Tap 18 - Fanawbuid tagsibaliwas Fakayabian

Ngay Tagfon Fanggalangun ay ngay Taw Lebi at Fakamulun

¹ Yawi nalong sas Arun te, “Am fag talamean ay am kaiban siginans Lebi at kasugfunanan, am at ke mamalong nu nafakamulun am at mauri gina am si ku bale. Dewa katanya, am way lang fag talamean tagafaurianan sa ay fakamulun fag asalanan aroro am wan ngay tagfon fanggalangun.

² Ay nu gfakamulun am sis Fagsuadan Nasadian fag Bale, fagubuki yangay am ngay kaiban siginans Lebi at kasugfunanan.

³ Am wan tagfangguna anya fagayu gina gfakamulun, ay kanya fagayu tagfakamulun fagayu fakamulun. Dewa katanya, kanya fagayu wa masine gted ngay fagagbilugun at yud e malong tagsis bale ay sis fagirugan, aroro kanya fagayu nu nated way, umbul, ay umbul yangay am.

⁴ Kanya ban fagayu ggubuk emu, ay tagalaga ku bale gina gfakamulun fagayu at fakamulun. Ay we masine ggubuk ayu fag talamean, bunway Lebi at kasugfunanan.

⁵ “O wan tagfangguna nu galaga ku bale ay anggan fagirugan, laman kwa kadotama ngay taw Israel.

⁶ Au wan tagfili ngay taw Lebi siginans taw Israel laman taggubuk emu, ay kanya fag ngay taw nafatigwanan sa angku laman gfakamulun si ku bale.

⁷ Dewa katanya, am way lang fag talamean tagfakamulun laman sik ngay tagfon fanggalangun. O way lang tagfakamulun ngay fakamulun sas fagirugan ay sat Mafasamanan Fia fag Suluk. Ay fakamulun wan ku fon ayu. Fabuli nusnga sinu tagfakamulun takatanya nu bunway sik tagfon fanggalangun.”

Ngay Fanggalangun laman sa sangay Tagfon Fanggalangun ay sa sangay Taw Lebi

⁸ Yawi nalong sas Arun te, “Nafili au emu tagfangguna sat yud e malong fag ngay fanggalangun ngay taw Israel at fon sa angku. Nafon au tuy fagayu sa ayu fag talamean laman ay ngay afud kabavn ban.

⁹ E afud am siginans ngay fanggalangun yud nairug, ngay taw at fanggalangun sa angku laman sik yud e malong fag fanggalangun. Gasfuan yangay ngay fanggalangun nu gfauseganan angku, fanggalangun sat nafian, ay fanggalangun famalyam asalanan. Tuy wan fagayu am ngay afud.

¹⁰ Sanya wan sat yud e malong fag buknga nu kon am tuy fagayu, masine nu mangama way takon ay tuyani anya te, yud e malong.

¹¹ Ay tiba yak taw Israel at ngay fanggalangun nafabat sas fagirugan, kanya yangay am afud. Gfon kwan tuy fagayu sa emu ay sam ngay kaiban, laman am afud kabavn ban. Nusnga sinu siginan am talanan masine maon kafag ngay afud.

¹² Gfon kyangay sa ayu ngay masine fag fanggalangun ngay taw Israel at nafon siginans taguna fag gutluan: ulibu langis, wat ubas at mamam ay trigu.

¹³ Am wan tagagbilug sat ngay rawvg siginans taguna fag gutluan sis gamasun. Nusnga sinu siginan am talanan masine maon kafag ngay afud.

¹⁴ “Fagayu nusnge wain sis Israel at nafon wan sa angku, ayu wan.

¹⁵ Ay fagayu at nafon sa angku fag ngay tiba kaka, taw man ay mannga fagbaugun, ayu wan yangay. Dewa katanya, faebayadi taw at ngay tiba kaka ay fagbaugun at taguna ngay riangan natuyan te, mauri.

