Tap 24 - Fanawbuid tagsibaliwas Fakayabian

¹ Ay Balaam namatangan te, Yawi kaylat gfadante Israel, ay kanya wa kaylat glong at mauri kata ebi at fakamulun. Nu bunway, kanya nasalubang sas talun at yud e taw,

² ay kanya nabanawan ngay taw Israel nu gbanwan manabayan sas galay sik kasugfunanan. Sanya ginan, Dius at Falad antayuk sa anya,

³ ay Balaam nalong te, “Au Balaam, Beur at baguama, ay gamatangan ktua gugat at masine.

⁴ Nadungug kwan Dius at longan ay nalag kwan sik taginfan siginan at mabalyanan fag Dius. Gfababaun au ku sadili sa anya ay kanya gfoyung sik longan sa angku. Katatuy at longan:

⁵ Masine tua ngay taw Israel, Akub at ngay kasugfunanan at ngay fagbanwanan.

⁶ Kata sik tanuman at masine sis tigyangan liskung, ay kata yangay sikya Yawi at natanum, ay ngay tagbia fag ngay fun kayu tagsis day lino.

⁷ Gsawe wan ngay mamam sat ngay fagsuadan, ay kanya fagayu gtanum ngay bvtang sa sangay tanuman at kinrugme. Ay at fun amabalyanan yap tua Agag, Amalek at fun, ay at fagfagtainanan umsik takadungug.

⁸ Dius nafaduksun anya fagayu siginans talun Igiptu, ay kanya kata sik mabitsug fag baka tama laman sa anya fagayu. Ay kanya gfamin fagayu at ngay fawayan; ay gsuluy sat matares fag tulag ay grufa at ngay bini.

⁹ Ay kanya fagayu kata ngay liun, nu natiug wan we mananfulo ya. Gfadante ban nangus at nafadante anya fagayu, ay nanlong ban nangus at mauri sas nusnga sinu at nalong at mauri sa anya fagayu.”

¹⁰ Siginan takatanya, Balak andotama maksvn Balaam. Ay kanya natalaptap daul ay nalong te, “Nafauro au emu laman nanlong o at mauri sa ku ngay fawayan, dewa katanya, nafadante way o anya fagayu tulu ginan.

¹¹ Loi wan! Nafatuyanan koma te, gfon au sa emu famayad, dewa katanya, Yawi wa kaylat nu gbul o ku famayad.”

¹² Balaam nabalus Balak te, “Nalong kwan sa am ngay fagsuguan te,

¹³ dewa ban o gfon sa angku am bale at mapnu sanbung salapi ay gintu, kwa mafafakamulun ku sadili fakaylatun, at masine ay at mauri. Ay nu nataw Yawi at foyungan sa angku, kanya way ku fagnanlongun sa emu.

¹⁴ Guli kwan katsi sa ku kaiban. Dewa katanya, gina au galoun, gfararang au sa emu ngay taw Israel at fagnamakamulunun ban sa am ngay taw.”

Balaam at Faufatk Longan

¹⁵ Sanya ginan, Balaam nalong te, “Au Balaam, Beur at baguama, ay matuyan tua gugat ku amatanganan.

¹⁶ Nadungug kwan Tiba Tungud fag Dius at longan ay nalag kwan sik taginfan siginan at mabalyanan fag Dius. Kamababaun au sa anya ay kanya nafoyung sa angku sik longan te,

¹⁷ Nalag au si ku taginfan at yud yay anfasludan. Sik fun ban tagsiginans Akub at kasugfunanan namagtainan sas Israel. Ay kanya ban gfamin ngay taw Muab ay Set at ngay kasugfunanan fagayu.

¹⁸ Ay kanya ban nangagbilug talun Edum, at ngayan yangay te, Seir, ay Israel ban kaugat yay nu mabalyanan.

¹⁹ Sik fun ban namangguna Israel, ay kanya ban namamin at ngay sawad tagleleg sis Muab at furuan.”

Balaam at Longan Taguyan

²⁰ Sanya ginan, Balaam nalag sit taginfan ngay taw Amalek ay nalong te, “Ebi taguna, ngay taw Amalek oma tagfangguna sa sangay talun, dewa katanya, kanya fagayu umrasras.”

²¹ Sanya ginan, Balaam nalag yangay sit taginfan ngay taw Ken ay nalong te, “Mogat tua am fagbanwanan, aroro gang tua at fagfatungkudan,

²² dewa katanya, umkamin ban am gina ban ngay taw Asirya gtaban ayu.”

²³ Ay Balaam nalong yangay te, “Afanyuan am! Sinu ban at magwanta gina Dius gfakamulun takatatuy?

²⁴ Ngay taw ban kadasug siginans Sipre gsakay sit ngay sakayan lino, ay kanya ban fagayu nangagbilug ngay taw Asirya ay taw Eber, dewa katanya, Kitim ban umrasras.”

²⁵ Sanya ginan, Balaam ay Balak guli wan sat mesa furuan.