Takamoyung 10 - Fanawbuid tagsibaliwas Fakayabian

¹ Nu setain sik lango at kinbul nu mafabasung sik bubug famaebebanglu, katanya yangay fagyudun mamatanganan, marasras way fagsafulun ay fagmatuyanun.

² At ke fagsafulun fag taw kaylat tua gfakamulun at masine, dewa katanya, at yud e fagsafulun kaylat way namakamulun at mauri.

³ Ay at yud e fagsafulun nu glao gfalag way te, we fagsafulun, ay gfalag sas fagayu taw te, wa mamatanganan.

⁴ Am tagfangguna nu ndotama way emu, lag yap vtv gubun am fanambagun. Nu manabayan tua am amatanganan, gfalyam tua ban dewa maksvn am asalanan.

⁵ Ay sadi ya ku nalag at yud masine stes fagdaul daga, ngay tagfangguna tagfakamulun takata tuy:

⁶ Kanya fagayu gfon sat yud e fagsafulun at maksvn fag fanambagun, dewa katanya, gfon sat maramraman fag ngay taw at yud way maksvn fag ngay fanambagun.

⁷ Nalag au sik ngay fagsuguan nu gsakay sit mesa kabayu, kaduge takadungug fag ngay taw glao kata ngay fagsuguan.

⁸ Dewa o at naali sik lusung, tibaginan o yay takatong sanya. Ay nu gduksun o nu sa ways sulat alad, tibaginan ule kagat emu.

⁹ Dewa o at nabaras gang, tibaginan o yay at natalfian, ay dewa o tagbalse, tibaginan o yay at nataga.

¹⁰ Am wase way maglat ay way o nafaglat, fagdaul wa am fagmabitsugun nu gfugfug o. Ay am fagsafulun gfon emu fagmakatuun.

¹¹ We tungkul dewa o mafagup sik ule, nu gagatan way o.

¹² At ke fagsafulun fag taw at ngay longan gfae fagmatuyanun anya, dewa katanya, at yud e fagsafulun at ngay longan gtaban way anya sas faurianan.

¹³ At yud e fagsafulun nu garingang, siginans fagsigadan mauri wan. Ay nu kaaduge wan, kaugat yay nu mauri kata sik tagfansaful,

¹⁴ ay wa gfaragang nu garingang. We taw nasaful takadasug ban, nu katanya, we mainto te, setain ban takadasug nu nbul tam.

¹⁵ At yud mamatanganan fag taw kalufuy wan nu gfakamulun, nu katanya, kanya wa kaylat ya sas furuan daul laman nanfakamulun.

¹⁶ Afanyuan sik furuan daul at fun at amatanganan nu kata way sik sisian, ay at ngay tagfangguna at fakaylatun nu sa way gugat sfagmafulun at ke ngay fakonun.

¹⁷ Dewa katanya, mauseganan tua sik talun at ngay taw, at fun nu kasalug nu siginan tua sik talanan masine, ay at ngay tagfangguna gfangon fia sit kasakan fag buknga laman kae fagmabitsugun gfakamulun at fanambagun, ay bunwa laman galangu.

¹⁸ At momuy fag taw wa gfasine ya at bale dewa ganting ay at bale karasras wan.

¹⁹ Fakonun ay fanlangu mafae fagusegananun ngay taw, ay salapi mafon nusnga setaw at fagayudanun.

²⁰ Lag o gamatangan at mauri sas fun ay sat maramraman fag taw, aroro mae nafoyung sa anya fagayu.