Sakaryas 10 - Fanawbuid tagsibaliwas Fakayabian

Yawi Anfanyu Uda ay Israel

¹ Gina fanugbungan fag buknga, fagayu am eti arak sas Yawi, aroro sia wan tagfae arak gasfuan lingsi ay limbad, sa sangay taw ay sat ngay fananumun tagsis gamasun.

² At mafanud, tibak fagsegan ay ngay taginsaful glong way at yud matuyan, ay kamuagan nu gfoyung at ngay taginfan at masuad. Kanya dewa gfabitsug ngay taw at amatanganan, we fanambagun, nu katanya, ngay taw Israel kata ngay tupa ginkalyaman. Kanya fagayu gidapan aroro we gfangguna.

³ Yawi nalong te, “Maksvn nu kadotama au ngay tagfangguna ku ngay taw. Matuyan wan, namaurianan kwan anya fagayu. Aroro au wan tagalaga ku ngay taw Uda kata nu galaga tupa. Kanya fagayu namakata au sik kabayu tagfanagsag sis fagawayanan.

⁴ Siginan bans Uda ngay tagfangguna, takata sik gang fagsarigan, fagtabingan lubyang fag turuk ay godun.

⁵ Kanya fagayu gadgaloan kata ngay tagfawayan at mabitsug tagbabo at ngay fawayan ay gsiad kata lifak si sangaba dalan. Kanya fagayu makatu gfawayan aroro galo au anya, ay namabo ngay tagakabayuan.

⁶ Namabitsug au ngay taw Uda, ay namalangfe Israel at ngay kasugfunanan. Aroro anfanyu au anya fagayu ay namafoli au sat fagbanwanan. Au wan Yawi kanya fag ngay taw at Dius. Nu katanya, gbalus au at ngay darangin. Ay kanya fagayu kata yay gina au yud naiyan.

⁷ Ay anggan ngay taw Efraim umkata yangay ngay tagfawayan at mabitsug, ay kanya fagayu umke fagusegananun. Ay at ngay fufu ban gamatang at nababoan, ay guseganan sa ku ngay nafakamulun.

⁸ Nanguro au ay namaful ku ngay taw Matuyan wan namalangfe au anya fagayu ay namayu au at ngay kasugfunanan kata ebi taguna.

⁹ Ay dewa au nafarapyagan anya fagayu sa tibak talun, kanya fagayu gamatang tua gugat angku, ay kanya ban fagayu anggan at ngay sisian gleleg tua ban, ay kafoli sat talun.

¹⁰ Namauli au anya fagayu siginans Igiptu ay siginans Asirya. Ay namafoli au sas Gilyad ay sas Lebanun. Ay wa ban sak ya sit talun.

¹¹ Ay at fagidapun ban dewa kadaul sdagat malangfe tua, ay dewa dagat maksvn nu glugwak ummanabayan yay, ay umlanggang Liskung Nilu at fagngabasadan. Asirya ban we fakamanagsagun ya, ay Igiptu ban we fagmabalyananun ya.

¹² Gfabitsug kban ku ngay taw, ay siginan ku ngayan umke fagmanabayanun. Au, Yawi, taglong tuy.”