Tap 1 - Fanawbuid tagsibaliwas Fakayabian

Taguna fag Namariruk ngay Taw Israel at ngay Ngayan

¹ Ebi taguna fag menit sis faduak magdanun ay sis faduak banwa siginan ngay taw Israel galin siginans talun Igiptu, Yawi nafakamatoan Muisis sis Bale Fagnangablanganan sis Buksul Sinay sis talun at yud e taw. Yawi nalong sas Muisis te,

² “Riruki fagayu taw Israel at ngay ngayan siginan at mesa gaban ay talanan. Riruki ngay mangama at ngay ngayan,

³ at banwa tagduak safulu sat tungud baliwa, at makatu wa gfawayan. O ay am faduksay Arun, tagfangguna gina gfariruk.

⁴ Ay taggubuk ayu, labi duak mangama, sadi siginan sik kasugfunanan. Ay kanya yangay fagayu tagfangguna at mesa talananan.

^5-15 Kayu tuy fag ngay talanan at ngay tagfangguna taggubuk ayu: Kasugfunanan Tagfangguna Rubin Elisur, Sedeur at baguama, Simyun Selumiel, Surisaday at baguama, Uda Naksun, Aminadab at baguama, Isakar Netanel, Suar at baguama, Sebulun Elyab, Kelun at baguama, Efraim, Use at baguama, Elisama, Amyud at baguama, Manase, Use at baguama, Gamaliel, Pedasur at baguama Benamin Abidan, Gidyuni at baguama Dan Akyeser, Amisaday at baguama Aser Pagyel, Ukran at baguama Gad Elyasaf, Dewel at baguama Naftali Akira, Enan at baguama.”

Kasugfunanan Tagfangguna

¹⁶ Kanya fagayu, galay sik kasugfunanan at ngay tagfangguna, at nafili siginan sangay taw Israel.

^17-18 Nu katanya, gina faduak magdanun ay taguna fag menit, Muisis ay Arun nauro ngay taw Israel at ngay tagfangguna ay anggan fagayu taw Israel, ay nariruk fagayu mangama at ngayan, kinduak safuluk banwa sat tungud baliwa, gasfuan at ngay kalongan ay at ngay talanan at ngay ngayan.

¹⁹ Muisis nariruk ngay taw Israel at ngay ngayan sis talun at yud e taw sis Buksul Sinay, kata Yawi at suguan anya.

^20-43 Kayu tuy nu fagayu wan at ngay mangama, at banwa tagduak safulu sat tungud baliwa at makatu wa gfawayan, at nariruk siginan galay sik gaban ay talanan: Kasugfunanan At kayuan Rubin (Akubat baguama, tiba kaka) 46,500 Simyun 59,300 Gad 45,650 Uda 74,600 Isakar 54,400 Sebulun 57,400 Efraim, Use at baguama 40,500 Manase, Use at baguama 32,200 Benamin 35,400 Dan 62,700 Aser 41,500 Naftali 53,400

Kasugfunanan At kayuan

^44-45 Kayunya Muisis ay Arun anggan labi duak fagtainan at nariruk. Galay sik tagfangguna, gfangguna sas galay sik talanan. Kanya fagayu ngay taw Israel at ngay mangama tagduak safuluk banwa sat tungud baliwa ay at makatu gfawayan.

⁴⁶ Ngay taw Israel nu fagayu wan, 603,550.

⁴⁷ Kayunya ya ntap ngay taw Lebi.

⁴⁸ Aroro Yawi nalong sas Muisis te,

⁴⁹ “Lag gtap ya Lebi at ngay kasugfunanan gina o griruk ngay taw Israel.

⁵⁰ Abat ngate, fae fakamuluni ngay taw Lebi laman galaga bale ramit, nu inda ku faugali nu mafasakboan ay fagayu fagagbilugun. Ay kanya yangay fagayu tagbuba ay tagalaga bale ramit ay fagayu fagagbilugun sanya, ay kanya fagayu gbanwan sanya fag bale ramit at ligung.

⁵¹ Ngay taw Lebi yangay tagbuba gina gfalin bale ramit. Ay kanya yangay fagayu takawat. Ay nusnga sinu at nananggubuk nu dway sik taw Lebi, fabuli wan.

⁵² Ngay taw Israel maful sat galay kasugfunanan, ay galay sik kasugfunanan gfabat sik famatoglag fag ramit.

⁵³ Dewa katanya, ngay taw Lebi maful sis ligung bale ramit nu inda nu mafasakboan ku faugali, laman kdi kadotama ngay taw Israel. Ay ngay taw Lebi tagalaga bale ramit.”

⁵⁴ Nu katanya, ngay taw Israel nafakamulun takatanya kata Yawi at suguan sas Muisis.