Takabalu 1 - Fanawbuid tagsibaliwas Fakayabian

¹ Furuan Erusalem mabaluanan way lang, ebi dewa ngayu at taw. Ebi kanya oma takadungug fag furuan sas fagdaul daga, ay katsi kata way lang sik fagbubayun. Ebi kanya dewa kata sik fun at mangena, katsi kata way lang sik fagsuguan.

² Fagngabak yabi kanya maksvn nu gwayway. At ngay liasun glibisan sit fingi. Fagayu takesug anya we gfasun ya anya, ay at ngay fagadgalangan ankuri wa anya, ay kanya fagayu at ngay fawayan wan.

³ Maksvn nu gfaidapan talun Uda, ay at ngay taw natabanan wan. Kanya fagayu gbanwan sa tibak talun at yud e fagmabayanun. Ay at ngay fawayan gfafalo anya fagayu ay wa malagyu ya.

⁴ Dalan tagsas furuan Erusalem maksvn fag fakabaluun, aroro we kadasug ya laman nangaful galay fagmafulun. Ay we taw ya si sangay sakbawan furuan. Ay fagayu tagfon fanggalangun gidapan, anggan ngay baguina maksvn nu kabalu. Maksvn sis Erusalem nu mabalu.

⁵ Ay at ngay fawayan nafagsuguan anya fagayu, ay anramraman. Maksvn Erusalem at asalanan, nu katanya, Yawi nafaidapan anya. Ay at ngay fawayan nataban anya fagayu.

⁶ Nalyam wan Erusalem at fagmasineun. Ay at ngay tagfangguna kata sik takalunus fag arasyo tagrvbvy at fagnanfangonan. Kanya fagayu anmomuy gina gafafaloan.

⁷ Ngay taw sis Erusalem gina gidapan ay yud e fagbanwanan, gamatang at ngay ramraman ebi. Ay gina kanya fagayu gidapan we nagubuk ya, ay at ngay fawayan gfalingun kase.

⁸ Maksvn wan furuan Erusalem at asalanan. Nu katanya, kanya ansik mauri. Ebi tagfauseganan anya fag ngay taw, katsi gfalingun wan, aroro sat fakaplaun. Ay at kaksvnan nu kapla kanya gfandeng ay natalyuyan gidapan.

⁹ Erusalem at fagmauriun andungug sas fagayu taw, ay kanya wa nasaful at fakadasugan. Maksvn nu malimu at kindasug sanya fag furuan ay we nagubuk ya anya. Nu katanya, kanya nalong te, “Yawi, damai ku fagidapun aroro ku ngay fawayan nababo wa angku.”

¹⁰ At ngay fawayan nabul wan fagayu at ramraman. Kanya nalag tibak talun at taw nu gsakbo sas Yawi at bale, Yawi deyud kaylat kanya fagayu nu gsakbo.

¹¹ Ngay taw Israel gidapan grvbvy at fakonun. Kanya fagayu nafabangsi at ngay ramraman sas fakonun laman gleleg. Erusalem glong te, “Yawi, damai tua angku, maksvn wan ku fakaplaun.”

¹² Ay kanya glong sa sangay tagdalan anya te, “O batang wam e fagidapun takaksvn ku fagidapun katsi? Yawi nafadasug sa angku takatatuy fag fagidapun, aroro kadotama angku.

¹³ Ay kanya nafadasug afuy siginans banwa, kata nu girug ku ngay bini. Kanya nafasangdawan si ku dalan ay ansangdaw au. Kanya naubun angku ay mamomuy kway lang fagngabak menit.

¹⁴ Kanya nafaful fagayu ku asalanan ay nafafasanan sa angku, ay kanya wa fagayu at nafatabanan angku. Fun Dius nafamomuy angku, ay nafababawan angku sa ku ngay fawayan ku fagyudun makatu gfawayan.

¹⁵ Fun Dius naiyan ku ngay tagfawayan siginan ku daga salubangan. Ay kanya nafaful ku ngay fawayan laman namabul ku ngay tagfawayan at mabaguama. Fun Dius nafamin ngay taw Uda kata nu gturis ubas at rawvg sis fagturisan.

¹⁶ Kanya wan ku fagwaywayun. We gfaksvn ya ay gfasun angku. Afanyuan ku ngay taw aroro at ngay fawayan nababo anya fagayu.”

¹⁷ Furuan Erusalem naet gubuk, dewa katanya, we nagubuk anya. Aroro Yawi naylat Akub at ngay kasugfunanan nu gfawayan ngay talun tagsit ligung. Tibak talun natuyan te, Erusalem maksvn nu mauri.

¹⁸ Erusalem nalong te, “Yawi matuyan, dewa katanya, kwa nafaning at ngay suguan. Nu katanya, fagayu am, dungugani ay damai ku fagidapun. E nataban wan ku ngay baguama ay ku ngay baguina.

¹⁹ Naet au gubuk sa ku ngay fasudsunan, dewa katanya, kanya fagayu natalyuyan way angku. Ku ngay tagfon fanggalangun ay ku ngay fagtainan furuan, anbul wan gina grvbvy at ngay fakonun laman gfataglayun gleleg.

²⁰ Yawi, damai tua nu gidapan au! Maksvn nu gafanawa au aroro nafadotama au emu. Sa ku ngay dalan ay anggan sa ku basad bale e gfadfabulan wan.

²¹ Ngay taw nadungug oma nu gfandeng au, ay dewa katanya, we nafasun angku. Ku ngay fawayan nadungug nu gfaidapan o angku, ay kanya fagayu guseganan way. Yawi, faurianani wan anya fagayu laman umke fagidapun yangay kata angku.

²² Kanya fagayu nafakamulun at mauri; nu katanya, faurianani wan anya fagayu kata nu gfaurianan o angku aroro sa ku ngay asalanan. Malayun wan nu gfandeng au, ay kwa bangan gamatang ya ku bilug.”