Sakaryas 8 - Fanawbuid tagsibaliwas Fakayabian

Yawi Nafatuyanan te, Namae Fagmanabayanun Erusalem

^1-2 Yawi at Mabalyanan nalong yay fia sas Sakaryas te, “Maksvn nu kesug au furuan Siun. At kaksvnan nu kesug au anya, namaurianan au at ngay fawayan.

³ Nangafoli au sas Siun, Erusalem fag furuan, ay namanwan au sanya. Ay gfangayan ban Erusalem te, at matuyan fag furuan, ay ku fagagbilugun fag buksul gfangayan te, at yud e malong fag buksul.

⁴ At ngay mafufuama ke tulag gdog yay manangalunggung sas Erusalem at ngay fagaweanan aroro mafagtainan.

⁵ Ay at ngay sisian ban tagawean umkapnu sa sangay fagaweanan.”

⁶ Yawi at Mabalyanan nalong yay fia te, “At sawad ban fag ngay taw umke amatanganan te, maidap way ban takatanya nu kafasludan. Dewa katanya, wa maidap sa angku.

⁷ Namalangfe au ku ngay taw at natabanan sa sangay talun tagsis fakamenitan ay sis fakayabian.

⁸ Namafoli au anya fagayu sas Erusalem, ay namabanwan sanya. Ay gdog kyay ban gtuyan anya fagayu te, ku ngay taw, ay au ban at Dius at matuyan ay at mafanggubuk.”

⁹ Ay Yawi at Mabalyanan nalong yay fia te, “Dungugani: ‘Mabitsugi ay ugatani gina am kawat Yawi at bale.’ Ebi, ngay taglong at nafadog nawat Yawi at Mabalyanan at bale at fagfatungkudan turuk, nalong wan takatanya.

¹⁰ Ebi gina yud gdog nafasigad kawat Yawi at bale, wa gbayad ya sa sangay tagfakamulun ay sat naulbus fag fagbaugun laman gfafakamulun. Ginanya, maidap at famanwanun, aroro ngayu at fawayan ay naylat au laman kanya fagayu gawayan.

¹¹ Ay katsi au, Yawi at Mabalyanan glong au te, kwa ban gfakamulun ya takatanya sat sawad fag ngay taw.

¹² Manabayan tua ban nu gfananumun am, ay grawvg tua ban ay ngay wat ubas, ay ngayu tua ban ay gutluan ay e damug tua ban siginans kiwang. Namon kban takatanya sa ayu, am at kinsawad, laman ay fagagbilugun.

¹³ Ngay taw Uda ay Erusalem, tibak talun at taw nafaurianan ayu, dewa katanya, namalangfe au ayu, ay siginan ban ayu kanya ban fagayu tumoglag angku. Nu katanya, lag am kalimu, ay fabitsugi ay amatanganan.”

¹⁴ Yawi at Mabalyanan glong yay fia te, “Ebi gina ay ngay mangaguyang nafadotama angku, namatangan au te, namaurianan au ayu ay kwe afanyu ya.

¹⁵ Dewa katanya, katsi namatangan au te, lag am kalimu aroro gdog kyay nangesug Erusalem ay Uda.

¹⁶ Katatuy ay fagnamakamulunun: at matuyani tua ay ngay longan, ay matuyani yangay nu gfawabilugan am laman sa ay fagmasineun.

¹⁷ Lag am gamatangan sa ay ngay iba at mauri, ay lag am glong at yud matuyan aroro kanya wa masine sa angku.”

^18-19 Yawi at Mabalyanan nalong yangay sas Sakaryas te, “Galay sis faufat, sis falima, sis fafitu ay sis fasafuluk magdanun gdarangin am yud gfangon, ay ginanya ban fag ngay menit umsik mauseganan sa sangay taw Uda. Nu katanya, esugi tua fagmatuyanun ay fagmanabayanun.

²⁰ Ngayu bank taw takadasug sas Erusalem siginan tibak furuan.

²¹ Ay sik furuan at ngay taw glao sa tibak furuan ay nanlong te, ‘Glo wami laman nangakbang ay nandarangin sas Yawi. Gewan, aloi emi.’

²² “Ay ngayuk taw siginan at mabalyanan fag ngay talun umdasug yangay sas Erusalem laman nangakbang ay nandarangin sa angku.

²³ Ay ginanya ban fag menit, safuluk taw tagsaman at fangaringang at yud gbanwan sanya, nangakbang sa sik taw Udyu ay glong te, ‘Kaylat ami nangalo ayu aroro nadungug ami te, Dius galo ayu.’ ”