Tap 13 - Fanawbuid tagsibaliwas Fakayabian

At Nanginsaful fag ngay Taw

¹ Yawi nalong sas Muisis te,

² “Sugui sik gaban taw laman nanginsaful sas talun Kanaan, kafag talun ku fagnamonun sa sangay taw Israel. Sugui sik ngay tagfangguna, sadi siginans galay kasugfunanan.”

³ Nu katanya, Muisis nafaning Yawi at suguan anya. Muisis nasugu ngay taw Israel at ngay tagfangguna laman nanginsaful talun Kanaan.

^4-15 Kayu tuy ngay kasugfunanan ay at ngay tagfangguna at ngay ngayan: Kasugfunanan Tagfangguna Rubin Samwa, Sakur at baguama Simyun Safat, Kuri at baguama Uda Kaleb, Efune at baguama Isakar Igal, Use at baguama Efraim Usea, Nun at baguama Benamin Palti, Rafu at baguama Sebulun Gadyel, Sudi at baguama Manase, Use at baguama Gadi, Susi at baguama Dan Amyel, Gemali at baguama Aser Setur, Mikael at baguama Naftali Nabi, Bupsi at baguama Gad Gewel, Maki at baguama

Kasugfunanan Tagfangguna

¹⁶ Kanya fag ngay taw Muisis at nasugu laman at nanginsaful talun Kanaan. (Muisis natubus Usea at ngayan, ay nafangayan anya te, Uswe, Nun at baguama.)

¹⁷ Ay gina kanya fagayu galoun, Muisis nalong sa anya fagayu te, “Loi sas fawalan fag alvngvdan, ay sanya ginan sam sKanaan sabaliwas fasiunan fag alvngvdan, ay fataglayuni nu glao am yakmay am andasug sanya fag ngay buksul.

¹⁸ Nanginsaful am te, setain kanya fag talun, ay nanginsaful yangay am te, o sanya fag ngay taw maseganama, o ay mannga momuy, o ay kanya fagayu ngayu o ay mannga wa ngayu.

¹⁹ Lingamani fia te, o kanya fag ngay taw at fagbanwanan, masine o mannga duan. Ay lingamani yangay te, o at ngay furuan e ngay dingding alad.

²⁰ Ay nanlingaman yangay am fia te, o at lutuk masine ay mannga duan, ay o e ngay kayu, o ay mannga duan. Ay ugatani te, gina ban am kafoli e buba tuam ngay rawvg.” (Ginanya, ngay wat ubas at rawvg anlesan wan.)

²¹ Nu katanya, kanya fag ngay taw nalo wan, ay nanginsaful siginans Sin fag talun at yud e taw, sitsigons furuan Rekub, munakbang sis Lebu-Kamat.

²² Kanya fagayu nafasigad nalao siginans Negeb yakmay andasug sas Kebrun, nu inda Akiman, Sisay, ay Talmay nu gbanwan; kanya fagayu Anak at ngay kasugfunanan. (Furuan Kebrun fitu wak banwa nu mawatan gina kawat furuan Suan sis talun Igiptu.)

²³ Ay kanya fagayu nu ndasug sas Liskung Eskul, nabul sik rawvg ubas. Kanya fag rawvg nu kabuba mabyat tua, nu katanya, kanya fagayu nabul sik kayu ay nafutus, ay duak taw gsaknayan. Ay gbuba yangay pumigranata ay fun kayu igus at ngay rawvg.

²⁴ Ay kafag talun nafangayan te, Liskung Eskul, aroro sanya ngay taw Israel nu gbul sik tanum wat ubas at rawvg.

²⁵ Nu nlangfe wan ufatk safuluk menit nu ginsaful talun Kanaan, anfoli

²⁶ sas Muisis, Arun ay sa sangay taw Israel sas talun Kades, sas Paran fag talun at yud e taw. Ay kanya fagayu nafoyung sa sangay taw at ngay nalag, ay nafalag at buba fag ngay rawvg.

²⁷ Ay kanya fagayu nalong sas Muisis te, “Nalao ami sam nasugu emi fag talun, ay nalag ami te, kafag talun masine tua ay maramraman. Ay tuy wan tibak rawvg.

²⁸ Dewa katanya, tagbanwan sanya fag ngay taw mabalyanan, at ngay furuan gbia ay mafaligungan alad gang. Ay nalag yangay mi sanya Anak at ngay kasugfunanan.

²⁹ Ngay taw Amalek gbanwan sis Negeb, ay ngay taw Ket, taw Ebus ay taw Amur gbanwan sa sangay buksul, ay ngay taw Kanaan gbanwan munakbang sis tigyangan dagat ay sis day Liskung Urdan.”

³⁰ Kaleb nafasun ngay taw sis Muisis at daga salubangan ay nalong te, “Glao watam laman nangagbilug kafag ngay taw at talun, aroro gtuyan au te, makatu tam nangagbilug.”

³¹ Dewa katanya, at nanangalo Kaleb fag ngay taw laman nanginsaful nalong te, “Watam makatu namawayan aroro kanya fagayu amaseganama yap tua antam.”

³² Ay at nananginsaful nafarapyag sa sangay taw Israel at mauri fag barita sabaliwa at nananginsaful fag talun. Kanya fagayu nalong te, “Wa masine em nalag sanya fag talun, ay saman ya kanya, at ngay taw gbia ay ngabat ayu daul.

³³ Ay sanya nalag yangay mi ngay taw Nefilim, Anak at ngay kasugfunanan. Nu gfaladlabian ami em sadili sa kafag ngay taw, kadaul waymi ayu sirut sik ngay liung, ay katanya yangay kanya fagayu nu gdama emi.”