Takamoyung 1 - Fanawbuid tagsibaliwas Fakayabian

Fagayu Nusnge Wain We Masuad

¹ Katatuy takamoyung at longan, fun Dabid at baguama, Erusalem at fun:

² We masuad! Fagayu we masuad!

³ Nataw ban at masuad taw at nainlufuyan kaduge gfakamulun ste swa daga?

⁴ Sik gaban taw namin wan ay at fadogan fag kasugfunanan gungbus wan, dewa katanya, fagdaul daga wa kabali.

⁵ Menit kasure ay kafalyu, gfoyfolian gugat siginan at fakasurean.

⁶ Gtagmara sas fasiunan baliwa fag alvngvdan, ay sanya ginan gtagmara yangay sas fawalan baliwa fag alvngvdan.

⁷ Fagayu liskung gfamilugan gugat sas dagat, ay dewa katanya, dagat di kapnu. Ay nu daginan kanya nu kasure, sanya yangay gugat nu kafoli.

⁸ Fagayu takatanya maidap nu kamatangan ay we mafafayamag. Tam ngay mata nu gdama ay tam talinga nu gdungugan katanya tua gugat.

⁹ Fagayu kinfasludan ebi, kafasludan yangay anggan katsi. Ay at ngay kinfakamulun ebi, gfakamulun yangay anggan katsi. We nfasludan tagsaman ebi, sas fagdaul daga.

¹⁰ O e fagmalongun o te, “Ansure at yud yay anfasludan ebi?” Ya tam ansalug, ay kanya sanya wan.

¹¹ Watam gamatang ya at ngay kinfasludan ebi, ay takafasludan ban umkalyam yangay sa taguyan.

Ngay Taw at Fagsafulun We Masuad

¹² Au fag takamoyung ansik fun au sas Israel. Ay nabanwan au sis Erusalem.

¹³ Nafon au ku leleg laman gamatangan au fia at masine sas fagayu takafasludan ste sfagdaul daga. Ay nalag au te, makalpa fag ngay fakamulun Dius at nafatigwanan sa sangay taw.

¹⁴ Nalag au te, taw at fakamulun fagayu ste sfagdaul daga we masuad. Kata way nu gfafalo o tagmara, fagayu nusnge wain we masuad.

¹⁵ Wo mafalugde at mabarukung, ay wo mafatap at yud e kalag.

¹⁶ Ay glong au sa ku sadili te, “Ku fagsafulun gtungud tua fagayu at kinfunan sis Erusalem. Ku fagsafulun ngayu.”

¹⁷ Namatangan au fia sabaliwas fagsafulun ay at yud e fagsafulun at fagsamanun, ay nasaful au te, tuy wa yangay e masuad. Kata way nu gfafalo o tagmara ay tuy fagayu wa nke masuad.

¹⁸ Aroro kaduge au kae fagsafulun, kafamut yangay ku fakabaluun.