Rut 1 - Fanawbuid tagsibaliwas Fakayabian

Rut nu Gfasun Nuemi

^1-2 Gina ngay tagfangguna gfunan sis talun Uda, sik maksvn fag fanlunus andasug. Nu katanya, Elimelek fag talanan nalao siginans Betleem sis talun Uda ay nalin sas talun Muab, Elimelek at mangena Nuemi ay at baguama fagdua, Maklun ay Kilyun. Ay kanya fag talanan siginans Efrata at gaban. Ay gina kanya fagayu sis Muab,

³ Elimelek anbul, ay at talnayan way lang at sawad.

⁴ Ay at baguama fagdua nafanmangena sis talun Muab, at ngayan Urpa ay Rut. Ay nu nlangfe safuluk banwa,

⁵ Maklun ay Kilyun anbul yangay, nu katanya, at sawad talmanugangan way lang.

⁶ Nuemi nadungug te, Yawi nafamanyun sat ngay taw sis Uda siginan nu gfayu at ngay gutluan. Nu katanya, talmanugangan nafalganan laman kafoli sas talun Uda.

⁷ Ay talmanugangan kaduge glao,

⁸ Nuemi nalong sat nugang fagdua te, “Afolii way sa ay mesa fagtainan. Yawi at fagmasineun si tua ban nangus ayu, kata ay nafalag fag fagmasineun sa ay mesa mangama ay sa angku.

⁹ Yawi ban nangus gfae indugan yay ayu ay umsik manabayan ban am fag talanan.” Sanya ginan, Nuemi nayuk at nugang fagdua. Ay talmanugangan maksvn nu gwayway.

¹⁰ Ay at nugang fagdua nalong te, “Nangalo wami emu sa am ngay kaiban.”

^11-12 Ay Nuemi nalong te, “Deyud, afolii way say furuan, wain yay ay fagnangaloun angku? O nu glong am nanfangindugan kyay ban ay nangae sisian munama laman ay indugan ban? Duan ya, aroro mafufuina kwan. Amatangani, nu nafangindugan kro katsi fag yabi ay anke sisian,

¹³ o nunda ban mafafanya yayam nu kagurang? Anud duan! Ay o nunda ro wam grvbvy ya tibak mangama laman ay indugan? Ku ngay sisian, wa ban umfasludan takatanya. At mafanud, ay nadalan fag fagidapun wa kaksvn ku nadalan fag fagidapun, aroro Yawi nafaidapan angku.”

¹⁴ Ay talmanugangan gdog yay fia gwayway. Urpa nayuk at nugangina ay noli wan sat furuan, dewa katanya, Rut naugwan maksvn at nugangina.

¹⁵ Ay Nuemi glong te, “Am biras anfoli wan sat ngay kaiban ay sat ngay fagsegan. Nu katanya, anggan o nangalo wo anya.”

¹⁶ Ay Rut nabalus te, “Lag o gfabulun te, gsaruayan wata, aroro nu inda ban o, sanya kyangay ban, ay nu inda ban am fagbanwanan, gbanwan kyangay sanya, ay am ngay kaiban, ku ngay kaiban yangay, ay am Dius, kanya yangay ban ku Dius.

¹⁷ Ay nu inda ban nu kabul o, sanya yangay ban nu kabul au, ay sanya yangay nu gfoli angku. Yawi ban gfaurianan angku nu naubun kway emu. At mafasaruayan ban anta, fakabulun way lang.”

¹⁸ Ay Nuemi nu ntuyan te, Rut wa kaylat ya kasaruayan siginan anya, naragangan way lang.

¹⁹ Ay kanya fag dua nafataglayun nu glao ay andasug sas Betleem sis talun Uda. Ay fagayu taw tagbanwan sanya kadulo. Ay tagsanya fag ngay mangena gidgintoan te, “O atsi Nuemi?”

²⁰ Nuemi nalong sa kafag ngay mangena te, “Lag am gfangayan ya angku te, Nuemi, nu bunway, Mara yakman lang, aroro at mabalyanan fag Dius nafaksvn ku fagidapun.

²¹ Gina au glao ste ginan, maramraman tuami, dewa katanya, Yawi nu gfafoli angku stae kwe ramraman ya. Lag gfangayan ya angku te, Nuemi, aroro at mabalyanan fag Dius nafaidapan angku.”

²² Talmanugang nu kadasug sas Betleem, antunggu gina fagsigadan fanggutluan barli.