Tap 15 - Fanawbuid tagsibaliwas Fakayabian

Ngay Faugali laman sa sangay Famonun

¹ Yawi nasugu Muisis

² laman nanlong sa sangay taw Israel te, “Nu ndasug wam sas talun ku nafon sa ayu laman ay fagbanwanan,

³ foni angku ay ngay fanggalangun siginan ay ngay fagbaugun. Foni fagirugun fag ngay fanggalangun, ay ngay fanggalangun laman gfafasludan sik fatuyanan, ay at nafalganan fia fag ngay fanggalangun, ay ngay fanggalangun galay fagmafulun. Ay kafag ngay fanggalangun at ayuk at mabebanglu sik famauseganan angku.

^4-5 Nusnga sinu tagfon sik riangan tupa laman at fanggalangun fagirugun sa angku, masine yangay anya nu gfon duak fabudbungguan fangawat tinapay nafae suglat langis laman sik fanggalangun nu gfauseganan angku. Famuti yangay sik baringan fanginum fag fanggalangun.

⁶ Ay nu gfon sik tupa tama, famuti anya ufatk fabudbungguan at masine fag fangawat tinapay nafaesuglat sik baringan ay gwabilug langis laman at fanggalangun nu gfauseganan angku.

⁷ Ay famuti yangay sik baringan fanginum fag fanggalangun. Ay kafag fanggalangun at ayuk at mabebanglu sik famauseganan angku.

⁸ “Ay nusnga sinu tagfon sik riangan baka laman sik fanggalangun fagirugun ay mannga sik fanggalangun tagfafasludan sik fatuyanan ay mannga sik fanggalangun laman sas fagmanabayanun,

⁹ masine yangay nu gfon fanggalangun unumk fabudbungguan fangawat tinapay at ke suglat duak baringan langis.

¹⁰ Ay famuti yangay duak baringan fanginum fag fanggalangun. Ay kafag fanggalangun at ayuk at mabebanglu sik famauseganan angku.

¹¹ Fakamuluni takatanya gina am gfon fanggalangun sik tama baka ay mannga sik tupa tama ay mannga kambing.

¹² Fakamuluni takatanya sas galay sik fanggalangun fag fagbaugun.

¹³ “Ay fagayu taw Israel masine nu gfaning takatanya fag faugali gina namon at fagirugun fag ngay fanggalangun, laman at mabebanglu fag ayuk famauseganan angku.

¹⁴ Ay dewa tagsiginans tibak talun fag ngay taw tagbanwan si ayu, nu kaylat gfon fagirugun fag ngay fanggalangun laman at mabebanglu fag ayuk famauseganan angku, masine kanya fagayu nu gfaning ayu.

¹⁵ Am fag ngay taw Israel ay anggan ngay taw siginan tibak talun tagbanwan si ayu gsud way sa ku daga salubangan ay sadi way at ngay faugali laman sa ayu. Tuy fag faugali ay fagaloan ban kabavn, anggan ay ngay kasugfunanan.

¹⁶ Sadi way lang at ngay faugali ay ngay suguan am ay at tibak taw namanwan si ayu at fagfaningun.”

¹⁷ Yawi nasugu yangay Muisis

¹⁸ laman nananlong sa sangay taw Israel te, “Nu ndasug wam sas talun ku nafon sa ayu,

¹⁹ masine way nu kon am ngay tanum at rawvg sanya fag talun. Dewa katanya, fasamani at masine fag rawvg laman fanggalangun sa angku.

²⁰ Foni tinapay siginans fangawat tinapay am nalubuk, kata am nafakamulun sim nagutlu taguna fag rawvg.

²¹ Ay kafag fanggalangun siginans taguna fag fangawat tinapay am nalubuk, foni sa angku kabavn.

²² “Ay nu nafamabo am at sadik suguan ku nafon sas Muisis nu bundi ay algan,

²³ (ay nusnga setaw fag suguan ku nafon sa ayu siginans Muisis, siginan nu gfon au ay anggan ban sat fadogan fag kasugfunanan)

²⁴ ay nu nafakamulun bunwa at algan, ay fagayu at maful wa nasaful, kanya fagayu masine nu gfon sik tama baka riangan laman fagirugun fag fanggalangun. Ay kafag fanggalangun at mabebanglu fag ayuk sik famauseganan angku. Famuti yangay ngay fanggalangun laman nu gfauseganan angku ay ngay fanginum fag fanggalangun ay sik tama kambing laman famalyam asalanan fag fanggalangun.

²⁵ Ay ngay tagfon fanggalangun gfon takatanya laman famalyam fagdaul talananan at ngay asalanan. Gfalyam au anya fagayu aroro bunwa yay kanya at algan, ay kanya fagayu gfon yangay fanggalangun sik fanggalangun siginans afuy ay fanggalangun famalyam asalanan.

²⁶ Gfalyam kwan ngay taw Israel, anggan yangay ngay taw tagsiginan tibak talun tagbanwan magamut si anya, aroro kanya fagayu gasfuan nu gfakamulun at asalanan bunwa at algan.

²⁷ “Dewa katanya, nu sadi way lang fag taw at nasalan bunwa at algan, kanya gbuba sik tina kambing tagsadik banwa laman fanggalangun famalyam asalanan.

²⁸ Ay tagfon fanggalangun gfon takatanya sa ku daga salubangan laman famalyam kanya fag taw at asalanan bunwa at algan, sanya ginan, gfalyam kwan anya.

²⁹ Sadi way at faugali sat asalanan bunwa at algan, taw Israel manga ay sa tibak taw namanwan si ayu.

³⁰ “Dewa katanya, nusnga sinu at natikis nafakamulun asalanan, taw Israel man ay duan, ay nafalingun angku, lag gtap ya anya te, ay kaiban,

³¹ aroro kanya natalyuyan wan ku longan ay wa nafaning ku ngay suguan. Lag gtap ya anya sam ngay kaiban. Kanya wan gdalan sat faurianan aroro sat asalanan.”

Faurianan sat yud Nafaning gina Famiangalay fag Menit

³² Kaduge ngay taw Israel sis talun yud e taw, e nalag sik taw gfakamulun gina buknga Famiangalay fag Menit.

³³ At taglag nataban anya sas Muisis, Arun ay sas fagdaul talananan.

³⁴ Ay naubung anya, aroro kanya fagayu wa nasaful te, setain ro at fakamulun sa anya.

³⁵ Sanya ginan, Yawi nalong sas Muisis te, “Fabuli wan kanya fag taw, fanai anya ngay gang sanya yay sas lod fag fagmafulan.”

³⁶ Nu katanya, ngay taw nataban anya sat lod fagmafulan ay nafana ngay gang yakmay anbul, kata Yawi at suguan sas Muisis.

³⁷ Yawi nasugu Muisis

³⁸ laman nanlong sa sangay taw Israel te, “Awati ngay famaringbing sam ngay lanbung ay folii fansiuk melo. Fakamuluni takatanya kabavn.

³⁹ Ay at ngay famaringbing gfamatang fagayu ku ngay suguan sa ayu laman gfaning tuam fia ay bundi lang am fakaylatun fag fakamulun wayam fakamulun.

⁴⁰ Siginan takatanya fag ngay famaringbing, gamatang wam fia tam nasadian ay angku wan ayu.

⁴¹ Au Yawi am Dius gtaban ayu siginans talun Igiptu laman am Dius fia. Au ay Dius Yawi.”