbungguan fangawat tinapay laman sas riangan tupa laman famauseganan sas Yawi.

³⁰ Foni yangay fanggalangun sik kambing laman famalyam ay asalanan.

³¹ Foni anya fagayu gasfuan ngay fanggalangun fanginum, saman ya am fanggalangun fagirugun ay fanggalangun laman famauseganan Yawi galay smenit. Masine nu gfon am yud e malong fag ngay fagbaugun.