Ruma 9 - Fanawbuid tagsibaliwas Fakayabian

Dius ay Taw Israel

¹ Siginan ku fagmasadiun sa tam Fun Isus, garingang au at matuyan ay kwa kamuag. At Masine fag Falad gfatuyan sa angku te,

² kabavn kabalu au maksvn ay gafanawa.

³ Ku fakaylatun nangus au wan tagafaurianan ay takasaruayan siginan tam Fun Isus, nu nlangfe tua ngap ban ku ngay kaiban.

⁴ Aroro kanya fagayu sik ngay taw Israel, Dius nafangayan anya fagayu te, at sisian, ay nafon sa anya fagayu sik fagmasineun, ay nawat sik nasadian, ay nafon yangay Muisis at Faugali, ay nafoyung at matuyan fia at fagnansegan, ay e ngay fatuyanan.

⁵ Dius nafili ngay taw Israel at ngay mangaguyang, ay sanya ginan yangay Dius at nafili fag Fun gina sia sik taw. Dius wan at mabalyanan sas fagayu, segi anya kabavn ban. Anud.

⁶ Dewa katanya, Dius at Longan wa nyud e masuad, aroro Dius at nafili bunwa fagayu Israel at kasugfunanan.

⁷ Ay bunwa Abrayam at kasugfunanan fagayu at kintap te, at sisian, aroro Dius nalong sas Abrayam te, Takatap ban fia te, am kasugfunanan tagsiginan way lang bans Isak.

⁸ At masuad te, Abrayam at ngay sisian, bunwa fagayu at kintap te, Dius at sisian, nu bunway at kinsalug tua tagfafasludan Dius at fatuyanan takatap te, Abrayam at ngay kasugfunanan.

⁹ Aroro ebi Dius nafatuyanan te, Kafoli kban kata katsi fag buknga, ay Sara gfasalug ban sik munama.

¹⁰ Ay bundi lang katanya, nu bunway anfasludan yangay takatanya sas Rebeka at sisian fagdua si tam mangaguyang Isak.

^11-12 Dius nafalag te, kata tua at algan nu gfili at ngay sisian, ay bunwa siginans taw at nafakamulun. Nu katanya, gina kafag duksay yud yay ansalug, ay gina yay yud nafakamulun at masine ay mauri, Dius nalong sas Rebeka te, “Am faglon ban gafagsuguanan am ngenge.”

¹³ Kata at Rirukan te, “Nesug au Akub ay ankuri kway Isaw.”

¹⁴ Nu katanya, nataw tam longan? O glong tam te, Dius wa matuyan? Ida, duan.

¹⁵ Aroro Dius nalong sas Muisis te, “Kafanyu au ku fakaylatun kafanyu, ay ggubuk au ku fakaylatun ggubuk.”

¹⁶ Nu katanya, Dius at algan bundi siginan taw at fakaylatun ay at fakamulun, nu bunway siginan tuas Dius at fakafanyun.

¹⁷ Ay Dius nalong sas Igiptu at fun te, “Nafili au emu sik fun laman siginan ban emu gfalag au ku fagmabalyananun, ay laman ban ku ngayan kadungug sas fagdaul daga.”

¹⁸ Nu katanya, Dius kafanyu tua at fakaylatun kafanyu, ay nusnga sinu takamabo anya gfaksvn at fakamaboun.

Dius at Fandotaman ay at Fakafanyun

¹⁹ Ay tiba ginan e ginto te, “Wain Dius at fagfayudun yay taw? Sinu at masalag Dius at fakaylatun?”

²⁰ O fag taw, wain am fagnamabadbaboanun Dius? O at awatan malong sa takawat anya te, “Wain fakatatuyun way nu mawatan au?”

²¹ O nunda sik takawat tikung wa mawat duak tikung, at sadi sik masine fia ay at sadi sik maugali way, siginan at fangawat fag lutuk?

²² Katanya yangay Dius at nafakamulun. Dius kaylat gfalag at dotama ay gfatoglag at fagmabalyananun. Dewa katanya, kanya nagwantan yay sas fagdaul at fangagwanta laman wa namamin at fagnamaminun wan fag ngay taw.

²³ Dius nafakamulun katanya laman gfalag sat fakafanyun fag ngay taw te, kamabalyanan nya. Siginan yay ebi, Dius nafili anya fagayu laman at fagnamausegananun.

²⁴ Itam wan Dius at nauro fag ngay taw, bundi lang ngay taw Udyu, nu bunway anggan yangay at yud Udyu fag ngay taw.

²⁵ Katatuy at longan sis Usea at rirukan te, “Ku yud fagagbilugun fag ngay taw, gfangayan kban te, Ku ngay taw, ay ku fagyudun kesug, gfangayan kban te, Ku fakesugun fag ngay taw.”

²⁶ Ay, “Nu inda Dius nu glong te, ‘Bunwa am ku ngay taw,’ sanya ban fag talun at ngay taw kangayan te, ‘Tagleleg fag Dius at ngay sisian.’ ”

²⁷ Ay katatuy Isayas at maksvn fag foyungan sabaliwas taw Israel: “Kanya ban fag ngay taw, dewa kayu lagnas sis tigyangan dagat, wa ban ngayu at kumlangfe.

²⁸ Aroro masakit ban tam Fun nu namafasludan at faurianan sas fagdaul daga at taw.”

²⁹ Ay Isayas nafoyung te, “Tam Fun at Mabalyanan nu dway ro nafae sawad ya antam fag kasugfunanan, matuyan satu ro ankata tam sfuruan Suduma ay Gumura.”

Taw Israel wa Gafanud sas Dius

³⁰ Nu katanya, nataw tam longan sabaliwa takatatuy? At yud Udyu fag ngay taw at yud naugatan nangatap kata nu yud e asalanan, kanya antap tua kata nu yud e asalanan siginan at fagafanudun.

³¹ Ay dewa katanya, taw Israel at naugatan nangatap kata nu yud e asalanan siginan nu gfaning at faugali, anfangulan way at nafakamulun.

³² Ay wain at fagyudun antap kata nu yud e asalanan? Aroro kanya fagayu nu gugatan nangatap kata nu yud e asalanan bunwa siginans fagafanudun nu bunway siginan way at sadili fakamulun. Ay siginan takatanya, kanya fagayu antaid way sat mataid fag gang.

³³ Kata at Rirukan te, “Damai, nafoli au sik fakataidan fag gang si sangay taw Udyu, kanya ban tagfalub kafag ngay taw. Dewa katanya, nusnga sinu tagafanud sanya fag gang di ban umkapla.”