Tap 10 - Fanawbuid tagsibaliwas Fakayabian

Ngay Budyung at Mawatan siginans Salapi

¹ Yawi nalong sas Muisis te,

² “Fawati duak budyung mawatan siginans sanbung salapi, ay agbilugi kafag budyung, laman famaful ngay taw ay famafalganan nu glao.

³ Ay nu nafawang wan kafag duak budyung, ngay taw nangaful sa ku bale at sakbawan.

⁴ Ay budyung at awang nu sayginan way, ngay tagfangguna way lang sas galay gaban at nangaful sam daga salubangan.

⁵ Ay nu nafawang budyung laman famafalganan ngay taw nu glao, ngay kasugfunanan tagsi ku bale at fakamenitan baliwa taguna glao.

⁶ Ay nu dua ginan way nu gfawang kanya fag budyung, ngay kasugfunanan tagsi baliwa ku bale at fasiunan fag alvngvdan taguna glao. Budyung at awang famasaful sa sangay taw lsrael laman glao.

⁷ Dewa katanya, saman way nu gfawang budyung gina gfaful ngay taw.

⁸ “Arun at ngay kasugfunanan tagfawang kanya fag ngay budyung. Faningi tuy fag ngay faugali anggan ay ngay kasugfunanan kabavn ban.

⁹ “Nu ndasug ban am sa ay fagnangagbilugun fag talun ay gina ban am gfawayan ay ngay fawayan at nafalingun ayu, fawangi ban ay ngay budyung, ay ginanya ban, au, ay Dius Yawi, gamatang au ay gfalangfe ayu siginan ay ngay fawayan.

¹⁰ Ay fawangi yangay ay ngay budyung gina am maful si ay ngay fagmafulun gina sit nafalganan fag buknga, ay gina am maful sabaliwa magdanun nu bagu kasure, ay gina am gfon ay ngay fagirugun fag ngay fanggalangun ay ay ngay fanggalangun laman sas fagmanabayanun. Kanya fag ngay budyung tagfamatang angku sabaliwa ku nasadian sa ayu. Au wan ay Dius Yawi.”

Ngay Taw Israel Nalao siginans Buksul Sinay

¹¹ Sis faduak safuluk menit sis faduak magdanun gina sis faduak banwa siginan ngay taw Israel nu glao siginans talun Igiptu, linyabu ankabat siginans Fagnansegan fag bale ramit nu inda at nasadian.

¹² Sanya ginan, ngay taw Israel nalo siginan sik talun at yud e taw tagsis Sinay, kanya fagayu nafataglayun nu glao ay linyabu anragang si sik talun yud e taw sis Paran.

¹³ Ginanya wan ngay taw Israel nu gfasigad glao kata Yawi at suguan sas Muisis.

¹⁴ Siginan Naksun, Aminadab at baguama, nu gfangguna, Uda at ngay kasugfunanan taguna glao gbuba at famatoglag fag ramit.

¹⁵ Netanel, Suar at baguama, tagfangguna sas Isakar at ngay kasugfunanan,

¹⁶ ay Elyab, Kelun at baguama, tagfangguna Sebulun at ngay kasugfunanan.

¹⁷ Ay nu nafaful wan ngay fagagbilugun sis Fagnansegan fag bale ramit, Gersun ay Merari at ngay kasugfunanan tagbuba kanya fag ngay fagagbilugun, ay kanya fagayu sis faguyanan nu glao.

¹⁸ Ay at fadogan at nalao Rubin at kasugfunanan gbuba at famatoglag fag ramit. Ay tagfangguna anya fagayu, Elisur, Sedeur at baguama.

¹⁹ Tagfangguna Simyun at ngay kasugfunanan, Selumiel, Surisaday at baguama,

²⁰ ay Eliasap, Dewel at baguama, tagfangguna Gad at ngay kasugfunanan.

²¹ Ay Kuat at ngay kasugfunanan at fadogan glao, kanya fagayu gbuba ngay fagagbilugun at yud e malong tagsis bale ramit. Ngay taw Israel nangus nu kadasug wan sat fadogan at fakadasugan, bale ramit nangus mafasinean wan.

²² Efraim at ngay kasugfunanan naguyan yangay, gbuba at famatoglag fag ramit. Tagfangguna anya fagayu Elisama, Amyud at baguama.

²³ Gamaliel, Pedasur at baguama, tagfangguna Manase at ngay kasugfunanan,

²⁴ ay Abidan, Gidyuni at baguama, tagfangguna Benamin at ngay kasugfunanan.

²⁵ Ay taguyan glao Dan at ngay kasugfunanan at fagfanggunaun fag ngay taw, kanya fagayu gbuba at famatoglag fag ramit. Kanya fagayu tagulit ngay gaban si baliwas faguyanan. Ay Akyeser, Amisaday at baguama, tagfangguna anya fagayu.

²⁶ Ay Pagyel, Ukran at baguama, tagfangguna Aser at ngay kasugfunanan,

²⁷ ay Akira, Enan at baguama, tagfangguna Naftali at ngay kasugfunanan.

²⁸ Kata kanya ngay taw Israel nu maafudan sas galay at ngay kasugfunanan gina glao.

²⁹ Ay Muisis nalong sat ifag Kubab, Reuel at baguama tagsiginans taw Midyan te, “Katsi glo wami sas Yawi at nalong ay at nafon sa emi em fagbanwanan ban. Nu katanya, aloi wa emi ay wa ban mi gfabayan emu aroro Yawi nafatuyanan te, kanya gfadante taw Israel.”

³⁰ Kubab nabalus Muisis te, “Duan! Au kafoli kway sa ku talun ay sa ku kaiban.”

³¹ Muisis nalong te, “Nu masine, lag gubun emi, aroro o way lang tagsaful nu inda ban nu gtungkud ami sit yud e taw fag talun.

³² Nu galo tua ban o emi, gfon ban mi emu sik afud siginans Yawi at fon ban emi.”

³³ Nu katanya, kanya fagayu nalao siginans Yawi at nafili fag buksul kaduge tuluk menit. Fagsuadan Nasadian si gugat at fagunan laman gfoyung at fagfiangalayan.

³⁴ Ay fagayu menit, galay ngay taw Israel glao, Yawi at linyabu si tua gugat at tungud.

³⁵ Galay namuba Fagsuadan Nasadian, Muisis gdarangin sas Yawi te, “Fanggunai emi ay fasaruayani em ngay fawayan, ay kanya nangus fagayu lumagyu wan.”

³⁶ Ay nu inda nu gfaragang Fagsuadan Nasadian, Muisis gdarangin sas Yawi te, “Afolii stie sa sangay taw Israel at yud katap ya.”