Tap 14 - Fanawbuid tagsibaliwas Fakayabian

Ngay Taw Israel Nafamabo

¹ Ginanya fag yabi, ngay taw Israel nawayway maksvn.

² Kanya fagayu gfayud Muisis ay Arun, ay nalong sas duksay te, “Amasine yap nu kabul tam sis talun Igiptu ay mannga stie fag talun at yud e taw.

³ Wain Yawi at fagnatabanun antam stae fag talun? O laman nangabul tam sas awayan ay e nantaban tam ngay mangena ay tam ngay sisian? Kafoli yap tam siring sas talun Igiptu.”

⁴ Ay ngay taw Israel kamatoan te, “Gfili tam sik tagfangguna ay kafoli yap tam sas talun Igiptu!”

⁵ Gina ngay taw Israel maful, Muisis ay Arun namalub sit daga salubangan.

⁶ Uswe, Nun at baguama, ay Kaleb, Efune at baguama, nagirat at mesa lanbung laman gfalag te, kabalu. Kanya fag dua nanangalo nu nanginsaful sas talun Kanaan.

⁷ Ay kafag dua nalong sa sangay taw Israel te, “Masine mandi em nananginsaful fag talun.

⁸ Yawi, nu kaylat tua antam, gufud tua ban antam gina tam glao sanya fag talun at masine ay at maramraman, ay gfon waban fia antam.

⁹ Lag am kamabo Yawi. Ay lag am kalimu kanya fag ngay taw aroro gbabo waban tam fia. We ggubuk anya fagayu, dewa katanya, Yawi ggubuk tua antam. Nu katanya, lag am kalimu kanya fag ngay taw.”

¹⁰ Ay kanya fag ngay taw namana ma anya fag dua ngay gang, dewa katanya, ngay taw nalag wa vtv Yawi at kamasinean namasat tungud Bale.

¹¹ Yawi nalong sas Muisis te, “Ginain yaban tuy fag ngay taw nu gfalingun angku? Ginain yaban kanya fagayu nu yud gafanud sa angku dewa au nafakamulun at ngay madulo sa anya fagayu?

¹² Ay gfabuba au sik faurianan ay gfamin kwan anya fagayu, dewa katanya, kawat au emu sik maseganama fag gaban taw tagtungud yay anya fagayu.”

¹³ Ay Muisis nabalus Yawi te, “Nataw manga taw Igiptu at fagamatanganun gina gdungugan takatanya? Kanya fagayu nasaful tua te, o wan at nanantaban am ngay taw siginan am fagmabalyananun.

¹⁴ Nung o gfabul fagayu am ngay taw, ngay taw Igiptu gfasaful takatanya sa sangay taw Kanaan. Ay ngay taw Kanaan sumaful te, o wan Yawi tagalo ngay taw Israel ay namalag o am kamasinean sa anya fagayu siginan sik turuk linyabu gina menit ay nu siwas yabi siginan sik turuk afuy.

¹⁵ Ay katsi, nu gfabul way o fagayu am ngay taw, tiba bank talun at ngay taw tagsaful te, kadungug o, glong te,

¹⁶ ‘Yawi wa makatu ya gtaban ngay taw Israel sat nafatuyanan fag talun. Nu katanya, kanya nafabul wan anya fagayu sis talun at yud e taw.’

¹⁷ “Yawi, falagi am fagmabalyananun kata am longan te,

¹⁸ mafangesug o ay di o gfangadotama ay gfalyam tuo ngay taw at asalanan. Dewa katanya, gfaurianan o ngay tagasalanan, sitsigons fatulu ay faufatk kasugfunanan.

¹⁹ Aroro mafangesug tuo, falyami wan kanya fag ngay taw at ngay asalanan, kata nu gfalyam o at ngay asalanan gina o gtaban anya fagayu siginans talun Igiptu dasug katsi.”

²⁰ Ay Yawi nabalus Muisis te, “Nafalyam kwan at ngay asalanan kata am fagetun sa angku.

²¹ Dewa katanya, au Yawi, gfatuyanan au te, kaksvn nu gleleg au ay ku fagmasineun nu kapnu fagdaul daga,

^22-23 wa ban e madasug sas talun ku nafatuyanan sam ngay mangaguyang. Kanya fagayu dewa nalag ku kamasinean ay fagayu ku nafakamulun at madulo sas talun Igiptu ay sas talun at yud e taw, kanya fagayu kamabo way gugat angku ay wa gfaning ku ngay suguan. Nu katanya, kafag ngay takamabo wa madasug sanya fag talun.