¹⁶ Faebayadi anya fagayu nu sik magdanun wan ay bayadi anya limak sanbung salapi, kata ngay tagfon fanggalangun nu gfabudbungguan sanbung salapi.

¹⁷ Dewa katanya, lag gfabayad ya taguna kasalug fag baka, tupa ay kambing aroro kanya fagayu ku fagagbilugun wan. Filasi kafag ngay fagbaugun ay faramsigi at taguk sas fagirugan ay irugi at ngay taba. Ay kafag ngay fanggalangun at ayuk at mabebanglu sik famauseganan angku.

¹⁸ Buli wan at yamas, anggan at dubdub ay at wala fag balangbang siginans nafabat fag ngay fanggalangun.

¹⁹ Gfon au sa ayu ngay taw Israel at nafabat fag ngay fanggalangun laman sa angku. Kanya wan am ay am ngay kaiban at ngay afud kabavn ban. Katatuy ku nasadian sa emu ay sam ngay kaiban, ay di ginbalian kabavn ban.”

²⁰ Yawi nalong yangay sas Arun te, “Fagayu am ngay tagfon fanggalangun ban we afud daga laman ay fagagbilugun sis Israel, aroro au wan tagfon am ngay fagayudanun.

²¹ “Ay nu sabaliwa ngay taw Lebi, gfon au famayad sa anya fagayu gina kanya gfakamulun sa ku bale. Gfon au sa anya fagayu at fasafuluk afud siginans taw Israel ay kanya wan at afud.

²² Siginan katsi, we taw Israel namakbang sa ku bale, saman way sa sangay tagfon fanggalangun ay sa sangay taw Lebi, aroro kanya fagayu nu namakbang, kanya fagayu gdalan sas faurianan yakmay umbul.

²³ Ngay taw Lebi tagalaga sa sangay fakamulun sa ku bale ay kanya wan at nasalan nu gfakamulun at mauri. Tuy fag faugali ay fagaloan ban kabavn, anggan ay ngay kasugfunanan. Ay ngay taw Lebi ban we afud daga laman at fagagbilugun sis Israel.

²⁴ Abat ngate, ku fon sa anya fagayu laman at afud ngay fasafuluk afud siginan sangay taw Israel laman at fanggalangun sa angku. Katanya ku fagnalongun te, ngay taw Lebi ban we afud daga laman at fagagbilugun sis Israel.”

²⁵ Yawi nasugu Muisis

²⁶ laman nanlong sa sangay taw Lebi te, “Nu nabul am siginan sangay taw Israel at fasafuluk afud ku fon sa ayu laman ay afud, am, foni at fasafuluk afud, laman fanggalangun sa angku.

²⁷ Ay ay fon fag fasafuluk afud gtuyan au te, kata ay fon ay gutluan trigu ay mannga rawvg ubas at mamam siginans fagturisan.

²⁸ Siginan takatanya, mafon am sa angku ay ngay fanggalangun siginan sangay fasafuluk afud ay nabul siginans taw Israel. Ay at fasafuluk afud siginan ayu laman sa angku foni wan sas Arun fag tagfon fanggalangun.

²⁹ Nu katanya, ay fanggalangun sa angku tiba tungud tua at masine fag afud at nafon sa ayu.

³⁰ Ay nu nafon wam tuy fagayu, gtuyan au tuy fagayu te, kanya at fanggalangun siginans fagruyusan ay fagturisan rawvg ubas.

³¹ Masine wayam ay anggan ay ngay talanan nu kon kanya fag ngay afud dewa nday fag buknga, aroro kanya wan ay afud gina am gfakamulun sa ku bale.

³² Diam gasalanan nu kon am takatanya, nu nafon tuam taguna tiba tungud fag afud laman sas Yawi. Fatuyani te, diam gfauri ngay fanggalangun yud e malong siginans taw Israel at ngay fanggalangun, siginan nu kon am ay ngay afud, ay deyud am nafon sik afud sa angku, laman diam kabul.”