Sakaryas 3 - Fanawbuid tagsibaliwas Fakayabian

Taginfan sabaliwas Uswe fag Tagfon Fanggalangun

¹ Yawi nafalag angku Uswe fag tagfon fanggalangun nu malindug sis Yawi at tagbarita at daga salubangan. Ay Satanas malindug sit siun baliwa laman gfoyung te, mauri at nafakamulun.

² Ay Yawi at tagbarita glong sas Satanas te, “Yawi at nafili Erusalem, gfatuyan te, gsalan o. Aroro kanya nafalangfe Uswe siginan at fagatabananan kata nu gbul sik famaygang siginan sad afuy.”

³ Uswe kaduge malindug sis tagbarita at salubangan, masuya way at lanbung.

⁴ Nu katanya, tagbarita glong sa tibak tagbarita tagsit salubangan te, “Buli wan Uswe at lanbung.” Sanya ginan, tagbarita glong sas Uswe te, “Nabul kwan am ngay asalanan. Ay katsi, namasulun au sa emu at masine fag lanbung.”

⁵ Ay nalong kyangay sa tibak tagbarita te, “Fasuluni yangay sa anya sik fansifig alfuyu at masine.” Nu katanya, kanya fagayu nafasulun sas Uswe sik masine fag lanbung ay sik fansifig alfuyu at masine, kaduge Yawi at tagbarita malindug ay gdama anya.

⁶ Sanya ginan, Yawi at tagbarita nafatigwanan sas Uswe te,

⁷ “Nu gbanwan tuo kata ku balyawvtan ay nu gfaning tuo ku ngay suguan, o wo waban tagalaga ku bale ay anggan at ngay fagaweanan. Ay gfabayan au nung o nangakbang sa ku fagmasineun kata ngay tagbarita at fakamulun.

⁸ Ay katsi, Uswe fag tagfon fanggalangun dungugani: o ay am ibama fag ngay tagfon fanggalangun kata sik fagtoglagan takafasludan ban. Namasure au ku fagsuguan at nafangayan te, Sanga.

⁹ Uswe, damai ku nafasa am daga salubangan fag gang. Kafag gang e fituk tagis ay namagaruy au tuy, ay sik menit way ban nu gbul au taw Israel at asalanan ay gfalyam kwan.

¹⁰ Ginanya ban fag menit, manabayan tua nu mabanwan am. Galay am at sadi nantaban am ay ngay fasabale laman nanmalunggung am manabayan sis daga fun wat ubas ay sis daga fun kayu igus. Au, Yawi at Mabalyanan, taglong tuy.”