²⁴ Dewa katanya, ku fagsuguan Kaleb umdasug sas talun Kanaan, aroro saman tua at ugali, gtungud yay tiba ay kanya nafaning angku sas fagdaul at amatanganan. Ay gbanwan yangay ban sanya at ngay kasugfunanan.

²⁵ Faragangi yap nu glo am aroro e ngay taw Kanaan ay e ngay taw Amalek gbanwan si sangay tagubungan, abat ngate, sbalabag, afolii sas talun yud e taw, sas dalan tagsas Dagat Maraska.”

²⁶ Yawi nalong sas Muisis ay Arun te,

²⁷ “Ginain yaban tuy fag ngay taw mauri nu gfayud angku? Nadungug kwan fagayu taw Israel at ngay famayud.

²⁸ Nu katanya, longi sa anya fagayu te, ‘Au Yawi, gfatuyanan au te, kafanud nu gleleg au, gfon kban fagayu ku nadungug ay fagetun sa angku.

²⁹ Umbul waban am stie fag talun at yud e taw. Aroro nafayud am angku, we taw nusdi sadi si ayu, at banwa nu duak safulu sat tungud baliwa, at kintap sat fagrirukan,

³⁰ at madasug sa ku nafatuyanan fag talun, nu bunway Kaleb, Efune at baguama, ay Uswe, Nun at baguama.

³¹ Ay sabaliwa ay ngay sisian ay nalong te, gatabanan ban, gtaban kban anya fagayu sa ay fagyudun kaylat fag talun, ay kanya ban fagayu gagbilug wan kanya fag talun.

³² Dewa katanya, umbul ban am stie fag talun at yud e taw.

³³ Ay ngay sisian umkata ngay tagalaga tupa nanrapyagan sas talun at yud e taw kaduge ufatk safuluk banwa. Siginan takatanya, kanya fagayu gidapan ban aroro kamabo am angku yakmay ban am anbul.

³⁴ Ay at ngay nanginsaful gina sis talun Kanaan kaduge ufatk safuluk menit, ufatk safulu yangayk banwa fag fagidapun at fantubus aroro say ngay asalanan, laman sumaful am nu setain nu kauri au sa sangay takamabo angku.

³⁵ Au Yawi taglong tuy fagayu ay namakamulun kban takatanya aroro kanya fagayu maksvn nu mauri, ay masadi namabo angku. Kanya ban fagayu umbul ste fag talun at yud e taw.’ ”

^36-37 Muisis at nasugu fag ngay taw at nanginsaful, tiba nalong at mauri fag barita sabaliwas talun Kanaan, ay siginan anya fagayu, ngay taw Israel nafamayud. Ay kanya fag ngay taginsaful anbul sis Yawi at daga salubangan siginans fakasaitun.

³⁸ Uswe, Nun at baguama ay Kaleb, Efune at baguama, tuy way lang fag dua at yud anbul fag ngay taw at nananginsaful kafag talun.

Ngay Taw Israel Nababawan ngay Taw Kanaan

³⁹ Muisis nu nafoyung sa sangay taw Israel at kinfasludan, kanya fagayu maksvn nu kabalu.

⁴⁰ Balabag di, kanya fagayu masurip nu kafulo laman nangundaud sa sangay buksul sas talun Kanaan. Ay nalong te, “Namatangan ami te, nasalan ami, ay katsi, nafalganan wami glo sas talun Yawi at nafatuyanan sa emi.”

⁴¹ Dewa katanya, Muisis nalong sa anya fagayu te, “Wain ay fagyudun nafaning Yawi at ngay suguan? Wa ro am mababo!

⁴² Faragangi, aroro Yawi wa nangalo ayu, ay gababawan way ngap ro am ay ngay fawayan.

⁴³ Natalyuyan am Yawi, ay nu katanya kanya ro wa galo ayu, ay umbul ro am gina ngay taw Kanaan ay ngay taw Amalek nanamawayan ayu.”

⁴⁴ Dewa katanya, ngay taw Israel nalo wan ay nangundaud sa sangay buksul sis talun Kanaan, dewa Muisis ay Fagsuadan Nasadian yud nanangalo anya fagayu.

⁴⁵ Sanya ginan, ngay taw Amalek ay ngay taw Kanaan tagbanwan sa sangay buksul, nanamawayan ngay taw Israel, ay nababo ay nafafalo anya fagayu sitsigons Kurma.