Tap 23 - Fanawbuid tagsibaliwas Fakayabian

Balaam at Taguna fag Longan

¹ Balaam nalong sas Balak te, “Awati ste fituk fagirugan laman ku fagnangirugan, ay falganani fituk riangan baka ay fituk tama tupa laman ku fanggalangun.”

² Balak nafaning Balaam at fagetun fagayu sa anya, ay kanya fag dua nairug riangan baka ay tama tupa sas galay sik fagirugan.

³ Sanya ginan, Balaam nalong sas Balak te, “Stei way o gugat sim day fanggalangun. Kayayu kyay sirut, tibaginan ro Yawi e longan sa angku. Glong kro sa emu nu nataw Yawi at longan sa angku.” Ay kanya naundaud sas tungud buksul.

⁴ Yawi nafablang anya ay Balaam nalong sas Yawi te, “Nafawat au fituk fagirugan ay sis galay sik fagirugan nairug au sik riangan baka ay sik tama tupa.”

⁵ Ay Yawi naringang sas Balaam ay nalong te, “Katsi, afolii wan sas Balak ay namadungug o sa anya ku longan.”

⁶ Nu katanya, Balaam anfoli wan, ay nalag Balak nu malindug sit day fanggalangun, magamut Muab at ngay tagfangguna.

⁷ Sanya ginan, Balaam nalong te, “Fun Balak, nafauro o angku siginans Aram sis fakamenitan fag ngay buksul. Ay nalong o angku te, ‘Fasakiti, longi at mauri sas Akub at ngay kasugfunanan laman sa angku. Longi at mauri laman sa sangay taw Israel.’

⁸ Kwa malong at mauri sas Dius at fagyudun gfauri fag ngay taw. Ay kwa malong at mauri sas Yawi at nafadante fag ngay taw.

⁹ Siginans tungud buksul, gbanawan au anya fagayu. Kanya fagayu gbanwan manabayan, ansaman wan sa tibak gaban taw.

¹⁰ We mafatap Akub at ngay kasugfunanan aroro kanya fagayu ngayu, kayu lukbu. Nu kabul au nangus kata tua at matuyan fag taw, ay ku fakatabuan nangus umkata yangay anya fagayu.”

¹¹ Balak nalong sas Balaam te, “Nataw am nafakamulun sa angku? Nataban au emu ste laman glong mauri sa ku ngay fawayan, dewa katanya, nafadante o anya fagayu.”

¹² Balaam gbalus te, “At masine way lang fag foyungan siginans Yawi ku fagnanlongun sa emu.”

Balaam at Faduak Longan

¹³ Sanya ginan, Balak nalong sa anya te, “Aloi angku laman lumag o sik gaban taw Israel, dewa katanya, bunwa fagayu. Ay longi at mauri sa anya fagayu.”

¹⁴ Nu katanya, Balak nataban Balaam sa sik gamasun tagsis Supim, sis tungud buksul Pisga ay kanya nafawat sanya fituk fagirugan fanggalangun, ay nairug sik riangan baka ay sik tama tupa sis galay fagirugan.

¹⁵ Balaam nalong sas Balak te, “Stei yap o sim day fanggalangun kaduge au namablang Yawi.”

¹⁶ Yawi namablang Balaam ay naringang sa anya. Ay nalong te, “Afolii wan sas Balak ay longi sa anya ku longan.”

¹⁷ Nu katanya, Balaam anfoli sas Balak ay kanya nalag anya sit day fanggalangun gasfuan Muab at ngay tagfangguna. Ay Balak nainto sas Balaam te, “Nataw Yawi at longan sa emu?”

¹⁸ Balaam nabalus te, “Balak, Sipur at baguama, gewan, dungugani!

¹⁹ Dius wa kata taw takamuag ay di gsalan sat amatanganan. O nunda kanya e nalong ay e nafatuyanan at yud anfasludan?

²⁰ Kanya nasugu angku laman namadante ngay taw ay nu nafadante kwan, kwa mafabali ya.

²¹ Kwe nalag faurianan ay fagidapun takadasug sas Israel. Yawi galo anya fagayu; ay ngay taw gafanud te, kanya wan at fun.

²² Dius nafaduksun anya fagayu siginans talun Igiptu, ay kanya kata sik mabitsug fag baka tama laman sa anya fagayu.

²³ We taginsaful tagfaidap anya fagayu. Nu katanya, ngay taw glong sabaliwa ngay taw Israel te, ‘At kadulo Dius at nafakamulun laman sas Israel.’

²⁴ Kanya fag ngay taw kata sik liun at mafalganan nanggamat ay wa gfaragang yakmay nafamin at ngay nagamat ay nainum at taguk.”

²⁵ Sanya ginan, Balak nalong sas Balaam te, “Nu dway o glong at mauri sa anya fagayu, lag gfadante anya fagayu.”

²⁶ Balaam nabalus anya te, “O wo gamatang ya? Nalong kwa sa emu te, glong kway lang sa emu Yawi at longan sa angku.”

Balaam at Fatuluk Longan

²⁷ Balak nalong yay fia sas Balaam te, “Gewan, gtaban au emu sa tibak talun. Tibaginan ro, Dius kaylat nu glong o at mauri sa sangay taw Israel laman sa angku.”

²⁸ Nu katanya, Balak nataban Balaam sas tungud buksul Peur, nu inda kanya gbanawan talun at yud e taw.

²⁹ Balaam nalong te, “Awati ste fituk fagirugan fanggalangun laman ku fagnangirugan, ay falganani fituk baka tama ay fituk tupa tama laman ku fanggalangun.”

³⁰ Nu katanya, Balak nafakamulun Balaam at nalong fagayu sa anya, ay kanya nairug sik baka tama ay sik tupa tama sas galay sik fagirugan.