Ruma 4 - Fanawbuid tagsibaliwas Fakayabian

Abrayam Tam Fagfaningan

¹ Setain taw Udyu at mangaguyang Abrayam nu katap te, matuyan?

² Abrayam ro e fagmafamatungudunun nu siginan di at fakamulun nu katap kata nu yud e asalanan. Dewa katanya, kanya we fagmafamatungudunun sis Dius at daga salubangan.

³ Aroro katatuy at marirukan sis Dius at Longan te, “Abrayam gafanud tua sas Dius, nu katanya, Dius natap anya kata nu yud e asalanan.”

⁴ At famayad sa sik tagfakamulun bunwa sik fon, nu bunway sik famayad tua sat nainlufuyan.

⁵ Dius wa gtap nusnga sinu fag taw kata nu yud e asalanan siginan at nafakamulun. Nu bunway Dius gtap tua sik tagasalanan kata nu yud e asalanan siginan at fagafanudun.

⁶ Katanya yangay fun Dabid at longan at masuad te, Mauseganan sik taw Dius at nafangayan te, yud e asalanan, nu bundi siginan kafag taw at fakamulun.

⁷ “Mauseganan sik taw Dius nu nafalyam tua at asalanan, ay at fagmauriun nu ntabun tua.

⁸ Mauseganan sik taw, tam Fun nu ddi gamatangan ya at ngay asalanan.”

⁹ O kanya fag fagmasineun sa way lang at ke fakatoglagan? Bundi. Anggan tua sat yud e fakatoglagan. Kata em longan te, “Abrayam antap kata nu yud e asalanan siginan at fagafanudun.”

¹⁰ Ginain nu kafasludan sas Abrayam takatanya? O gina yud nafae fakatoglagan, o mannga gina nafae fakatoglagan? Anfasludan sa anya takatanya gina yud yay nafae fakatoglagan.

¹¹ Kanya nafae fakatoglagan sik famatuyan te, antap kata nu yud e asalanan siginan at fagafanudun gina yud yay e fakatoglagan. Nu katanya Abrayam wan fagayu tagafanud at mama, deyud e fakatoglagan, ay at kintap kata nu yud e asalanan siginans fagafanudun sas Dius.

¹² Kanya yangay at ke ngay fakatoglagan at mama, ay bundi lang nafae fakatoglagan, nu bunway gafanud yangay kata tam mangaguyang Abrayam nu gafanud, gina kanya yud yay nafae fakatoglagan.

Magbilug Dius at Fatuyanan siginans Fagafanudun

¹³ Dius at fatuyanan sas Abrayam ay sat ngay kasugfunanan te, magbilug ban fagdaul daga, kanya bunwa siginan at nafaningan Muisis at Faugali, nu bunway antap tua te, kata nu yud e asalanan aroro siginan at fagafanudun.

¹⁴ Sik taw nu nangagbilug Dius at fatuyanan nu siginan way at fagfaningun Muisis at Faugali, fagafanudun we tungkul, ay Dius at fatuyanan wa yangay e tungkul.

¹⁵ Ay Muisis at Faugali nafae faurianan. Ay yaman e Faugali, wa ro e fakamaboun.

¹⁶ Nu katanya, siginan tam fagafanudun, Dius mon antam at nafatuyanan, aroro at kamagalangan, sas Abrayam at kasugfunanan fagayu. At fatuyanan bundi lang sa sangay tagfaning Muisis at Faugali, nu bunway anggan tua sas fagayu tagafanud kata Abrayam. Aroro fagayu tam, tam mama Abrayam.

¹⁷ Anriruk te, “Nafili au emu laman ngayuk taw at mama.” Sis Dius at daga salubangan Abrayam wan tam mama, aroro Abrayam gafanud sa anya. Dius tagfaleleg at ngay kinbul, ay takawat nusnge wain siginan at yud kalag.

¹⁸ Abrayam dewa yud e fagsegun ya te, ke sisian ban, kanya gafanud tua te, kanya ban ngayuk gaban taw at mama. Kata at longan sa anya te, “Am ngay kasugfunanan ban kayu ngay galeme.”

¹⁹ Abrayam di nmomuy at fagafanudun dewa gamatangan te, kata wa nu nbul, aroro mafufuama wan; at banwa arvs sadi wak sandan, ay Sara wa gsisian, sarokta nlangfe wan nu gfangigusan.

²⁰ Kanya di naduanun Dius at fatuyanan, nu bunway ankaksvn tua at fagafanudun ay naseg Dius.

²¹ Ay kanya gtuyan te, Dius mafafasludan at fatuyanan.

²² Nu katanya, Dius natap anya kata nu yud e asalanan aroro siginan at fagafanudun.

²³ At longan te, “Dius natap anya kata nu yud e asalanan,” bundi lang Abrayam,

²⁴ nu bunway anggan tua itam. Antap yangay tam kata nu yud tam e asalanan, nu gafanud tua tam sas Dius, at nafadog nafaleleg Isus tam Fun siginan at fagmabulanan.

²⁵ Dius naylat nu e gfabul Isus aroro sa tam ngay asalanan, ay nafadog nafaleleg anya laman gtap antam kata nu yud tam e asalanan.