Sakaryas 13 - Fanawbuid tagsibaliwas Fakayabian

Nu Gfalyam ngay Taw Israel at Asalanan

^1-2 Yawi at Mabalyanan nalong te, “Ginanya ban fag menit, nanluang au bulbug at fun laman sas Dabid at kasugfunanan ay sa sangay taw Erusalem laman namalyam at ngay asalanan ay at fagmasuyaun. Namalyam kwan ngay fagsegan siginans Erusalem laman kanya fagayu wa gamatang ya. Nangaiyan kwan siginans Erusalem ngay taglong ay at mauri fag ngay falad.

³ Ay nu e glong yay ban gugat te, ‘Sik taglong au, ay fagayu ku longan siginans Yawi,’ at fagtainan wan at nangurus anya aroro kamuag.

⁴ “Kanya fag ngay taglong umkapla sat nalong fag ngay taginfan. Ay wa ban gsulun ya taglong at lanbung laman nanfamuagan.

⁵ Abat ngate, kanya ban fagayu mesa way glong te, ‘Bunkwa sik taglong. Sik tagtanum kway siginan nu masisian au.’

⁶ Ay nu e nainto te, ‘Wain am fage bangbangun?’ Kanya glong te, ‘Anke bangbang au kaduge au si ku ngay fagadgalangan at bale.’ ”

Tagalaga nu Kabul ay at ngay Tupa nu Gsaruayan

⁷ Yawi at Mabalyanan glong te, “Falganani fiso tagsumbalian at uyup! Ay fabuli wan ku nafili fag tagalaga tupa. Fabuli anya laman at ngay fagalagaun fag ngay tupa sumaruayan. Ay namaurianan au anya fagayu.

⁸ Galay tuluk afud ngay taw Israel, umbul wan at duak afud.

⁹ Ay at sadi fag afud namasine au kata nu e nafasine sik salapi sasad afuy. Namaskud au anya fagayu kata nu gfaskud sik gintu sasad afuy. Kanya ban fagayu nanguro sa angku ay gbalus ktua ban. Gtuyan kban anya fagayu te, ku ngay taw, ay kanya ban fagayu gtuyan te, ‘Yawi em Dius.’ ”