Tap 19 - Fanawbuid tagsibaliwas Fakayabian

Famasine fag Mamam

¹ Yawi nalong sas Muisis ay Arun te,

² “Katatuy yangay sik faugali ku fakaylatun ay fakamulun: Longi sa sangay taw Israel te, tabanani sa ayu sik maraska fag baka at yud e malong ay at yud yay batang gfafakamulun sas gamasun.

³ Foni kafag baka sas Elyasar fag tagfon fanggalangun ay bubai sas day fagmafulan ay filasi sis Elyasar at daga salubangan.

⁴ Sanya ginan, Elyasar namasurung at sumyu sanya fag taguk ay gfaramsig fitu ginan sas Yawi at bale at fagunan.

⁵ Ay kaduge Elyasar gdama, irugi wan kafag baka at balat, bilug, taguk ay anggan tagsisad basad fag ngay afud bilug.

⁶ Sanya ginan, Elyasar namul sik lifung kayu sidru, ay sik sanga isupu ay sik maraska fag fansiuk, ay gukas kanya fagayu sas fagirugun fag baka.

⁷ Nu ntabu wan, Elyasar masine nu gbakbak at lanbung ay nu gigus. Sanya ginan, kanya masine wan gsakbo sas fagmafulan, dewa katanya, tuyani anya te, mauri yakmay menit anfalyu.

⁸ Ay anggan at nairug kafag baka masine nu gbakbak yangay at lanbung ay nu gigus; ay tuyani yangay anya te, mauri, yakmay menit anfalyu.

⁹ “Ay at matuyan fag taw at namul at nairug fag baka at dafug, ay kanya namoli kafag dafug sa sik matuyan fag buknga sas day fagmafulan. Suksuki kafag dafug laman famasuglat sas famasine fag mamam laman famasine ngay taw Israel. Fakamuluni takatanya laman gfalyam at ngay asalanan.

¹⁰ Kafag taw tagbul baka at dafug, masine nu gbakbak at lanbung. Tuyani anya te, mauri, yakmay menit anfalyu. Masine ngay taw Israel ay anggan ngay taw tagsiginans tibak talun tagbanwan magamut si anya nu gfaning tuy fag faugali kabavn ban.

¹¹ “Nusnga sinu at nated at mabulan, tuyani anya te, mauri, kaduge fituk menit.

¹² Masine nu gfasine at sadili gina sis fatulu ay fafituk menit siginans famasine fag mamam. Sanya ginan, tuyani anya te, masine. Ay kanya nu dway nafasine at sadili sis fatulu ay fafituk menit, lag gtuyan anya te, masine.

¹³ Ay nusnga sinu fag taw at nated at mabulan ay nu dway nafasine at sadili, kanya nafauri yangay Yawi at bale ramit. Ay lag am gtap ya anya te, ay kaiban, aroro kanya ansik mauri wan, siginan nu yud nafaramsig sa anya famasine fag mamam.

¹⁴ “Katatuy at faugali nu e nbul way sit sadili bale ramit: nusnga sinu at nasakbo sanya fag bale ramit ay sanya e nbul, tuyani te, kafag taw at nasakbo masuya kaduge fituk menit.

¹⁵ Ay fagayu fagagbilugun at yud e suklub at mafasakboan sanya, tuyani yangay te, masuya.

¹⁶ “Tuyani te, masuya kaduge fituk menit, nusnga sinu fag taw at nasas day fagmafulan nu nated way at kinbul ay dewa sik taw at kinbul maugali. Katanya yangay nusnga sinu fag taw at nated sik fagfolian ay mannga sik taw at bini, tuyani anya te, masuya.

¹⁷ “Ay famalyam sik taw at fagmasuyaun, suadi sa sik fagsuadan at nairug fag baka at nagdafugan, at nafon fag fanggalangun laman famasine, ay famuti mamam.

¹⁸ Sanya ginan, at kinsine fag taw namul sik sanga isupu ay gfasurung sas famasine fag mamam, ay gfaramsig sas bale ramit at ke mabulan fag taw ay anggan sas fagayu fagagbilugun sanya, ay sa sangay taw at masakboan sanya. Ay gfaramsig yangay sas taw at nated sik taw at bini ay sik fagfolian ay sik taw at kinbul ay dewa sik taw at kinbul maugali.

¹⁹ Sis fatulu ay fafituk menit, at kinsine fag taw gfaramsig kafag famasine fag mamam sa sangay taw at masuya. Ay sis fafituk menit, kafag taw nu masine wan, kanya masine nu gbakbak at lanbung ay nu gigus, ay ginanya fag yabi, tuyani anya te, masine wan.

²⁰ Dewa katanya, at masuya fag taw nu dway kaylat gfafasine at sadili, lag am gtap ya anya te, ay kaiban, aroro kanya nafauri ku bale. Ay kanya masuya wan aroro wa nafaramsig sa anya famasine fag mamam.

²¹ Masine kanya fagayu nu gfaning tua ban gugat kanya fag faugali. Ay tagfaramsig famasine fag mamam, masine nu gbakbak at lanbung, ay nusnga sinu at nated famasine fag mamam, tuyani anya te, masuya, yakmay menit anfalyu.

²² “Sik masuya fag taw nu nated nusnge wain ay nusnga sinu, tuyani yangay at nated te, masuya, yakmay menit anfalyu.”