Takamoyung 11 - Fanawbuid tagsibaliwas Fakayabian

Ke Fagsafulun fag Taw at Fakamulun

¹ Fafuli am salapi famul nusnge wain am famaloun ay umkayu ban am ramraman.

² Am salapi fasai tua tagsaman saman fag famaloun, aroro wo saful nusnga setaw takadasug fag ngay mauri stes fagdaul daga.

³ Nu glinyabu way daul, karak wan sas fagdaul daga. Ay nu inda fun kayu nu maritan, sanya way ban gugat.

⁴ Nu gfanya way o gugat at masine fag buknga, wo mafatanum ay wa ban o e faggutluun.

⁵ Nu setain nu yud o glag tagmara, ay sik ngenge nu kabia sit mina at ungdan, katanya yangay Dius nu kawat fagayu nusnge wain, wo yangay saful.

⁶ Tanumi am bvtang siginans balabag anggan anyabi, aroro wo saful te, inda fag bvtang tagtugbung, o ay gtugbung tua fagayu.

⁷ Manabayan fagayu tagsis mayamag, ay menit nu kalag masine.

⁸ Nu katanya, kaduge o gleleg manabayani tua. Dewa katanya, Amatangani te, fakabulun kadasug ay kanya ngaduge. Fagayu takafasludan we masuad.

⁹ Am at mabaguama yay, mabayani tua kaduge am mabaguama. Fakamuluni ay fakaylatun gfakamulun, dewa katanya, amatangani te, Dius ban gfaurianan ayu kata ay nafakamulun.

¹⁰ Lag am gamatangan ay lag am gafanawa aroro fagmabaguamaun kalangfe way.