Sakaryas 11 - Fanawbuid tagsibaliwas Fakayabian

Yawi Namaurianan Lebanun ay Basan

¹ Am tagbanwan sis talun Lebanun luangi ay ngay furuan at sakbawan laman afuy gsakbo ay nangirug ngay fun kayu sidru.

² Abalui aroro ankamin wan ngay fun kayu sidru, ay ankamin yangay ngay fun kayu ayu daul tagsis Basan.

³ Dungugani, ngay tagalaga tupa gwayway, aroro at fagnamafangonan wa masine ya. Dungugani yangay ngay mela nu guni aroro at fagbanwanan fag ngay araw tagsis tigyangan Urdan antubas wan.

Duak Tagalaga Fagbaugun

⁴ Katatuy Yawi ku Dius at longan: “Alagai at fagnamilasun fag ngay tupa.

⁵ At nabayad ay at nafilas wa nfaurianan. Ay at nafalao glong te, ‘Yawi, fadi fadi! Maramraman kwan!’ Ay anggan at ngay tagalaga wa nfanyu ya at fagalagaun fag ngay tupa.

⁶ “Au, Yawi, glong au te, kwa ban kafanyu ya ngay taw tagste fag talun. Namafagtainan kban anya fagayu sat ngay iba ay sat fun. Ay at ngay iba ban namaurianan kafag talun, ay kwa ban gfalangfe ya anya fagayu.”

⁷ Nu katanya, naalaga au ngay tupa ngay tagfalao at fagnamilasun. Ay nanamul au duak tulag, at sadi nafangayan au te, Fagmasineun, ay at fadua nafangayan au te, Fagmasadiun.

⁸ Naiyan au kanya fag tuluk tagalaga fagbaugun kaduge sik magdanun. Kafag ngay tupa kauri angku, ay kwa kagwanta ya anya.

⁹ Sanya ginan, nalong au sa ku fagalagaun fag ngay tupa te, “Bunwa au ya ay tagalaga. Fagayu takabul kabul wan, ay fagayu tagafaurianan gafaurianan wan, ay at sawad, to sanya kadkagatan.”

¹⁰ Sanya ginan, nabul au tulag ku nafangayan te, Fagmasineun ay nalifung au laman gfatoglag te, Yawi nafae yud e masuad at nasadian sas fagayu taw.

¹¹ Ay ginanya fag menit Yawi nafayud e masuad at nasadian. Tagfalao ngay tupa tagdama angku nasaful te, Yawi nafae masuad ku ngay nafakamulun takatanya.

¹² Nalong au sa anya fagayu te, “Nu gamatangan am, ku nafakamulun nu kabayad tua, foni wa angku, ay nu dway, ayu wan kafag ngay salapi.” Nu katanya, kanya fagayu nafon angku tuluk safuluk salapi.

¹³ Ay Yawi nalong sa angku te, “Nansuad o kafag ngay salapi sas fagsuadan tagsis Yawi at bale.” Nu katanya, nabul au kanya fag tuluk safuluk salapi, kanya fagayu at nafatugan te, kasakan wan ku bulan. Ay kanya fag salapi nasuad au sas fagsuadan tagsis Yawi at bale.

¹⁴ Sanya ginan, nalifung au at faduak tulag ku nafangayan te, Fagmasadiun, laman gfasaful te, Uda ay Israel we fagmasadiun ya.

¹⁵ Yawi gdog yay fia glong angku te, “Nangakata o sik yud e masuad fag tagalaga tupa.

¹⁶ Aroro namae tagfangguna au sas Israel sik takata yud e tungkul fag tagalaga. Kanya ban wa ggubuk ya ngay tupa tagakabulun wan. Ay wa nanrvbvy ya at nalyam, ay wa namafia ya at ke ngay bangbang, ay wa namafangon ya at maniwang, dewa katanya, kanya nangon ngay tupa at mataglu at yamas, ay gbul at ngay u.

¹⁷ Afanyuan at yud matuyan fag tagalaga tupa at fakadasugan aroro kanya nafabayan at fagalagaun fag ngay tupa. Siginan sik fiso at uyup gatvngi kanya at daluap, ay suruti at siun fag mata. Nu katanya, we tungkul ya at daluap at sadi ay at siun fag mata wa glag.”