Takamoyung 3 - Fanawbuid tagsibaliwas Fakayabian

Fagayu Mesa e Buknga

¹ Fagayu fakamulun stes fagdaul daga e buknga:

² E buknga kasalug ay e buknga kabul, e buknga gtanum ay e buknga ggutlu.

³ E buknga gfabul ay e buknga gfafia, e buknga giklas ay e buknga kawat.

⁴ E buknga galiasun, ay e buknga kase, ay e buknga kabalu ay e buknga guseganan.

⁵ E buknga grapyag ngay gang ay e buknga gfaful, ay e buknga gadgaloan ay e buknga gsaruayan.

⁶ E buknga grvbvy ay e buknga gfalyam, ay e buknga gsuksuk ay e buknga gukas.

⁷ E buknga ggirat ay e buknga gtiklis, ay e buknga gragangan ay e buknga garingang.

⁸ E buknga kedkesugan ay e buknga kadkaurian, e buknga gawayan ay e buknga manabayan.

⁹ Ay Dius nu nafalganan wan kafag ngay buknga, nataw ya ban at masuad taw at faginkidapanun yay gfakamulun?

¹⁰ Nalag au Dius at nafalganan fag ngay fakamulun laman sa sangay taw.

¹¹ Fagayu tuy Dius at nafalganan takafasludan sas fagayu buknga. Ay kanya nafon antam amatanganan laman saful tam takadasug ban, dewa katanya, wa tam saful at ngay fakamulun siginans fagsigadan ay anggan ban sas fakatabuan.

¹² Namatangan au te, at masine taw at fakamulun kaduge gleleg useganani yakman lang ay fakamuluni at masine.

¹³ Dius kaylat nu gfangon tam ay ginum ay guseganan, nu siginan tua tam ngay nainlufuyan, aroro Dius at fon antam kanya fagayu.

¹⁴ Saful au te, Dius at nawat fagayu wa ban kalyam kabavn ay wa tam e fagmafamutun ay e fagmabuinun ya. Dius gfakamulun takatanya laman gsuyu tua tam anya.

¹⁵ Takafasludan katsi ay takadasug yay ban, ebi anfasludan wan. Dius gfadog way lang at ngay kinfasludan.

¹⁶ Ay nalag kyangay te, fagmauriun way takafasludan stes fagdaul daga abat ngate fagmatuyanun ay fagmasineun.

¹⁷ Nalong au sa ku sadili te, “Dius ban ginsaful ngay taw at matuyan ay at mauri, aroro kanya nafalganan wan buknga sas fagayu nusnge wain.”

¹⁸ Dius gfaskud ngay taw laman kanya gfalag sa sangay taw te, kanya fagayu kata way sik ngay mangilafang.

¹⁹ Ngay taw at kayaunanan kata yangay ngay mela; kabul way. Ay gsud way e engasan, nu katanya, ngay taw we fagmafanagsagun sa sangay mangilafang. Anud fagayu we masuad ya!

²⁰ Katanya yay kanya fagayu at fakadasugan. Fagayu siginan ways daga ay kafoli way ban sas daga.

²¹ Sinu at nasaful te, taw at falad sa tua ttungud, ay ngay mela at falad sa ways daga?

²² Nu katanya, namatangan au te, at masine taw at fakamulun useganani yakman lang sat ngay nainlufuyan, aroro kanya at fagagbilugun wan. Nusnga sinu fag taw we malong te, nataw ban takadasug nu nbul wan.