Sakaryas 5 - Fanawbuid tagsibaliwas Fakayabian

Taginfan sabaliwa sik Rirukan at Mafalutan Taglayugan

¹ Nalag au sik rirukan mafalutan glayugan.

² Ay tagbarita nainto sa angku te, “Nataw am nalag?” Nalong au te, “Sik rirukan mafalutan glayug at kabaan tuluk safuluk darafa gsugfunan, ay at kadamvlan labi limak darafa.”

³ Ay kafag tagbarita nalong angku te, “Marirukan sanya fag fagrirukan ngay faurianan takadasug sas fagdaul Israel. Katatuy at marirukan: fagayu tagfangkamul gaiyanan siginans Israel. Ay sit bilingan marirukan te, fagayu takamuagan gaiyanan yangay.

⁴ Yawi at Mabalyanan nalong te, namadasug au takatanya fag faurianan sa sangay bale nu inda ngay tagfangkamul nu gbanwan ay sa sangay taw takamuagan glong ku ngayan. Ku faurianan gbanwan sanya fag ngay bale yakmay kanya fagayu ankiklas.”

Taginfan sabaliwa sik Mangena at Masuadan sisad Sabi

⁵ Tagfakamatoan angku fag tagbarita nadog yay ansure ay glong te, “Damai takadasug.”

⁶ Nabalus au anya te, “Ay nataw?” Ay kanya nalong te, “Sik sabi.” Ay gfataglayun glong te, “Kanya sik fagtoglagan fagdaul talun Israel at asalanan.”

⁷ Kanya fag sabi e fanuklub tingga. Ay nu nabul au at fanuklub nalag au sik mangena malunggung sisad sabi.

⁸ Ay kanya fag tagbarita nalong te, “Kanya fag mangena fakatoglagan asalanan.” Ay sanya ginan kafag tagbarita natigna kafag mangena sasad basad sabi ay nadog nasuklub.

⁹ Sanya ginan, e nalag au duak mangena e fakfak kata manuk tungud. Kanya fag dua nabangkad kafag sabi ay nabuba nafabat sas kiwang.

¹⁰ Nu katanya, nainto au sa tagfakamatoan angku fag tagbarita te, “Dada duena nu gbuba kafag sabi?”

¹¹ Ay kanya nabalus angku te, “Sas Babilunya, nu inda nu kawat sik bale laman fagfasakboan kafag sabi. Ay gina ntabu, namasakbo sanya kafag sabi.”